Yelemiya 3:1-25
3 Vatu veji kwambanga ngwavo: “Kachi nge lunga mwalukulula pwevo lyenyi, kaha uze pwevo himwaya nakusomboka kuli lunga weka, uze lunga wakavanga keshi kuhasa kukambata cheka uze pwevoko.”Lifuchi kana linapihi chikuma.+Yehova nambe ngwenyi: “Unalingi ujila namalunga vavavulu,+Kahaze naukinduluka ngachilihi kuli ami?”
2 “Andula meso ove utale kujipili.Kulihi unazeneka kulisavalila namalunga?Unatwamenga kujijila nakuvandamina malungaKwijiva nge muka-kukimbwojoka* mupambo.Uli nakupihisa lifuchiNaujila wove navilinga vyove vyakuhuka.+
3 Shikaho ngunazenekela kunokesa vula,+Kakweshi vula yakukuminyinako.Unazunguma chikuma* ngana mwapwevo muka-ujila.Kaweshi kwivwa sonyiko.+
4 Oholyapwa uli nakungusanyika jino ngwove,‘Ove Tata, ove yove sepa lyami wahaukweze wami.+
5 Kutala chinapu chakutamo kungukwachila utenu haya myaka yosenaChipwe kungulamina koko nyi?’Omu mukiko uli nakuhanjika.Oloze uli nakulinga lika vyuma vyavipi unasake kulinga.”+
6 Hamakumbi aMwangana Yoshiya,+ Yehova ambile kuli ami ngwenyi: “‘Unamono vyuma nalingi ou Isalele wakuhona kushishika nyi? Nayinga hajipili jajisuku josena namwishi yamitondo yakujika mafwo yosena nakulinga ujila.+
7 Omu alingile vyuma kana, ami ngwamulwezelenga akinduluke kuli ami,+ oloze akanyine. Kaha Yuta nawa ejivile kumutala kaha ou ndumbwenyi muka-kumbembejeka.+
8 Kahomu ngwamwene chuma kana, ngwahangile Isalele wakuhona kushishika nakumusonekela mukanda wakumulukulula+ mwomwo yaukoji wenyi.+ Oloze ndumbwenyi Yuta muka-kumbembejeka kevwile womako. Naikiye ayile nakulinga ujila.+
9 Kamwenenga ujila alingilenga kupwa waupiko, kaha atwalileho lika kupihisa lifuchi nakulinga ujila namalolwa namitondo.+
10 Numba tuhu Yuta muka-kumbembejeka amwene vyuma vyasolokelele ndumbwenyi, oloze kakindulukile kuli ami namuchima wenyi wosenako. Alyongele kaha.’ Omu mukiko mwanambe Yehova.”
11 Jino Yehova ambile kuli ami ngwenyi: “Isalele wakuhona kushishika nasoloka kupwa wakwoloka kuhambakana Yuta muka-kumbembejeka.+
12 Yako ukavilike mazu ano kunote ngwove:+
“‘“Kinduluka ove Isalele wakuhungumuka.” Omu mukiko mwanambe Yehova.’+ ‘“Kangweshi kukutala nautenuko+ mwomwo ngwatwama nalikoji.” Omu mukiko mwanambe Yehova.’ ‘“Kangweshi kukukwachila utenu haya myaka yosenako.
13 Litavile kaha mulonga wove, mwomwo unalikange kuli Yehova Kalunga kove. Unalinginga ujila namalunga veka* mwishi yamitondo yakujika mafwo yosena, kaha kawevwililile mulizu lyamiko.” Omu mukiko mwanambe Yehova.’”
14 Yehova nambe ngwenyi: “Enu vana vakuhungumuka, kindulukenu. Ngunapu ngumwata wenu* chikupu. Nangumbata umwe munganda hinganda, vavali mutanga hitanga, nakumitwala kuZeyone.+
15 Nangumihana tufunga vaze navalinga mwaya muchima wami,+ vaze vakwechi chinyingi nakunangakana, ngocho navamilisanga kanawa.
16 Hamakumbi kana namukasema nakuvula mulifuchi.” Omu mukiko mwanambe Yehova.+ “Kaveshi kukamba chekako ngwavo, ‘Chikasha chalushiko lwaYehova.’ Kaveshi kukachivezuka mumichima yavo, chipwe kuchanuka, chipwe kuchishinganyekako. Kaha kaveshi kukachitunga chekako.
17 Hamakumbi kana navakavuluka Yelusalema ngwavo litanda lyaYehova.+ Vaka-mafuchi osena navakavakungulwila kuYelusalema+ mangana vakalise lijina lyaYehova. Kaveshi kukanjinjavala cheka nakukalinga mwaya michima yavo yayipiko.”
18 “Hamakumbi kana, vaze vakuzuvo yaYuta navaze vakuzuvo yaIsalele+ navakatambukanga hamwe. Navakafuma kulifuchi lyakunote nakwiza hamwe kulifuchi lize ngwahanyine vakakuluka javo kupwa uswana wavo.+
19 Ngwambile ngwami, ‘Ngwasakile kachi mutwame navana vami nakumihana lifuchi lyamwaza chikuma, uswana wamwaza chikuma uze vafwila vaka-mafuchi eka.’*+ Ngwashinganyekele ngwami namungusanyikanga ngwenu, ‘Setu,’ kaha nawa ngwami kamweshi kukalitwamina kungukavangizako.
20 Ami Yehova ngunambe ngwami, ‘Enu vakuzuvo yaIsalele munangumbembejeka ngana muze pwevo mwambembejeka lunga* lyenyi nakumuseza.’”+
21 Hajipili hali nakwivwakana mazuAvaIsalele akulila nakulembelela,Mwomwo vanatangisa jila yavo,Kaha nawa vanavulyama Yehova Kalunga kavo.+
22 “Kindulukenu enu vana vakuhungumuka,Michima yenu yakuhungumuka nanguyuka.”+“Tala tuneza! Tunakinduluka kuli ove,Mwomwo ove Yehova yove Kalunga ketu.+
23 Twalyongele etu vavene omu twapwile nakuneha liuya hajipili jajindende nahajipili jajinene.+Pundu vene, Yehova Kalunga ketu ikiye eji kulwilanga vaIsalele.+
24 Oloze echi chuma chaunyengwe* chinanongesa vyuma vanakilikichilanga vakakuluka jetu kufuma vene kuunyike wetu.+Nanongesa mikoko, navapembe, navangombe javo,Navana vavo vamalunga navava vamapwevo.
25 Tusavalenu hamavu mwomwo tunasauka.Sonyi yitulye,Mwomwo tunalingi shili kuli Yehova Kalunga ketu,+Etu navakakuluka jetu tunalinginga shili kufuma vene kuunyike wetu swi nakulikumbi lyalelo,+Kaha nawa katwononokele mulizu lyaYehova Kalunga ketuko.”
Kwinyikila Chamwishi
^ Hepe., “nge kaAlavya.”
^ Hepe., “Ukwechi luholo.”
^ Chipwe “natulunga veka.”
^ Chipwe pamo, “ngulunga lyenu.”
^ Hepe., “vafwila mayongomena avaka-mafuchi eka.”
^ Hepe., “sepa.”
^ Chipwe “Oloze kalunga waunyengwe.”
