Yelemiya 34:1-22
34 Omu Nevukataneza* mwangana waMbavilone, namaswalale jenyi vosena, namawangana ahamavu osena aze apwilenga muchiyulo chenyi, navatu veka naveka vosena vapwile nakulwa jita naYelusalema najinganda jayo josena,+ Yehova ahanjikile kuli Yelemiya ngwenyi:
2 “Yehova Kalunga kaIsalele nambe ngwenyi, ‘Yako ukalweze Zetekiya+ mwangana wavaYuta ngwove: “Yehova nambe ngwenyi, ‘Yino nganda nanguyihana mumavoko amwangana waMbavilone, kaha mwayocha nakakahya.+
3 Ove Zetekiya kaweshi kupuluka mumavoko enyiko, mwomwo navakukwata nakukuhana kuli ikiye.+ Naulimona namwangana waMbavilone meso nameso, mwahanjika nayove meso nameso, kaha navakutwala kuMbavilone.’+
4 Oloze ove Zetekiya mwangana wavaYuta, ivwa mazu nahanjika Yehova. ‘Yehova nambe ngwenyi: “Ove kaweshi kufwa kupoko yamukwaleko.
5 Naufwa mukuunda,+ kaha navakulingila chilika chakulumba vyuma vyalivumba lyamwaza nge muze valingilile vakakuluka jove, vamyangana vaze vapwileko shimbu kanda ove upwengako. Navakalishona hali ove ngwavo, ‘Mama lelo ove mwata!’ mwomwo ‘Ami ngunahanjikamo lyehi.’ Omu mukiko mwanambe Yehova.”’”’”
6 Kapolofweto Yelemiya alwezele Zetekiya mwangana wavaYuta mazu osena awa muYelusalema.
7 Mazu kana amulwezelewo omu maswalale jamwangana waMbavilone vapwile nakulwa jita naYelusalema najinganda jamuYuta jize jasalileho,+ Lakishe+ naAzeka.+ Jinganda kaneji jakujingulwisa jikembwe jikiko kaha jasalileho hajinganda jamuYuta.
8 Yehova ahanjikile cheka kuli Yelemiya omu Mwangana Zetekiya alingile hanalikase lyehi chivwasano navatu vamuYelusalema vosena mangana vavilike kusokoka.+
9 Vavilike ngwavo mutu himutu asuule ndungo yenyi wakaHepeleu walunga chipwe wapwevo, mangana mutu azeneke kuheta mukwavo kaYuleya kupwa ndungo yenyi.
10 Ngocho vilolo navatu vosena vononokele mazu achivwasano kana. Vetavilile ngwavo mutu himutu asuule ndungo yenyi walunga chipwe wapwevo, kaha kavatela cheka kuvaheta kupwa vandungo javoko. Vononokele, kaha vasuwile vandungo javo.
11 Oloze kutwala muze, vakindulwishile cheka vandungo javo vamapwevo navava vamalunga vaze vasuwile, kaha vavashinyinyikile vapwenga cheka vandungo javo.
12 Ngocho Yehova ahanjikile kuli Yelemiya. Yehova ambile ngwenyi:
13 “Yehova Kalunga kaIsalele nambe ngwenyi, ‘Ngwalishikile lushiko navakakuluka jenu+ halikumbi lize ngwavalowele mulifuchi lyaEjipitu, muzuvo yaundungo+ ngwami:
14 “Kusongo yamyaka 7, mutu himutu akasuule ndumbwenyi wakaHepeleu uze alanjile, uze namuzachila myaka 6. Akamusuule akaliyile kwenyi.”+ Oloze vakakuluka jenu kavangwivwililileko, kavatengelekele matwitwi avo kuli amiko.
15 Kalinwomu* vene ngana mwalumukanga nakulinga vyuma vyakwoloka kumeso ami, mwavilikanga kusokoka kuli vakwenu, kaha mwalikasanga chivwasano kumeso ami muzuvo yize vavulukila lijina lyami.
16 Oloze munalumuka cheka nakusaula lijina lyami.+ Munakindulwisa vandungo jenu vamalunga navava vamapwevo vaze mwasuulanga nge omu vasakanga vavene,* kaha munavashinyinyika vapwenga cheka vandungo jenu.’
17 “Ngocho Yehova nambe ngwenyi: ‘Kamwangwononokeleko, mutu himutu kavilikile kusokoka kuli ndumbwenyi nakuli mukwavoko.+ Ngocho nanguvilika jino kusokoka kuli enu. Namufwa kupoko yamukwale, nakumusongo wachihita, nakuzala yakalombolombo,+ kaha nangumilingisa mukomwese mawangana ahamavu osena.’+ Omu mukiko mwanambe Yehova.
18 ‘Evi vikiko vyuma navisoloka kuli vatu vaze vanahokola chivwasano chami, vaze vanazeneka kukavangiza chivwasano chize valikashile kumeso ami omu vapulile mwanangombe muvihanda vivali nakuhita mukachi,+
19 evi vikiko navisoloka kuli vilolo javaYuta, navilolo vamuYelusalema, navamyata, navapilishitu, navatu vamulifuchi vosena vaze vahichile mukachi kavize vihanda vivali vyamwanangombe:
20 Nanguvahana mumavoko avaka-kole javo, mumavoko avaze vali nakusaka kuvajiha, kaha mijimba yavo yakufwa nayipwa kulya chatujila vakutuka mwilu, natunyama vahamavu.+
21 Zetekiya mwangana wavaYuta navilolo jenyi nawa nanguvahana mumavoko avaka-kole javo, mumavoko avaze vali nakusaka kuvajiha, namumavoko amaswalale jamwangana waMbavilone+ vaze vaminyemukilanga oloze vali nakukinduluka.’+
22 “Yehova nambe ngwenyi, ‘Nanguhana lushimbi, kaha nanguvakindulwisa kunganda yino. Navalwa nayo jita, navayitambula nakuyocha nakakahya.+ Jinganda jamuYuta navajinongesa nakujiseza jingundu, chakuzeneka mutu wakutwamamo.’”+
Kwinyikila Chamwishi
^ Hepe., “Nevukataleza,” kusoneka chikwavo.
^ Hepe., “Lelo.”
^ Chipwe “omu yasakanga myono yavo.”
