Yelemiya 33:1-26
33 Yehova ahanjikile kamuchivali kuli Yelemiya omu vamukashile muChipango chaVaka-kulama,+ ngwenyi:
2 “Yehova ou atengele mavu, Yehova ou awazamishile, ou ukwechi lijina lyenyi ikiye Yehova, nambe ngwenyi,
3 ‘Ngusanyike, kaha nangukukumbulula. Nangukulweza vyuma vyakukomwesa, vyavikalu vize kawatachikizako.’”+
4 “Yehova Kalunga kaIsalele nahanjika kutalisa kujizuvo jamunganda yino, nakujizuvo javamyangana vamuYuta jize vanapuzula mangana vahonese vaka-kole vaze vanavalundwila milundu nakuvanyemukila najipoko jamikwale,+
5 nakuli vaze vali nakwiza nakulwa jita navaKalateya nakuzalisa vihela vino navivimbi vaze najihi mwomwo yamatoto nautenu wenyi, vaze nawa vanamulingisa ombenga nyima nganda yino mwomwo yaupi wavo, ngwenyi:
6 ‘Talenu, nangukahindula vatu vamunganda yino nakuvalingisa vakalikangule.+ Nangukavoka nakuvahana kuunda chachivulu namuchano.+
7 Nangukakindulwisa nawa vaYuta navaIsalele vaze vali muufunge,+ kaha nangukavalingisa vakapwe nge muze vapwile hakavanga.+
8 Nangukavatomesa kujishili javo josena jize vanalinginga kuli ami.+ Nangukavakonekela jishili javo josena namilonga yavo yakuzombwojoka jishimbi yize vanavulumunanga kuli ami.+
9 Nganda kana nayikapwa nalijina lize nalikangwivwisa kuwaha, nakulingisa vatu vakangwalise nakungutohwesa kumeso avaka-mafuchi ahamavu vosena vaze navakevwa vyuma vyamwaza ngunalingila nganda kana.+ Navakevwa woma nakulichikimina+ mwomwo yavyuma vyamwaza nangukayilingila nakuunda chize nangukayihana.’”+
10 “Yehova nambe ngwenyi: ‘Muchihela chino namukavuluka ngwenu ngundu, ngwenu kamweshi vatu chipwe vimunako, namujinganda jamuYuta jize jinapu jingundu, namujijila jamuYelusalema jize jinapundu, muze kamweshi vatu chipwe vimunako, namukevwakana cheka
11 vyema vyakulisamba, navyema vyakuwahilila,+ navyema vyamwenyamwenga, navyema vyamwenga, navyema vyavaze vali nakwamba ngwavo: “Musakwililenunga Yehova wamayongomena mwomwo Yehova apwa wamwaza,+ kaha zangi yenyi yakwilila kuyatwama haya myaka yosena.”’+
“Yehova nambe ngwenyi, ‘Navakaneha mawana akusakwilila kuzuvo yaYehova+ mwomwo nangukakindulwisa vatu vamulifuchi vaze vali muufunge, nge muze ngwalingile hakavanga.’”
12 “Yehova wamayongomena nambe ngwenyi: ‘Mungundu yino muze kamweshi nakutwama vatu chipwe vimunako, namujinganda jayo josena, namukapwa cheka maulilo aze tufunga navakautamisanga mautanga avo.’+
13 “Yehova nambe ngwenyi, ‘Mujinganda jamungalila yajipili, namujinganda jamuchana, namujinganda jakusulo, namungalila yavaMbenjamine, namuvihela vyajingilika Yelusalema,+ namujinganda jamuYuta,+ mikoko navakaseluka cheka mwishi yalivoko lyauze ali nakuvalava.’”
14 “Yehova nambe ngwenyi, ‘Talenu! Makumbi ali nakwiza omu nangukatesamo lushiko elu lwamwaza ngunahanjika kutalisa kuli vaze vakuzuvo yaIsalele navaze vakuzuvo yaYuta.+
15 Hamakumbi aze nahalwola luze, nangukasokesa muketengo*+ wakwolola wakuchisaka chaNdavichi, kaha mwakayulanga mwachiyulo, mwakwoloka mulifuchi.+
16 Hamakumbi aze, vaYuta navakavalwila,+ kaha vatu vamuYelusalema navakatwamanga mukuunda.+ Nganda kana navakayivulukanga ngwavo: Yehova Ikiye Kwoloka Chetu.’”+
17 “Yehova nambe ngwenyi: ‘Halitanda lyawangana wavaze vakuzuvo yaIsalele+ nahakatwamanga lika mutu wamuchisaka chaNdavichi.
18 Kaha nawa kuli vapilishitu vavaLevi nakukapwanga lika mutu uze mwakemananga kumeso ami nakuhana mawana akulumba navimuna vakuvatula, nakulumba mawana amanona.’”
19 Yehova ahanjikile cheka kuli Yelemiya ngwenyi:
20 “Yehova nambe ngwenyi, ‘Kachi nge namuhasa kujiha lushiko ngwalishika ngwami kupwenganga lika musana nalushiko ngwalishika ngwami kupwenganga lika ufuku, mangana muhonese musana naufuku kupwako halwola lwavyo,+
21 kahanyi nalushiko lwami luze ngwalishikile nangamba yami Ndavichi nalufwa.+ Kakweshi kukapwa mwanenyi mwakatwamanga halitanda lyenyiko.+ Nalushiko lwami nawa ngwalishikile navapilishitu vavaLevi vaze vapwa vaka-kunguzachila nalufwa.+
22 Nanguvulisa vaka-tanga* yangamba yami Ndavichi navaLevi vaze veji kunguzachilanga mangana vapwenga nge mayongomena amwilu aze navahona kulava, nge usekeseke wakukalungalwiji uze kaveshi kuhasa kupezalisako.’”
23 Yehova ahanjikile cheka kuli Yelemiya ngwenyi:
24 “Unevu vyuma vali nakuhanjika ava vatu nyi? Vali nakwamba ngwavo, ‘Yehova mwakana jitanga jivali jize asakwile.’ Vali nakusaula vatu jami, kaha vali nakuvamona nge kavapwa himuyachiko.
25 “Yehova nambe ngwenyi, ‘Nganomu ngwalishika lushiko ngwami kupwenganga lika musana naufuku,+ nakuhakako jishimbi* jize jayula melu namavu,+
26 mukiko nawa kangweshi kukakana vaka-tanga* yaYakova navaka-tanga* yangamba yami Ndavichiko. Nangukasakulanga mutu wamutanga yenyi akayulenga vaka-tanga* yaApalahama, naIsaka, naYakova. Mwomwo nangukakindulwisa vafunge javo+ nakuvevwila keke.’”+
Kwinyikila Chamwishi
^ Chipwe “nangukakatula swana.”
^ Hepe., “mbuto.”
^ Chipwe “jindongi.”
^ Hepe., “mbuto.”
^ Hepe., “nambuto.”
^ Hepe., “mbuto.”
