Yelemiya 28:1-17
-
Yelemiya nakapolofweto wamakuli Hananyiya (1-17)
28 Mumwaka vene uze, kumaputukilo achiyulo chaZetekiya+ mwangana wavaYuta, mumwaka wamuchiwana, mukakweji wamuchitanu, kapolofweto Hananyiya mwanaAzule wakuNgiveyone+ ambile kuli ami muzuvo yaYehova kumeso avapilishitu navatu vosena ngwenyi:
2 “Yehova wamayongomena, Kalunga kaIsalele nambe ngwenyi, ‘Nanguhokola toka yamwangana waMbavilone.+
3 Shimbu kanda myaka* yivali yikume, vinoma vyosena vyamuzuvo yaYehova vize ambachile Nevukataneza mwangana waMbavilone muchihela chino nakuvitwala kuMbavilone, nanguvikindulwisa muchihela chino.’”+
4 “Yehova nambe ngwenyi, ‘Yekonyiya+ mwanaYehoyakime,+ mwangana wavaYuta, navaYuta vosena vaze vanakwate ufunge muMbavilone+ nanguvakindulwisa muchihela chino, mwomwo nanguhokola toka yamwangana waMbavilone.’”
5 Jino kapolofweto Yelemiya ahanjikile kuli kapolofweto Hananyiya kumeso avapilishitu navatu vosena vaze vemanyine muzuvo yaYehova,
6 ambile ngwenyi: “Amene.* Yehova alinge chuma kana. Yehova atesemo mazu unapolofweta. Vinoma vyamuzuvo yaYehova navatu vaze vali muufunge vosena avafumise muMbavilone nakuvakindulwisa muchihela chino.
7 Oloze ivwilila vyuma nanguhanjika kuli ove nakuli vatu vosena ava.
8 Kushikulu, vapolofweto vaze vapwileko shimbu kanda ami nayove tupwengako, vapolofwetelenga ngwavo jijita, nalupi, namisongo yachihita navikeza hamafuchi amavulu nahamawangana amanene.
9 Shikaho kachi nge kapolofweto mwapolofweta ngwenyi nakupwa kuunda, kaha mazu enyi hinawatesamo, kapolofweto kana navamutachikiza ngwavo Yehova ikiye namutumu.”
10 Jino kapolofweto Hananyiya afumishile toka hashingo yakapolofweto Yelemiya, kaha ayihokwele.+
11 Kufumaho Hananyiya ahanjikile kumeso avatu vosena ngwenyi: “Yehova nambe ngwenyi, ‘Omu mukiko nanguhokola toka yaNevukataneza mwangana waMbavilone nakuyifumisa hajishingo javaka-mafuchi vosena shimbu kanda myaka yivali yikume.’”+ Kaha kapolofweto Yelemiya akatukile nakuya.
12 Omu kapolofweto Hananyiya alingile nahokola lyehi toka yize yapwile hashingo yakapolofweto Yelemiya nakuyifumisaho, Yehova ahanjikile kuli Yelemiya ngwenyi:
13 “Yako ulweze Hananyiya ngwove, ‘Yehova nambe ngwenyi: “Unahokola jitoka jamitondo,+ oloze nautenga jitoka jafwelu.”
14 Mwomwo Yehova wamayongomena, Kalunga kaIsalele nambe ngwenyi: “Nanguhaka jitoka jafwelu hajishingo javaka-mafuchi ava vosena mangana vazachilenga+ Nevukataneza mwangana waMbavilone. Kaha navamuzachilanga vene. Nangumuhana navisuma vamuchipapa.”’”+
15 Jino kapolofweto Yelemiya ambile kuli kapolofweto Hananyiya+ ngwenyi: “Ove Hananyiya, ivwilila! Yehova kakutumineko, oloze unalingisa ava vatu vafwelele vyuma vyamakuli.+
16 Shikaho Yehova nambe ngwenyi, ‘Tala! Nangukujiha ufume hamavu. Naufwa mwaka vene uno, mwomwo unalingisa vatu valikange kuli Yehova.’”+
17 Ngocho kapolofweto Hananyiya afwile mumwaka vene uze, mukakweji wakusokesa 7.
