Yelemiya 32:1-44
32 Yelemiya atambwile mazu kufuma kuli Yehova mumwaka wakusokesa 10 wachiyulo chaZetekiya mwangana wavaYuta. Mwaka kana ukiko wapwile wakusokesa 18 wachiyulo chaNevukataneza.*+
2 Halwola kana, maswalale jamwangana waMbavilone vahakile Yelusalema muchingombela, kaha kapolofweto Yelemiya nawa vamukashilile muChipango chaVaka-kulama,+ muzuvo* yamwangana wavaYuta.
3 Zetekiya mwangana wavaYuta ikiye akashile Yelemiya,+ amwambile ngwenyi: “Mwomwo ika weji kupolofwetelanga vyuma vyakufwana ngana? Weji kwambanga ngwove: ‘Yehova nambe ngwenyi: “Nganda yino nanguyihana mumavoko amwangana waMbavilone, kaha mwayitambula.+
4 Zetekiya mwangana wavaYuta keshi kupuluka mumavoko avaKalateyako. Navamuhana chikupu mumavoko amwangana waMbavilone. Mwakahanjika nenyi meso nameso, kaha nawa navakalimona meso nameso.”’+
5 Yehova nambe ngwenyi, ‘Mwangana waMbavilone mwakatwala Zetekiya kuMbavilone, kaha mwakatwamanga kuze palanga nomu nangukamwalakana. Numba tuhu muli nakulwa lika navaKalateya, oloze kamweshi kufukilako.’”+
6 Jino Yelemiya ambile ngwenyi: “Yehova nahanjika kuli ami ngwenyi,
7 ‘Hanamele mwanaShalume ndumbwaiso mweza kuli ove nakukulweza ngwenyi: “Landa wande wami uze uli kuAnatote,+ mwomwo ove yove mutu wakulivanga uze ali nalisesa lyakuulanda.”’”+
8 Jino Hanamele mwanandumbwatata ejile kuli ami ngana muze ahanjikile Yehova. Anguwanyine muChipango chaVaka-kulama, kaha ambile kuli ami ngwenyi: “Landa wande wami uze uli kuAnatote mungalila yavaMbenjamine, mwomwo ove yove uli nalisesa lyakuuheta nakuulanda. Ulande upwenga wove.” Ngocho ngwatachikijile ngwami mazu kana anafumu kuli Yehova.
9 Shikaho ngwalanjile uze wande wapwile kuAnatote. Ngwaulanjile kuli Hanamele mwanandumbwatata. Ngwamupezalishilile jimbongo,+ kaha japwile jishekele* 7 najimbongo japalata 10.
10 Kufumaho ngwasonekele mukanda wachivwasano,+ ngwaulamikile katachikijilo, kaha ngwasanyikile nawa vinjiho.+ Ngwapezalishile jize jimbongo hachipezaliso.
11 Jino ngwambachile mukanda wachivwasano chakulanda wande, uze ngwalamikile katachikijilo kweseka najishimbi najindongi, namukanda uze wazenekele katachikijilo,
12 kaha ngwahanyine uze mukanda wachivwasano kuli Mbaluke+ mwanaNeliya, Neliya+ mwanaMaseya hameso aHanamele mwanandumbwatata, nahameso avinjiho vaze vasonekele kumukanda kana, nahameso avaYuleya vosena vaze vatwamine muChipango chaVaka-kulama.+
13 Jino ngwalwezele Mbaluke hameso avo ngwami:
14 “Yehova wamayongomena, Kalunga kaIsalele nambe ngwenyi, ‘Tambula ou mukanda wachivwasano chakulanda wande, ou wakulamika katachikijilo nawou mukanda wakuzeneka katachikijilo uyitulike muchitenga chauma mangana yitwame tando yayisuku.’
15 Yehova wamayongomena, Kalunga kaIsalele nambe ngwenyi, ‘Vatu navakalanda cheka jizuvo, namande ajimbuto jamanona, namande amivinyo mulifuchi lino.’”+
16 Omu ngwalingile ngunahane lyehi Mbaluke mwanaNeliya mukanda wachivwasano chakulanda wande, ngwalombele kuli Yehova ngwami:
17 “Mama lelo ove Mwata Wakulitulaho Yehova! Tala! Ove yove watengele melu namavu nangolo jove+ nalivoko lyove lyaundume. Kakweshi chuma chimwe chinahase kukukomwesako.
18 Ove weji kusololanga zangi yakwilila kumakombakaji, oloze weji kuzangamisanga vana hakuhenga chamasevo.+ Ove wapwa uKalunga wamuchano, kaha uwamunene, uwangolo. Lijina lyove yove Yehova wamayongomena.
19 Ove weji kujinanga vyuma vyavinene, nakulinga vyuma vyangolo.+ Weji kumonanga jijila javatu vosena+ mangana ushishishilemo mutu himutu kweseka najijila jenyi navilinga vyenyi.+
20 Walingile vinjikizo navyuma vyakukomwesa mulifuchi lyaEjipitu vize vatachikiza vatu palanga nakulelo lino. Kaha walifumakanyisa muIsalele nakuvatu vosena+ nganomu chili oholyapwa.
21 Walowele vatu jove vaIsalele mulifuchi lyaEjipitu navinjikizo, navyuma vyakukomwesa, nalivoko lyove lyangolo, lyaundume, navilinga vyove vyakwivwisa woma.+
22 “Kutwala muze, wavahanyine lifuchi eli walishingile kuhana vakakuluka javo,+ lifuchi lyakumbwambumuka mavele nauchi.+
23 Ngocho vengilile mulifuchi lino, valihetele. Oloze kavononokele mulizu lyove chipwe kukavangiza jishimbi joveko. Vyuma vyosena vize wavalwezele kulinga kavavilingileko. Shikaho unavamwenesela lupi lwosenelu.+
24 Tala! Vatu vaneza kunganda yino nakuyilundwila milundu mangana vayitambule.+ Kaha vatu vamunganda yino navavajiha kuli vaKalateya vaze vanavanyemukila. Navafwa kupoko yamukwale,+ nakuzala yakalombolombo, nakumusongo wachihita.+ Vyuma vyosena wahanjikile vinalingiwa nge omu unalimwena oholyapwa.
25 Oloze ove Mwata Wakulitulaho Yehova, ove unangulweze ngwove, ‘Landa wande najimbongo, kaha sanyika vinjiho vamoneko,’ okunyi nganda yino navayihana chikupu mumavoko avaKalateya.”
26 Jino Yehova ahanjikile kuli Yelemiya ngwenyi:
27 “Ami yami Yehova, Kalunga kavatu vosena.* Kutala kuli chuma chimwe chinahase kungukomwesa nyi?
28 Shikaho Yehova nambe ngwenyi, ‘Tala, nanguhana nganda yino mumavoko avaKalateya namumavoko aNevukataneza* mwangana waMbavilone, kaha mwayitambula.+
29 VaKalateya vaze vananyemukila nganda yino naveza nakuyiswamika kakahya nakuyochela+ kumwe najizuvo jikwechi milungu yize valumbililengaho vatu vimuna vakuvatwila Mbale, yize nawa vahingunwinyinengaho mawana avinyo kutulunga veka mangana vangwivwise kupihya.’+
30 “Yehova nambe ngwenyi, ‘VaIsalele navaYuta vanalinginga vyuma vyavipi kumeso ami kufuma vene kuunyike wavo.+ VaIsalele vali nakungwivwisa kupihya namilimo yamavoko avo.
31 Mwomwo nganda yino yinangulingisanga ngupihilile nakukwata utenu+ kufuma vene kulikumbi vayitungile palanga nakulelo lino. Ngocho yatela kufuma kumeso ami,+
32 mwomwo yavyuma vyakungwivwisa kupihya vize vanalinginga vaIsalele navaYuta, navamyangana javo,+ navilolo javo,+ navapilishitu javo, navapolofweto javo,+ namalunga vavaYuta navatu vamuYelusalema.
33 Vanangutalisanga lika nyima keshi mesoko.+ Numba tuhu ngunavanangulanga mapapa kakavulu,* oloze naumwe wauchi nevwililanga mangana etavile kunangula kana.+
34 Vahaka makombelo avo aunyengwe muzuvo yize vavulukila lijina lyami mangana vayipihise.+
35 Kaha nawa vatunga vihela vyakulunduka vyakulemesela Mbale muChinema chaMwanaHinome*+ mangana valumbilenga Moleke+ vana vavo vamalunga navava vamapwevo. Kangwavalwezele kulinga chuma kanako,+ kaha nawa kangwashinganyekele mumuchima wami* ngwami valinge chuma kanechi chaunyengwe nakulingisa jino vaYuta valinge shiliko.’
36 “Enu muli nakwamba ngwenu vatu vamunganda yino navavahana mumavoko amwangana waMbavilone avanongese napoko yamukwale, nazala yakalombolombo, namusongo wachihita, oloze Yehova Kalunga kaIsalele nambe ngwenyi,
37 ‘Talenu, nangukavakungulula kufuma kumafuchi osena kuze ngunavamwangila mwomwo yamatoto ami, nautenu wami, nakulundundu yami.+ Nangukavakindulwisa muchihela chino, kaha navakapwanga vakukingiwa.+
38 Navakapwa vatu jami, kahami nawa nangukapwa nguKalunga kavo.+
39 Nangukavahana muchima+ woumwe nakuvalingisa vakatambuke mujila yimwe mangana vakangwivwenga lika woma. Nangukalinga ngocho mangana vakiko navana vavo vakatwamenga kanawa.+
40 Kaha nangukalishika navo lushiko lwahaya myaka yosena+ lwakuvuluka nge kangweshi kukalitwamina kukavalingila vyuma vyamwazako.+ Nangukavahana muchima wakungwivwa woma mangana vakazeneke kunguseza.+
41 Nangukalisambila hali vakiko nakuvalingila vyuma vyamwaza.+ Kaha nangukavatumba mulifuchi lino+ namuchima wami wosena namwono* wami wosena.’”
42 “Yehova nambe ngwenyi, ‘Nganomu ngunanehela ava vatu lupi lwosenelu lwalunene, mukiko nawa nangukavalingila vyuma vyamwaza vyosena vize ngunavashiki.+
43 Vatu navakalanda cheka mande mulifuchi lino,+ numba tuhu enu muli nakwamba ngwenu: “Lifuchi eli linapu ngundu, kamweshi vatu natunyamako, kaha nawa vanalihane mumavoko avaKalateya.”’
44 “Yehova nambe ngwenyi, ‘Vatu navakalanda mande najimbongo, kaha navakasoneka mikanda yavivwasano vyakulanda mande nakuyilamika tutachikijilo. Navakasanyika vinjiho mungalila yavaMbenjamine,+ namuvihela vyajingilika Yelusalema, namujinganda jamuYuta,+ namujinganda jamungalila yajipili, namujinganda jamuchana,+ namujinganda jakusulo, mwomwo nangukakindulwisa vatu javo vaze vayile muufunge.’”+
Kwinyikila Chamwishi
^ Hepe., “chaNevukataleza,” kusoneka chikwavo.
^ Chipwe “munganda.”
^ Shekele yimwe yapwile jingalamu 11.4. Tala Chihande B14.
^ Hepe., “kavaze vakwechi mijimba vosena.”
^ Hepe., “aNevukataleza,” kusoneka chikwavo.
^ Hepe., “ngunahindukanga chimenemene nakuvanangula.”
^ Chipwe “kavyapwile muvishinganyeka vyami.”
^ Tala Mukana waMazu, “Ngehena.”
^ Tala Mukana waMazu.
