Yelemiya 22:1-30
22 Yehova nambe ngwenyi: “Yako kuzuvo* yamwangana wavaYuta, ukambulule mujimbu uno
2 ngwove, ‘Ove mwangana wavaYuta, ove unatwame halitanda lyaNdavichi, navangamba jove, navatu jove ava vali nakwingililanga muvikolo evi, ivwenu mazu nahanjika Yehova.
3 Yehova nambe ngwenyi: “Lingenunga mwachiyulo, mwakwoloka. Pulululenunga vatu vaze vanapupu kuli vaka-kulyapula. Kanda namuyanjisanga vamwizako. Kanda namuyanjisanga vana vakuzeneka masevo* navatuliweko.+ Kanda namumwanganga manyinga avatu vakuzeneka mulonga muchihela chinoko.+
4 Kachi nge namulamanga mazu ngunamilweze, kaha vamyangana vaze vanatwame halitanda lyaNdavichi+ navakengila muvikolo vyazuvo yino oku vali nakutambukila mumatemba nahatuvalu. Navakengila hamwe navangamba javo navatu javo.”’+
5 “Yehova nambe ngwenyi, ‘Oloze kachi nge kamweshi kwononoka mazu awako, kaha ngunalishingi ami ivene ngwami, zuvo yino navakayinongesa.’+
6 “Yehova nahanjika kutalisa kuzuvo yamwangana wavaYuta ngwenyi,‘Ove unapu nge Ngileyate kuli ami,Unapu nge uchihela chakulunduka chaLevanone.Oloze nangukakulingisa kupwa nge upambo.Mujinganda jove kamweshi kukatwama vatuko.+
7 Nangukakukatwila* vaka-kukunongesa,Navakeza mutu himutu navitwa vyenyi,+Kaha navakapakula mishitale yove yamwazaNakuyimbila mukakahya.+
8 “‘Vaka-mafuchi vavavulu vaze navakahichila kunganda yino navakalihulisa mwavomwavo ngwavo: “Mwomwo ika Yehova alingilile ngana kunganda yino yayinene?”+
9 Kaha navakalikumbulula ngwavo: “Mwomwo vasezele lushiko lwaYehova Kalunga kavo, valifukwilenga kutulunga veka nakuvazachila.”’+
10 Kanda naulila mutu uze nafuko,Kanda naumwivwila kekeko.Oloze lila chikuma mutu uze nayi muufunge,Mwomwo keshi kukakinduluka cheka mangana akamone lifuchi asemukilileko.
11 “Mwomwo Yehova nahanjika vyuma navisoloka kuli Shalume*+ mwanaYoshiya, mwangana wavaYuta uze nashishi ise Yoshiya,+ uze nafumu muchihela chino. Nambe ngwenyi, ‘Keshi kukakinduluka muchihela chinoko.
12 Mwomwo mwakafwila muufunge muze vanamutwale, kaha keshi kukamona cheka lifuchi linoko.’+
13 Lamba kuli mutu uze mwatunga zuvo yenyi chakuzeneka kulinga mwakwoloka,Uze mwatunga tupete twenyi vahelu chakuzeneka kulinga mwachiyulo,Uze mwazachisa mukwavo chawana,Nakukana kumufweta ndando yenyi.+
14 Lamba kuli mutu uze mwamba ngwenyi, ‘Nangutunga zuvo yayinene,Nangutunga zuvo yatupete vavanene vahelu.Nanguyihaka jinjanena,Nanguyala namishitale, nakuyikwita ulombo uchila.’
15 Kutala nauyulanga lika mwomwo unahambakana vakwenu kukuzachisa mishitale nyi?Iso naikiye nawa alile nakunwa,Oloze alingilenga mwachiyulo, mwakwoloka,+Kaha atwaminenga kanawa.
16 Ahakwililenga vaka-kukalikiza navaka-kuhutwa havihande vyavo,Ngocho vyuma vyapwile kanawa.Yehova nambe ngwenyi, ‘Omu mukiko chalumbunukila kungutachikiza.
17 Oloze ove unajiki kaha meso ove namuchima wove kukunganyala vyuma mulizangamina,Nakukumwanga manyinga avatu vakuzeneka mulonga,Nakukulyapula vatu nakuvonga.’
18 “Ngocho Yehova nahanjika vyuma navikasoloka kuli Yehoyakime+ mwanaYoshiya, mwangana wavaYuta ngwenyi,‘Kaveshi kukalishona hali ikiyeko ngwavo:“Mama lelo, ove ndumbwami walunga! Mama lelo, ove ndumbwami wapwevo!”Kaveshi kukalishona hali ikiyeko ngwavo:“Mama lelo, ove mwata! Mama lelo, ove wamulemu!”
19 Navakamufunda nge chimbulu,+Navakamukokangiza nakumulowela muvikolo vyaYelusalema,+Kaha navakamumbila kuweluka.’
20 Yako kuLevanone ukalilileko,Kaha kalilile kuMbashane nalizu lyakukanguka,Kalilile kuAvalime+Mwomwo tujila twove vosena vanavachiki chikichiki.+
21 Ngwakuhanjikilile omu walivwilenga nge uwakukingiwa.Oloze wambile ngwove, ‘Kangweshi kukwivwililako.’+Omu mukiko unalinginga kufuma vene kuunyike wove,Mwomwo unakanenga kwononoka mulizu lyami.+
22 Peho nayikapekumuna* tufunga twove vosena,+Tujila twove navakaya muufunge.Kaha ove naukevwa sonyi, naukasauka mwomwo yalupi naukamona.
23 Ove watwama muLevanone,+Ove watwama kanawa mumishitale,+Naukalikemenena mikemo omu nayikakuwana misongo,Naukalyonyinga* ngana mwapwevo uze ali nakusapuluka.”+
24 “Yehova nambe ngwenyi, ‘Omu ngwayoya tu, numba nge ove Konyiya*+ mwanaYehoyakime,+ mwangana wavaYuta wapwanga ukazeya kakatachikijilo kakulivoko lyami lyachilyo, kachi ngunakuzulu.
25 Nangukuhana mumavoko avaze vali nakusaka kukujiha, namumavoko avaze weji kwivwanga woma, namumavoko aNevukataneza* mwangana waMbavilone, namumavoko avaKalateya.+
26 Ove nanoko uze akusemene nangumitapwila kulifuchi lyeka lize mwazenekele kusemukila, kaha namukafwilako.
27 Kamweshi kukakinduluka kulifuchi lize mwasaka chikumako.*+
28 Uno ou lunga Konyiya napu nge ndeho yamokomoko yakupazuka nyi?Uno napu nge chitenga chize vanakane vatu nyi?Nyi ikaze ikiye navaka-tanga yenyi vanavatapwilaNakuvambila mulifuchi lize kavatachikizako?’+
29 Ove mavu,* ove mavu, ove mavu, ivwa mazu nahanjika Yehova.
30 Yehova nambe ngwenyi,‘Ou mutu musonekenu ngwenu keshi namwanako,Ngwenu keshi kukafukilako mukuyoya chenyi chosena,*Kaha nawa hali vaka-tanga yenyi kaheshi kukapwa umwe mwakahasaKutwama halitanda lyaNdavichi nakuyula cheka muYutako.’”+
Kwinyikila Chamwishi
^ Chipwe “kunganda.”
^ Chipwe “namuyanjisanga vanginga.”
^ Hepe., “Nangukakujilikila.”
^ Ikiye nawa Yehowahaze.
^ Hepe., “nayikafunga.”
^ Hepe., “Naukevwa misongo yakusema.”
^ Vamuvuluka nawa ngwavo Yehoyakine chipwe Yekonyiya.
^ Hepe., “aNevukataleza,” kusoneka chikwavo.
^ Chipwe “lize mweji kuzundwilanga myono yenuko.”
^ Chipwe “Ove lifuchi.”
^ Hepe., “mumakumbi enyi osena.”
