Yelemiya 2:1-37
2 Yehova ahanjikile kuli ami ngwenyi:
2 “Yako ulweze Yelusalema ngwove, ‘Yehova nambe ngwenyi:“Nguli nakwanuka muchima wakulihana* wapwile nawo omu wapwile umwanapwevo,+Nazangi wangusolwelelenga omu ngwakuhuhwile.+Wangukavilenga mupambo,Mulifuchi lize kavalima jimbutoko.+
3 Isalele apwile wajila kuli Yehova,+ apwile jimbuto jenyi jakulivanga kwaha.”’Yehova nambe ngwenyi, ‘Weshowo mwamulya mwapwa namulonga,Lupi nalumuwana.’”+
4 Ivwenu vyuma nahanjika Yehova, enu vakuzuvo yaYakova,Nayenu jitanga javaIsalele muvosena.
5 Yehova nambe ngwenyi:“Upi muka vamwene vakakuluka jenu muli ami+Numba vahanduke kuli ami?Upi muka vamwene muli ami numba vaputuke kuzachila makombelo amokomoko+ nakulilingisa jino vapwenga vatu vamokomoko?+
6 Kavahulishile ngwavo, ‘Uno Yehova, ou atulowele mulifuchi lyaEjipitu,+Ou atutwaminyinyine mupambo,Mulifuchi lyamakundu+ namena,Mulifuchi lyachanga,+ lyamilima yayinene,Muze kamwahita vatuko,Muze kamwatwama vatuko,Ali kulihi?’
7 Kaha ngwaminehele mulifuchi lyamilembaMangana mulyenga mihako yalyo navyuma vyalyo vyamwaza.+Oloze omu mwejile, mwapihishile mulifuchi lyami.Mwalingishile uswana wami kupwa waunyengwe.+
8 Vapilishitu kavahulishileko ngwavo, ‘Yehova ali kulihi?’+Vaze vanangwilenga Jishimbi kavangutachikijileko,Tufunga valikangile kuli ami,+Vapolofweto vapolofwetelenga mulijina lyaMbale,+Kaha valemeselenga tulunga vaze kavavanganyalishilengako.
9 Shikaho ami Yehova ngunambe ngwami, ‘Nangumisopesa cheka,+Nangukasopesa nawa vana vavana venu.’
10 ‘Zaukenu muyenga kumatungu akuKichime+ mukatale.Tumenu vatu kuKetale+ vakahunanane kanawa.Kamonenu numba nge vyuma kana vyasolokaho lyehi.
11 Kutala kwatwama vaka-lifuchi limwe vaze vasezaho lyehi tulunga twavo nakuputuka kulemesa tulunga veka nyi?Oloze vatu jami vanahane upahu wami kuvyuma vyamokomoko.+
12 Enu melu, likomokelenu hachuma kana,Lichikiminenu mwomwo yachiwomawoma.’ Omu mukiko mwanambe Yehova.
13 ‘Mwomwo vatu jami vanalingi vyumevi vivali vyavipi:Vananguseze ami kaselwoke kameya akuyoya,+Kaha vanalifulila* mashimaAkuzeneka meya.’
14 ‘Isalele kapwa ngamba chipwe ndungo wakusemukila kuzuvoko.Nyi ika vanamumbachila kwijiva nge vyuma vyakupupa?
15 Vamyevu javandumba vali nakumutahwokela.+Vali nakutahwoka namazu akukanguka.Vananongesa lifuchi lyenyi nakulilingisa likomwese vatu.Jinganda jenyi vanajocho, kaha kamweshi vatuko.
16 Vatu vamuNofwe*+ namuTapanese+ vali nakwenyeka lifuchi lyove.*
17 Vyuma kana unalikolomwenavyo ove iveneMwomwo yakuseza Yehova Kalunga kove+Halwola akutwaminyinyinenga mujila.
18 Kahaze ika uli nakusakila kuya mujila yakuya kuEjipitu+Nakukanwa meya amuShihole?*Ika uli nakusakila kuya mujila yakuya kuAsulya+Nakukanwa meya amukalwiji Yufwalate?
19 Kuhuka chove chikwolole,Vilinga vyove vyakuhenga vikuhanjikile.Euluka nakutachikiza omu chapihya nomu chakola+Kuseza Yehova Kalunga kove.Kawangwivwile womako.’+ Omu mukiko mwanambe Mwata Wakulitulaho, Yehova wamayongomena.
20 ‘Mwomwo kunyima ngwahokwojwele toka yove,+Ngwambitwojwele malenge ove.Oloze ove wambile ngwove: “Kangweshi kukuzachilako.”Wasavalilenga kangalamina nakulinga ujila+Hajipili jajisuku josena namwishi yamitondo yakujika mafwo yosena.+
21 Ami ngwakutumbile upwenga umuvinyo wamwaza,+ ngwatumbile mbuto yamwaza.Nyi unasokolokela ngachilihi miketengo yamuvinyo waupi?’+
22 ‘Numba nausana tuhu nasota nanjapau yayivulu,Oloze mulonga wove kaweshi kujimbangana kumeso amiko.’+ Omu mukiko mwanambe Mwata Wakulitulaho Yehova.
23 Uno uli nakwamba ngachilihi ngwove, ‘Kangwalipihishileko,Kaha nawa kangwalemesele vaMbaleko’?Shishika jila yakuchinema unahichi.Shinganyeka havyuma unalingi.Unapu nge ungamela wachihwevoUze ali nakuhitangana chamuhitanganyina mujijila jenyi.
24 Unapu nge uchimbulu uze ejilila kutwama mupambo,Uze ali nakuhwimasana mwomwo yapeha.*Iyaze mwahasa kumutembula nge ali hachiheho?Vaze vali nakumutondatonda kanda navalishinako,Navamuwana nge lwola lwenyi* lwachiheho lunahete.
25 Kanda nautambuka mahinjihinjiko,Kanda naufwa nalipwilako.Oloze ove wambile ngwove, ‘Ovyo vyamokomoko.+Ngunafu chikuma hazangi namalunga veka,*+Nanguvakava lika.’+
26 Vaze vakuzuvo yaIsalele vanavevwisa sonyiHohamwe navamyangana javo, navilolo javo,Navapilishitu javo, navapolofweto javo,+Ngana muze navevwisa sonyi mwiji uze vanakwate.
27 Veji kwambanga kumutondo ngwavo, ‘Ove yove setu.’+Veji kwambanga kulilolwa ngwavo, ‘Ove yove watusemene.’Ami veji kungutalisanga nyima keshi mesoko.+Kahomu navamona lupi hinavamba kuli ami ngwavo,‘Katuka utulwile!’+
28 Nyi tulunga twenu mwalitengelele vali kulihi?+Valwezenu vakatuke tutale nge navamilwila kulupi lwenu.Enu vaYuta, tulunga twenu vanavulu chikuma nge jinganda jenu.+
29 ‘Ika muli nakulipikila lika nayami?Ika munalikangila kuli ami muvosena?’+ Omu mukiko mwanambe Yehova.
30 Vana venu ngunalishinyi tuhu kuvaveta.+Kaveshi nakwitavila kuvazangamisako.+Jipoko jenu jamikwale jajihile vapolofweto jenu+Kwijiva nge ndumba wautenu.
31 Enu vatu vamuchisemunwino echi, hunananenu mazu aYehova.Kutala ngunapu nge ngupambo kuli vaIsalele,Chipwe nge ngulifuchi lyamilima wi tahi?Uno ava vatu jami vanambila ika ngwavo, ‘Tuli nakulitambukila kwetu kanawa,Katweshi kukinduluka kuli ove chekako’?+
32 Kutala mwanapwevo nahase kuvulyama vimbilingwa vyenyi numba?Kutala mwenga nahase kuvulyama muhya wenyi wamutulo* nyi?Oloze vatu jami vananguvulyama hamakumbi amavulu.+
33 Ove pwevo, unalunguluka chikuma hakutondatonda malunga vakuzange.Unalinangula kulinga vilinga vyakuhuka.+
34 Uvwalo wove uli namanyinga avatu vakuhutwa, vakuzeneka mulonga.+Numba tuhu kangwavawanyine vali nakutuva zuvo nakwivako,Oloze manyinga avo ngunawawane hauvwalo wove wosena.+
35 Jino ove uli nakwamba ngwove, ‘Kangweshi namulongako.Utenu wenyi unapeuka hali ami.’Oloze tala, nangukusopesaMwomwo uli nakwamba ngwove, ‘Kangwalingile shiliko.’
36 Ika weji kumwenanga vilinga vyove vyavipi nge vyamwaza?Ejipitu mwakakwivwisa sonyi+Nganomu akwivwishile Asulya sonyi.+
37 Shikaho naukaya oku unalikwate mbimbya-mutwe+Mwomwo Yehova nakane vaze wafwelela.Kaveshi kukakulingisa ukafukileko.”
Kwinyikila Chamwishi
^ Chipwe “nakwanuka zangi yakwilila.”
^ Chipwe “vanalitotela.” Pamo mashima amumalolwa.
^ Chipwe “vamuMemefwise.”
^ Hepe., “vali nakukulya mumbambamutwe.”
^ Ikiye mwanaKalwiji Nyile.
^ Chipwe “yapeha yamwono wenyi.”
^ Hepe., “nge ngonde yenyi.”
^ Chipwe “natulunga veka.”
^ Chipwe “muhya wenyi wakuvwala halikumbi lyakumumbata.”
