Yelemiya 25:1-38
25 Yelemiya atambwile mazu kutalisa kuli vaYuta vosena mumwaka wamuchiwana wachiyulo chaYehoyakime+ mwanaYoshiya, mwangana wavaYuta. Mwaka kana ukiko wapwile wakulivanga wachiyulo chaNevukataneza* mwangana waMbavilone.
2 Awa akiko mazu ahanjikile kapolofweto Yelemiya kutalisa kuli vaYuta vosena navatu vamuYelusalema vosena:
3 “Kufuma vene mumwaka wakusokesa 13 wachiyulo chaYoshiya+ mwanaAmone, mwangana wavaYuta palanga nakulelo lino, myaka yoseneyi 23 yinahichimo, Yehova nahanjikanga nayami. Kahami ngunapunga nakuhanjika kuli enu mapapa kakavulu,* oloze enu munakanenga kwivwilila.+
4 Yehova namituminanga vangamba jenyi, vapolofweto vosena. Namituminangavo mapapa kakavulu,* oloze enu munakanenga kwivwilila, munakanenga kutengeleka matwitwi enu mangana mwivwenga.+
5 Vanapunga nakumilweza ngwavo, ‘Sezenu jijila jenu jajipi navilinga vyenu vyavipi,+ kaha namutwamanga myaka yayivulu mulifuchi lino Yehova amihanyine enu navakakuluka jenu kushikulu.
6 Kanda namulemesa tulunga veka, chipwe kuvazachila, chipwe kulifukula kuli vakiko nakungwivwisa jino kupihya navyuma munatenge namavoko enuko. Nge namulinga ngocho, kaha nanguminehela lupi.’
7 “Yehova nambe ngwenyi, ‘Enu kamwangwivwilililengako. Mwangwivwishile kupihya navyuma mwatengele namavoko enu, nakulikokela jino lupi.’+
8 “Ngocho Yehova wamayongomena nambe ngwenyi, ‘“Hakuwana nge kamwevwililile mulizu lyamiko,
9 nangumisanyikila jitanga jakunote josena.”+ Omu mukiko mwanambe Yehova. “Nangumisanyikila nawa ngamba yami Nevukataneza* mwangana waMbavilone,+ kaha ikiye najitanga kana navanyemukila lifuchi lino+ nayenu mwatwamamo, navaka-mafuchi vosena ava vanamijingilika.+ Nanguminongesela kumwe navakiko, kaha namulingisa vatu valikomokele nakulihaha. Nanguminongesa ndolokoto.
10 Nanguholesa vyema vyakulisamba, navyema vyakuwahilila,+ navyema vyamwenyamwenga, navyema vyamwenga,+ navyema vyakucheka unga. Nangujima nawa manongo.
11 Lifuchi lino lyosena nalinonga nakusala malala, kaha nalikomwesa vatu. Ava vaka-mafuchi navakazachilanga mwangana waMbavilone hamyaka 70.”’+
12 “Yehova nambe ngwenyi: ‘Oloze omu nayikakuma yize myaka 70,+ nangukasopesa* mwangana waMbavilone navatu vamulifuchi kana hakuhenga chavo.+ Kaha nangukalingisa lifuchi lyavaKalateya kupwa ngundu haya myaka yosena.+
13 Nangukazangamisa lifuchi kana nge kutesa namazu ngwahanjikile osena, nge kutesa navyuma vyosena vasoneka mumukanda uno vize apolofwetele Yelemiya ngwenyi navikasolokela vaka-mafuchi osena.
14 Vaka-mafuchi vavavulu navamyangana vavanene+ navakatenga vatu jami kupwa vangamba,+ kaha nangukashishishilamo vaka-mafuchi kana kweseka navilinga vyavo namilimo yamavoko avo.’”+
15 Yehova Kalunga kaIsalele ambile kuli ami ngwenyi: “Tambula lupasa lwavinyo vyautenu wami, elu luli mulivoko lyami, kaha yako uluhane vaka-mafuchi osena vaze nangukutumako mangana valunwe.
16 Navalunwa, kaha navapelyangila nakupwa nge vaka-kuzaluka mwomwo yapoko yamukwale nanguvatumina.”+
17 Ngocho ngwatambwile luze lupasa mulivoko lyaYehova, kaha ngwaluhanyine vaka-mafuchi osena vaze angutumineko Yehova mangana valunwe.+
18 Ngwaputukile kuluhana vatu vamuYelusalema, navatu vamujinganda jamuYuta,+ navamyangana jalyo, navilolo jalyo, mangana vanonge, nakupwa vakwangula, nakulingisa vatu valikomokele, nakulihaha.+ Vyumevi kalinwomu visoloke.
19 Kufumaho ngwaluhanyine Fwalo mwangana waEjipitu, navangamba jenyi, navilolo jenyi, navatu jenyi vosena,+
20 navatu veka naveka vosena vaze vatwaminenga navo, navamyangana vamulifuchi lyaUze vosena, navamyangana vamulifuchi lyavaFwilishite vosena,+ Ashakelone,+ naNgaza, naEkelone, navaze vasalile muAshatote.
21 Ngwaluhanyine nawa vaEtome,+ navaMowave,+ navaAmone,+
22 navamyangana jaTule vosena, navamyangana jaShitone+ vosena, navamyangana vahalitungu lyahakalungalwiji,
23 navatu vamuNdetane,+ navatu vamuTema, navatu vamuMbuze, navosena vaze vatewilenga mavinji awevu wavo,+
24 navamyangana javaAlavya+ vosena, navamyangana javatu veka naveka vosena vaze vatwaminenga mupambo,
25 navamyangana vakuJimili vosena, navamyangana vakuElame+ vosena, navamyangana javaMete vosena,+
26 navamyangana vakunote vosena vaze vapwile hakamwihi navaze vapwile kwakusuku, umwe naumwe, namawangana eka ahamavu osena. Kaha mwangana waSheshake*+ ikiye wamakumishilo kulunwa.
27 “Valweze ngwove, ‘Yehova wamayongomena, Kalunga kaIsalele nambe ngwenyi: “Nwenu mupende nakusaza, mulimbuke nakuhona kukatuka+ mwomwo yapoko yamukwale yize nangumitumina.”’
28 Oloze kachi nge navakana kutambula lupasa elu luli mulivoko lyove nakulunwa, kaha uvalweze ngwove, ‘Yehova wamayongomena nambe ngwenyi: “Kuvanga mulunwe.
29 Mwomwo talenu! Kachi nge nganda yize vavulukila lijina lyami nanguyinehela lupi,+ kahenu nguhone kumizangamisa nyi?”’+
“Yehova wamayongomena nambe ngwenyi, ‘Nayenu nangumizangamisa mwomwo nanguneha poko yamukwale hali vatu vahamavu vosena.’
30 “Polofweta mazu osenawa kuli vakiko, uvalweza ngwove,‘Yehova ali helu, kaha mwatahwoka nge ndumba,Lizu lyenyi nalivwakanyina kuchihela chenyi chajila atwama.Mwatahwokela chihela chenyi atwama.Mwalikuwa ngana mwavatu vaze vali nakulyatangila muchikamwino chavinyo,Mwemba mwaso wakulisamba hakufungulula vosena vaze vatwama hamavu.’
31 Yehova nambe ngwenyi, ‘Vyema navivwakana mbwe nakusongosongo yamavu,Mwomwo Yehova ali nachihande navaka-mafuchi.Kaha ikiye mwasopesa vatu vosena,*+Mwajiha vaka-kuhuka napoko yamukwale.’
32 Yehova wamayongomena nambe ngwenyi:‘Talenu! Lupi luli nakutanda kufuma kulifuchi limwe nakuya kulifuchi likwavo,+Peho yanyamanganda nayihuhwa kufuma kusongosongo yamavu.+
33 “‘Vatu vaze mwakajiha Yehova halikumbi kana navakalumbama kufuma kusongo yimwe yamavu mbwe nakusongo yikwavo. Kaveshi kukavalila, chipwe kuvakungulula, chipwe kuvafundako. Navakapwa wilo hamavu.’
34 Enu tufunga, lilenu jimbimbi nakuteta miteto!Enu vatu vavalemu vahautanga, lyalangenu hamavu,Mwomwo lwola lwakumijiha nakumimwanga luneza,Namuholokela hamavu nakuchikika nge mulondo wauma wandando yayinene.
35 Tufunga kaveshi nachihela chakuchinyinako,Vatu vavalemu vahautanga navakiko kaveshi kuhasa kuchinako.
36 Ivwenu miteto yatufungaNajimbimbi javatu vavalemu vahautanga,Mwomwo Yehova ali nakwenyeka ulilo wavo.
37 Kuvihela kuze kwapwilenga kuunda kakweshi chuma chakuyoya numba chimwekoMwomwo yautenu waYehova.
38 Naseze liuku lyenyi kwijiva nge mwevu wandumba,+Lifuchi lyavo lili nakukomwesa vatuMwomwo yapoko yamukwale yakuvambuka,Mwomwo yautenu wenyi.”
Kwinyikila Chamwishi
^ Hepe., “chaNevukataleza,” kusoneka chikwavo.
^ Hepe., “ngunahindukanga chimenemene nakuhanjika kuli enu.”
^ Hepe., “Ngunahindukanga chimenemene nakuvatuma kuli enu.”
^ Hepe., “Nevukataleza,” kusoneka chikwavo.
^ Chipwe “nangukazangamisa.”
^ Chasoloka nge eli hilijina lyakusweka lyaMbavele (Mbavilone).
^ Hepe., “vakwechi mijimba vosena.”
