Yelemiya 27:1-22
27 Kumaputukilo achiyulo chaYehoyakime mwanaYoshiya, mwangana wavaYuta, Yehova alwezele Yelemiya akahanjike mazu awa ngwenyi:
2 “Yehova nambe kuli ami ngwenyi, ‘Lihosele mikole nakulisongela jitoka, kaha lihakejo hashingo.
3 Kaha jihane valuwa vaze vaneza kuYelusalema kuli Zetekiya mwangana wavaYuta mangana vajitwale kuli mwangana waEtome,+ namwangana waMowave,+ namwangana wavaAmone,+ namwangana waTule,+ namwangana waShitone.+
4 Vambulile mazu navakalweza vamyata javo. Vambulile ngwove:
“‘“Yehova wamayongomena, Kalunga kaIsalele nambe ngwenyi, kalwezenu vamyata jenu ngwenu,
5 ‘Ami yami ngwatengele mavu, navatu, natunyama vaze vali hamavu. Ngwavitengele nangolo jami, nalivoko lyami lyangolo. Kaha mavu ngunawahane kuli weshowo ngunasake.*+
6 Ngocho mafuchi osena awa ngunawahane mulivoko lyangamba yami Nevukataneza+ mwangana waMbavilone. Ngunamuhane navisuma vamuchipapa mangana vamuzachilenga.
7 Vaka-mafuchi vosena navamuzachilanga ikiye, navana venyi, navazukulu jenyi palanga nomu naukakuma wangana wenyi,+ omu vaka-mafuchi vavavulu navamyangana vavanene navakamutenga kupwa ndungo.’+
8 “‘“Yehova nambe ngwenyi, ‘Weshowo wangana chipwe vaka-lifuchi vaze navakana kuzachila Nevukataneza mwangana waMbavilone, vaze navakana kuhaka jishingo javo mutoka yamwangana waMbavilone, nanguvazangamisa napoko yamukwale,+ nazala yakalombolombo, namusongo wachihita palanga nomu nangukavanongesa vosena kuhichila muli Nevukataneza.’
9 “‘“‘Shikaho kanda namwivwilila vapolofweto jenu, navaka-kutaha, navaka-kulota vilota, navaka-kulinga visava, navaka-kupanda vaze vali nakumilweza ngwavo: “Kamweshi kuzachila mwangana waMbaviloneko.”
10 Vali nakumilweza upolofweto wamakuli mangana vamiyise kwakusuku nalifuchi lyenu. Nangumisanda, kaha namunonga.
11 “‘“Oloze Yehova nambe ngwenyi, ‘Veshovo vaka-lifuchi navahaka jishingo javo mutoka yamwangana waMbavilone nakumuzachila, nanguvetavisa vakapwenga lika* mulifuchi lyavo. Kaha navalimangamo nakutwamamo.’”’”
12 Zetekiya+ mwangana wavaYuta ngwamulwezele mazu wowamwe ngwami: “Hakenu jishingo jenu mutoka yamwangana waMbavilone, mumuzachile ikiye navatu jenyi, kaha namuyoyanga lika.+
13 Ikaze ove navatu jove namufwila kupoko yamukwale,+ nakuzala yakalombolombo,+ nakumusongo wachihita+ nge kutesa namazu nahanjika Yehova kutalisa kuli vaka-lifuchi vaze navakana kuzachila mwangana waMbavilone?
14 Kanda namwivwilila vapolofweto vaze vali nakumilweza ngwavo, ‘Kamweshi kuzachila mwangana waMbaviloneko,’+ mwomwo vali nakumilweza upolofweto wamakuli.+
15 “Yehova nambe ngwenyi, ‘Vapolofweto kana kangwavatumineko, oloze vali nakupolofweta vyuma vyamakuli mulijina lyami. Ngocho navamilingisa ngumisande, kaha namunongela kumwe navapolofweto vaze vali nakupolofweta kuli enu.’”+
16 Jino ngwambile kuli vapilishitu navatu vosena ngwami: “Yehova nambe ngwenyi, ‘Kanda namwivwilila vapolofweto vaze vali nakupolofweta kuli enu ngwavo: “Ivwenu! Vinoma vyamuzuvo yaYehova kalinwomu vavikindulwise kufuma kuMbavilone.”+ Vapolofweto kana vali nakumilweza upolofweto wamakuli.+
17 Kanda namuvevwililako. Enu zachilenu mwangana waMbavilone, kaha namuyoyanga lika.+ Ikaze namulingishila nganda yino yipwenga ngundu?
18 Oloze kachi nge hivapolofweto vamwenemwene kaha nawa vali nakuhanjika mazu akufuma kuli Yehova, kaha vechenu valembelele Yehova wamayongomena mangana vinoma vize vinasale muzuvo yaYehova, namuzuvo* yamwangana wavaYuta, namuYelusalema vazeneke kuvitwala kuMbavilone.’
19 “Mwomwo Yehova wamayongomena nahanjika mazu kutalisa kujipanda,+ naLimbashiya,*+ namatemba,+ navinoma vize vinasale munganda yino,
20 vize asezele Nevukataneza mwangana waMbavilone omu ambachile Yekonyiya mwanaYehoyakime, mwangana wavaYuta hohamwe navatu vavalemu vamuYuta namuYelusalema vosena nakuvatwala muufunge kuMbavilone kufuma kuYelusalema.+
21 Yehova wamayongomena, Kalunga kaIsalele nahanjika kutalisa kuvinoma vize vinasale muzuvo yaYehova, namuzuvo* yamwangana wavaYuta, namuYelusalema ngwenyi:
22 ‘“Navavitwala kuMbavilone,+ kaha navikatwamanga lika kuze palanga nakulikumbi lize nangukavyanuka. Ngocho nangukavikindulwisa nakuvihaka cheka muchihela chino.”’ Omu mukiko mwanambe Yehova.”+
Kwinyikila Chamwishi
^ Hepe., “weshowo ngunamono ngwami natemo kumeso ami.”
^ Hepe., “vakanokenga.”
^ Chipwe “namunganda.”
^ Kulumbununa, Limbashiya lyaunengu lyahatembele.
^ Chipwe “namunganda.”
