Yelemiya 26:1-24
26 Kumaputukilo achiyulo chaYehoyakime+ mwanaYoshiya, mwangana wavaYuta, Yehova ahanjikile mazu ano ngwenyi:
2 “Yehova nambe ngwenyi, ‘Imana muchipango chazuvo yaYehova, uhanjike hali* vatu vamujinganda jaYuta vosena vaze vali nakwiza kuzuvo yaYehova nakumulemesa.* Valweze vyuma vyosena ngunakulweze, kanda nausezaho lizu numba limweko.
3 Pamo navevwilila nakuseza jijila javo jajipi, kaha nangwalumuna vishinganyeka vyami ngwapwanga navyo vyakuvanehela lupi* mwomwo yavilinga vyavo vyavipi.+
4 Uvalweza ngwove: “Yehova nambe ngwenyi, ‘Kachi nge namukana kungwivwilila hakuzeneka kukavangiza jishimbi* jami jize ngunamihane,
5 kachi nge namukana kwivwilila mazu avangamba jami vapolofweto vaze nguli nakumitumina mapapa kakavulu,* vaze munakanenga kwivwilila,+
6 kaha nangulingisa zuvo yino yipwenga nge Shilo.+ Nangulingisa nawa nganda yino vayangulenga kuli vaka-mafuchi ahamavu vosena.’”’”+
7 Jino vapilishitu, navapolofweto, navatu vosena vapwile nakwivwilila omu Yelemiya apwile nakuhanjika mazu osena awa muzuvo yaYehova.+
8 Ngocho omu Yelemiya akumishile kulweza vatu vosena mazu aze amulwezele Yehova osena, vapilishitu, navapolofweto, navatu vosena vamukwachile. Vamwambile ngwavo: “Lelo naufwa.
9 Mwomwo ika unapolofwetela mulijina lyaYehova ngwove, ‘Zuvo yino nayipwa nge Shilo, kaha nawa nganda yino navayinongesa nakusala yamupolongwa, yakuzeneka vatu’?” Ngocho vatu vosena vajingilikile Yelemiya muzuvo yaYehova.
10 Omu vilolo javaYuta vevwile mazu awa, vafumine kuzuvo* yamwangana nakwiza kuzuvo yaYehova, vatwamine kuchikolo chachihya chazuvo yaYehova.+
11 Kaha vapilishitu navapolofweto vambile kuli vilolo navatu vosena ngwavo: “Ou mutu atela kufwa+ mwomwo napolofweta vyuma vyavipi navisolokela nganda yino nganomu munalivwila namatwitwi enu.”+
12 Jino Yelemiya ambile kuli vilolo vosena nakuli vatu vosena ngwenyi: “Yehova ikiye angutumanga ngupolofwete vyuma vyosena munevu vize navisolokela zuvo yino nanganda yino.+
13 Shikaho alumunenu jijila jenu navilinga vyenu, ononokenu mulizu lyaYehova Kalunga kenu, kaha Yehova mwalumuna vishinganyeka vyenyi apwanga navyo vyakuminehela lupi.*+
14 Oloze yami uno, nguli mumavoko enu. Ngulingenu mweshomwo munamono ngwenu mwamwaza kaha nawa mwakwoloka.
15 Jino tachikizenu ngwenu, kachi nge namungujiha, kaha mulonga wakumwanga manyinga amutu wakuzeneka mulonga naupwa hali enu, nahanganda yino, nahavatu vatwamamo, mwomwo chamuchano vene Yehova ikiye angutumanga kuli enu ngumilweze mazu osena awa munalivwila.”
16 Jino vilolo navatu vosena vambile kuli vapilishitu navapolofweto ngwavo: “Ou mutu katela kufwako mwomwo nahanjika kuli etu mulijina lyaYehova Kalunga ketu.”
17 Kaha nawa vakulwane vamwe vamulifuchi vakatukile, vambile kuli vatu vosena vakungulukile ngwavo:
18 “Mika+ wakuMoleshete apwile nakupolofweta hamakumbi aHezekiya+ mwangana wavaYuta, kaha ambile kuli vaYuta vosena ngwenyi, ‘Yehova wamayongomena nambe ngwenyi:“Zeyone navakayilima nge wande,Yelusalema nayikapwa malala,+Kaha pili yaZuvo* yaKalunga nayikapwa nge vihela vyakulunduka vyamuchipapa.”’*+
19 “Kutala Hezekiya mwangana wavaYuta navaYuta vosena vamujihile numba? Uno kevwile Yehova woma nakulembelela Yehova avevwile uselewako numba? Kutala Yehova kalumwine vishinganyeka apwile navyo vyakuvanehela lupi luze ahanjikileko* numba?+ Shikaho natulikokela lupi lwalunene.
20 “Kwapwile nawa lunga mukwavo uze apwile nakupolofweta mulijina lyaYehova. Lunga kana apwile ikiye Uliya mwanaShemaya wakuKilyate-yeyalime.+ Apolofwetele vyuma vyavipi navikasolokela nganda yino nalifuchi lino nganomu ali nakuhanjika Yelemiya.
21 Omu Mwangana Yehoyakime,+ navindume jenyi vosena, navilolo jenyi vosena vevwile mazu kana, mwangana ajinyine kumujiha.+ Oloze omu Uliya evwile chuma kana, hahaze vene evwile woma, kaha achinyinyine kuEjipitu.
22 Jino Mwangana Yehoyakime atumine Elenatane+ mwanaAkavole namalunga veka vakasake Uliya kuEjipitu.
23 Kaha vakasakile Uliya kuEjipitu, vamutwalile kuli Mwangana Yehoyakime. Ngocho mwangana amujihile napoko yamukwale,+ kaha mujimba wenyi aumbilile hafuka yavatu vamokomoko.”
24 Oloze Ahikame+ mwanaShafwane+ ahakwilile Yelemiya, kaha kavamuhanyine kuvatu vamujiheko.+
Kwinyikila Chamwishi
^ Chipwe “uhanjike kuli.”
^ Chipwe “nakulifukula kuli ikiye.”
^ Chipwe “kaha nangwivwa kupihya halupi ngwasakanga kuvanehela.”
^ Chipwe “jindongi.”
^ Hepe., “nguli nakuhindukanga chimenemene nakuvatuma kuli enu.”
^ Chipwe “kunganda.”
^ Chipwe “mwevwa kupihya halupi asakanga kuminehela.”
^ Chipwe “pili yatembele.”
^ Chipwe “nge chihela chakulunduka chamitondo.”
^ Chipwe “kevwile kupihya halupi ahanjikile luze asakile kuvanehelako.”
