Yelemiya 29:1-32
29 Omu kapolofweto Yelemiya apwile muYelusalema, atumine mukanda kuli vakulwane javaze vatwalile muufunge, nakuli vapilishitu, nakuli vapolofweto, nakuli vatu vosena vaze Nevukataneza ambachile kuYelusalema nakuvatwala muufunge kuMbavilone.
2 Atumine mukanda kana omu Mwangana Yekonyiya,+ nanaye yamwangana,+ navilolo, navamyata vamuYuta namuYelusalema, navitotombwe, navafuli* valingile vanafumu lyehi muYelusalema.+
3 Mukanda kana auhanyine kuli Elasa mwanaShafwane+ naNgemaliya mwanaHilikiya, vaze atumine Zetekiya+ mwangana wavaYuta kuMbavilone kuli Nevukataneza mwangana waMbavilone. Wambile ngwawo:
4 “Yehova wamayongomena, Kalunga kaIsalele nahanjika kuli vatu vosena vaze vali muufunge, vaze nafumisa kuYelusalema nakutwala muufunge kuMbavilone ngwenyi,
5 ‘Tungenu jizuvo nakutwamamo. Tumbenu mitondo mumilemba nakulya mihako yayo.
6 Mbatenu mapwevo nakusema vana vamalunga navava vamapwevo. Mbachilenu vana venu vamalunga mapwevo nakuhangisa nawa vana venu vamapwevo mangana navakiko vaseme vana vamalunga navava vamapwevo. Okwo muli vulenu, kanda namutepulukako.
7 Tondenunga kuunda changanda yize ngunamitwaleko muufunge. Yilombelenuko kuli Yehova, mwomwo kachi nge nganda kana nayipwa mukuunda, kaha nayenu namutwama mukuunda.+
8 Yehova wamayongomena, Kalunga kaIsalele nambe ngwenyi: “Kanda namwechelela vapolofweto jenu navaka-kutaha vaze vali muli enu vamyongeko.+ Kanda namwivwilila kuvilota vali nakulotako.
9 Mwomwo Yehova nambe ngwenyi, ‘Vali nakupolofweta vyuma vyamakuli mulijina lyami. Ami kangwavatumineko.’”’”+
10 “Yehova nambe ngwenyi, ‘Omu nayikakuma myaka 70 yakutwama muMbavilone, nangukamyalakana.+ Nangukatesamo lushiko lwami nakumikindulwisa muchihela chino.’+
11 “Yehova nambe ngwenyi, ‘Ngunatachikiza vyuma nguli nakushinganyeka hali enu. Nguli nakushinganyeka kumitwamisa mukuunda, keshi kuminehela lupiko,+ mangana mukayoye kanawa kulutwe nakupwa nalutalililo.+
12 Namukangusanyika, kaha namukeza nakulomba kuli ami, kahami nangukamivwilila.’+
13 “‘Namukangutondatondanga, kaha namukanguwana,+ mwomwo namukangutondatonda namichima yenu yosena.+
14 Nangukalisolola kuli enu mangana mukanguwane.’+ Omu mukiko mwanambe Yehova. Yehova nambe ngwenyi, ‘Nangukakungulula vafunge jenu, kaha nangukamikungulula kufuma kumafuchi osena nakuvihela kuze ngunamimwangila.+ Nangukamikindulwisa kuchihela ngwamifumishile nakumitwala muufunge.’+
15 “Oloze enu muli nakwamba ngwenu, ‘Yehova natuhane vapolofweto muMbavilone.’
16 “Yehova nahanjika kuli mwangana uze natwame halitanda lyaNdavichi+ nakuli vatu vosena vaze vanasale munganda yino, vandumbwenu vaze kavayile hamwe nayenu muufungeko ngwenyi,
17 ‘Yehova wamayongomena nambe ngwenyi: “Nanguvatumina poko yamukwale, nazala yakalombolombo, namusongo wachihita,+ kaha nanguvalingisa vapwenga nge jikuyu jakupola* jize kajatelemo kujilyako.”’+
18 “‘Nanguvahangasana napoko yamukwale,+ nazala yakalombolombo, namusongo wachihita, kaha nanguvalingisa vakomwese mawangana ahamavu osena.+ Navavangulanga, nakulingisa vatu vafwenga chishima hali vakiko, nakulihaha hali vakiko.+ Kaha navavatoleka kuli vaka-mafuchi osena kuze ngunavamwangila,+
19 mwomwo kavevwililile mazu ami aze ngunavatuminanga kuhichila muli vangamba jami vapolofwetoko, aze ngunavatuminanga mapapa kakavulu.’*+ Omu mukiko mwanambe Yehova.
“Yehova nambe ngwenyi, ‘Oloze enu kamwevwililileko.’+
20 “Shikaho, ivwenu mazu nahanjika Yehova, enu muli muufunge muvosena, enu ngunafumisa muYelusalema nakumitwala kuMbavilone.
21 Yehova wamayongomena, Kalunga kaIsalele nahanjika hali Ahave mwanaKolaya naZetekiya mwanaMaseya, vaze vali nakupolofweta vyuma vyamakuli mulijina lyami+ ngwenyi, ‘Nanguvahana mulivoko lyaNevukataneza* mwangana waMbavilone, kaha mwavajihila hameso enu.
22 Vyuma navisoloka kuli vakiko navikapwa changu chize vaYuta vosena vaze vali muufunge kuMbavilone navakahanjika hakwangula vakwavo ngwavo: “Yehova akulingise upwenga nge Zetekiya naAhave, vaze ochele mwangana waMbavilone hakakahya.”
23 Chuma kana nachisoloka mwomwo vanalingi vyuma vyakwivwisa sonyi muIsalele.+ Vanalingi ukoji namapwevo javakwavo, kaha nawa vanahanjika vyuma vyamakuli mulijina lyami vize kangwavatumineko.+
“‘Yehova nambe ngwenyi, “Ami yami ngunatachikiza, kaha ami yami chinjiho.”’”+
24 “Hanjika kuli Shemaya+ wakuNehelame ngwove,
25 ‘Yehova wamayongomena, Kalunga kaIsalele nambe ngwenyi: “Hakuwana nge unatumu mikanda mulijina lyove kuli vatu vosena muYelusalema, nakuli kapilishitu Zefwanyiya+ mwanaMaseya, nakuli vapilishitu vosena ngwove,
26 ‘Yehova nakutongola kupwa ukapilishitu wakushisa kapilishitu Yehoyata, mangana upwenga ukalama kuzuvo yaYehova, ukwatenga nawa weshowo mutu wakuzaluka uze mwalyonga kupwa kapolofweto, umuhake mujikuli, namupanda,+
27 ngocho ikaze unazenekela kutenukila Yelemiya wakuAnatote+ uze ali nakuhanjika kuli enu nge kapolofweto?+
28 Yelemiya atutuminanga mazu nayetu kuno kuMbavilone ngwenyi: “Kuchinasale myaka yayivulu. Shikaho, tungenu jizuvo nakutwamamo. Tumbenu mitondo mumilemba nakulya mihako yayo,+—”’”’”
29 Omu kapilishitu Zefwanyiya+ atangile ou mukanda kumeso akapolofweto Yelemiya,
30 Yehova ahanjikile kuli Yelemiya ngwenyi:
31 “Tuma mazu kuli vatu vosena vali muufunge ngwove, ‘Yehova nahanjika hali Shemaya wakuNehelame ngwenyi: “Hakuwana nge Shemaya napolofweta kuli enu okunyi ami kangwamutumineko, kaha namilingisa nawa mufwelele vyuma vyamakuli,+
32 ngocho Yehova nambe ngwenyi, ‘Nanguzangamisa Shemaya wakuNehelame navaka-tanga yenyi. Kakweshi muka-tanga yenyi umwe mwakayovoka hali ava vatuko, kaha keshi kukamona vyuma vyamwaza nangukalingila vatu jamiko, mwomwo nalingisa vatu valikange kuli Yehova.’ Omu mukiko mwanambe Yehova.”’”
Kwinyikila Chamwishi
^ Chipwe pamo, “navaka-kutunga jikembwe.”
^ Chipwe pamo, “jakupulika.”
^ Hepe., “ngunahindukanga chimenemene nakuwatuma kuli vakiko.”
^ Hepe., “lyaNevukataleza,” kusoneka chikwavo.
