Yelemiya 23:1-40
23 Yehova nambe ngwenyi, “Lamba kuli tufunga vaze vali nakunongesa nakusanda mikoko vakuulilo wami.”+
2 Ngocho Yehova Kalunga kaIsalele nahanjika kutalisa kuli tufunga vaze vali nakufunga vatu jenyi ngwenyi: “Munasande mikoko jami, munavamwange. Kamwavahakile muchimako.”+
Yehova nambe ngwenyi, “Nangumizangamisa mwomwo yavilinga vyenu vyavipi.”
3 “Kufumaho, mikoko jami vaze vanasaleho nangukavakungulula kufuma kumafuchi osena kuze ngunavamwangila.+ Nangukavakindulwisa kuulilo wavo,+ kaha navakasema nakuvula chikuma.+
4 Nangukavatongwela tufunga vaze navakavafunganga kanawa.+ Kaveshi kukevwa cheka woma chipwe kulizuzukilako, kaha naumwe wauchi mwakajimbala.” Omu mukiko mwanambe Yehova.
5 Yehova nambe ngwenyi, “Talenu! Makumbi ali nakwiza omu nangukasokesa muketengo* wakwoloka+ wakuchisaka chaNdavichi. Mwangana mwakayulanga,+ kaha mwakapwa wakunangakana. Mwangana kana mwakayulanga mwachiyulo, mwakwoloka mulifuchi.+
6 Mumakumbi enyi, vaYuta navakavalwila,+ kaha vaIsalele navakatwamanga mukuunda.+ Navakamuvulukanga ngwavo: Yehova Ikiye Kwoloka Chetu.”+
7 “Yehova nambe ngwenyi, ‘Makumbi ali nakwiza omu vatu kana navakazeneka kwamba ngwavo: ‘Omu ayoya Yehova tu, ou alowele vaIsalele mulifuchi lyaEjipitu.’+
8 Oloze navakamba jino ngwavo: ‘Omu ayoya Yehova tu, ou alowele vaka-tanga yaIsalele mulifuchi lyakunote namumafuchi eka osena muze avamwangilile nakuvakindulwisa kulifuchi lyavo.’ Navakatwamanga mulifuchi lyavo.”+
9 Muchima wami unachikikaMwomwo yavava vapolofweto.Nguli nakwivwa namuvifuwa keke.Ngunapu nge ngumutu uze napende,Nge ngumutu uze nanu vinyo vyavivuluMwomwo yaYehova namazu enyi ajila.
10 Mulifuchi munazale vaka-ukoji.+Lifuchi lili nakulishona mwomwo yachangu,+Maulilo amupambo anomu chau mwomwo yachangu.+Vilinga vyavo vyapwa vyavipi, kaha veji kuzachisanga ngolo javo mwamupi.
11 Yehova nambe ngwenyi, “Vapolofweto navapilishitu vosena vanapihi.*+Ngunawane namuzuvo yami vali nakulingilamo vilinga vyakuhuka.”+
12 Yehova nambe ngwenyi: “Ngocho mujila yavo namusenena, kaha namupwa milima.+Navavashinjika, kaha navalimbuka.Nanguvanehela lupiHamwaka wakuvasopesa.
13 Ngunamono nawa vyuma vyaunyengwe vize vali nakulinga vapolofweto vamuSamaliya.+Upolofweto wavo uli nakufuma kuli Mbale,Kaha vali nakuhungumwisa vatu jami vaIsalele.
14 Ngunamono nawa vyuma vyakukomwesa vize vali nakulinga vapolofweto vamuYelusalema.Vali nakulinganga ujila+ nakwonga vatu,+Vali nakukundwizanga* vaka-kulinga mwamupi,Kavate kumbila vilinga vyavo vyakuhuka.Ami nguli nakuvamona nge hivatu vamuSotome.+Vatu vamunganda kana vanapu nge vatu vamuNgomola.”+
15 Ngocho Yehova wamayongomena nahanjika vyuma mwalinga kuli vapolofweto ngwenyi:“Nanguvalisa mwaji,Nanguvanwisa nawa meya ausungu,+Mwomwo vapolofweto vamuYelusalema vali nakutanjisa vilinga vyakulikanga mulifuchi lyosena.”
16 Yehova wamayongomena nambe ngwenyi:“Kanda namwivwilila vyuma navahanjika ava vapolofweto vali nakupolofweta kuli yenuko.+Vali nakumihungumwisa.*Vyakumwenesa vize vali nakumilweza vinapu vyakutaka mumichima yavo kaha,+Kavyafumine mukanwa kaYehovako.+
17 Vali nakulwezanga vaze vazeneka kunguvumbika ngwavo,‘Yehova nambe ngwenyi: “Namutwamanga mukuunda.”’+Vali nakulweza nawa vaze veji kulinganga mwaya michima yavo yakunjinjavala ngwavo,‘Kamweshi kumona lupiko.’+
18 Iyaze ali halizavu lyamasepa jaYehovaMangana amone mwaya mazu enyi nakuwevwa?Iyaze natengeleka matwitwi kumazu enyi mangana awevwe?
19 Talenu! Yehova mwahuhwisa peho yanyamanganda namatoto enyi.Nayihuhwila hamitwe yavaka-kuhuka kwijiva nge chijimbilanganga.+
20 Yehova keshi kutulisa utenu wenyikoPalanga nomu mwalinga vyuma najinyi mumuchima wenyi nakuvitesamo.Hamakumbi akukuminyina, namukatachikiza kanawa mwalumbunukila vyumevi.
21 Vapolofweto kana kangwavatumineko, oloze valahile nakuya.Kangwahanjikile navoko, oloze vapolofwetele.+
22 Oloze kachi nge vapwile halizavu lyamasepa jami,Kachi valwezele vatu jami mazu ami,Kaha nawa kachi vakafwile vatu jami vaseze jijila javo jajipi navilinga vyavo vyavipi.”+
23 Yehova nambe ngwenyi, “Uno ami ngwapwa nguKalunga uze atwama kaha hakamwihi numba? Uno kangwapwa nguKalunga uze atwama nawa kwakusukuko numba?”
24 Yehova nambe ngwenyi, “Kutala mutu nahase kuswama kuchihela chakuhengama kuze nanguzeneka kumumona numba?”+Yehova nambe ngwenyi, “Kutala kunahase kupwa chuma chimwe mwilu chipwe hamavu chize nanguhona kutachikiza numba?”+
25 “Ngunevu vapolofweto ava vali nakupolofweta vyuma vyamakuli mulijina lyami ngwavo, ‘Ngunaloto chilota. Ngunaloto chilota.’+
26 Uno ava vapolofweto navapolofwetanga lika vyuma vyamakuli palanga nakumwaka uka? Vapwa hivapolofweto vaze veji kutakanga vyuma vyamakuli mumichima yavo.+
27 Veji kulilwezanga vilota mwavomwavo mangana valingise vatu jami vavulyame lijina lyami nganomu masevo vavulyamine lijina lyami mwomwo yaMbale.+
28 Vapolofweto vaze vanaloto vilota vambulule tuhu vilota kana, oloze vapolofweto vaze vanevu mazu ami vahanjike mazu ami mwamuchano.”
Yehova nambe ngwenyi, “Uno visachi vyatiliku vyalifwanyina halihi natiliku yivene?”
29 Yehova nambe ngwenyi, “Mazu ami anapu nge kakahya,+ anapu nge muveto uze weji kupazulanga malolwa.”+
30 Ngocho Yehova nambe ngwenyi, “Ngunemanyina vapolofweto nakole, ava vali nakwiva mazu ami kuli vakwavo.”+
31 Yehova nambe ngwenyi, “Ngunemanyina vapolofweto nakole, ava vali nakuhanjika natunwa twavo ngwavo, ‘Kalunga nambe ngwenyi!’”+
32 Yehova nambe ngwenyi, “Ngunemanyina vapolofweto nakole, ava vali nakulota vilota vyamakuli nakuvyambulula nakulingisa jino vatu jami vahungumuke mwomwo yamakuli avo nakulitukwojola chavo.”+
Yehova nambe ngwenyi, “Vapolofweto kana ami kangwavatumine chipwe kuvalweza kulinga chuma numba chimweko. Ngocho kaveshi kunganyalisa ava vatu numba hahandendeko.”+
33 “Kachi nge mutu umwe hali ava vatu, chipwe kapolofweto, chipwe kapilishitu mwakuhulisa ngwenyi, ‘Chiteli* chaYehova chika?’ Ove vakumbulule ngwove, ‘Yehova nambe ngwenyi, “Enu yenu munapu chiteli kuli ami. Kaha nangumimbila. “’+
34 Weshowo kapolofweto, chipwe kapilishitu, chipwe mutu umwe hali ava vatu mwamba ngwenyi, ‘Echi chikiko chiteli* chaYehova,’ mutu kana nangumuzangamisa hohamwe navaze vakuzuvo yenyi.
35 Mutu himutu hali enu ali nakwihula mukwavo, ali nakwihula nawa ndumbwenyi ngwenyi, ‘Yehova nakumbulula ngwenyi ngachilihi? Yehova nahanjika ngwenyi ika?’
36 Oloze kanda namuvuluka cheka chiteli* chaYehovako mwomwo chiteli* nachipwa jino mazu aze mwahanjika mutu himutu, kaha enu nawa munalumuna mazu aKalunga ou ayoya, Yehova wamayongomena, Kalunga ketu.
37 “Ove ihula kapolofweto kana ngwove, ‘Yehova nakukumbulula ngwenyi ngachilihi? Yehova nahanjika ngwenyi ika?
38 Oloze kachi nge namwambanga lika ngwenu, “Chiteli* chaYehova,” kahanyi Yehova nambe ngwenyi: “Hakuwana nge muli nakwamba ngwenu, ‘Awa mazu akiko anapu chiteli* chaYehova,’ okunyi ngunamikande lyehi ngwami, ‘Kanda namwamba ngwenu: “Chiteli* chaYehovako,”’
39 kaha nangukamizundula nakumimbila mangana mukafume kumeso ami. Nangukamimbilila kumwe nanganda yize ngwamihanyine enu navakakuluka jenu.
40 Nangukamivwisa sonyi haya myaka yosena. Nangukaminyisa nawa haya myaka yosena, kaha kwinyisa kana kaveshi kukachivulyamako.”’”+
Kwinyikila Chamwishi
^ Chipwe “nangukakatula swana.”
^ Chipwe “vanalikange.”
^ Hepe., “Vali nakukolezezanga mavoko.”
^ Chipwe “Vali nakumilingisa mufwelele vyuma vyamokomoko.”
^ Chipwe “Mujimbu wakulemuwisa.” Lizu lyachiHepeleu vazachisa hano lyatwama naulumbunwiso uvali: “mujimbu waulemu waKalunga” chipwe “chuma chakulemuwisa.”
^ Chipwe “Ou ukiko mujimbu wakulemuwisa.”
^ Chipwe “mujimbu wakulemuwisa.”
^ Chipwe “mwomwo mujimbu wakulemuwisa.”
^ Chipwe “Mujimbu wakulemuwisa.”
^ Chipwe “unapu mujimbu wakulemuwisa.”
^ Chipwe “Mujimbu wakulemuwisa.”
