Yelemiya 35:1-19
-
Vaze vakuzuvo yaLekave navasolola chakutalilaho chakwononoka (1-19)
35 Yehova ahanjikile kuli Yelemiya hamakumbi aYehoyakime+ mwanaYoshiya, mwangana wavaYuta ngwenyi:
2 “Yako kuli vaze vakuzuvo yaLekave+ ukahanjike navo, uvanehe muzuvo yaYehova, mukapete kamwe kakulila. Kaha uvahane vinyo vanwenga.”
3 Ngocho ngwambachile Yazanyiya mwanaYelemiya, Yelemiya mwanaHavajinyiya navandumbwenyi, navana venyi vosena, navaze vakuzuvo yaLekave vosena,
4 ngwavatwalile muzuvo yaYehova. Ngwavengishile mukapete kakulila kavana vaHanane mwanaIngindaliya, mutu waKalunga wamuchano. Kapete kana kalihachile nakapete kakulila kavilolo, kaze kapwilile helu lyakapete kakulila kaMaseya mwanaShalume muka-kulama kuchikolo.
5 Jino ngwambachile jipasa naviloso vyato navinyo, ngwavitumbikile kumeso avaze vakuzuvo yaLekave, kaha ngwavambile ngwami: “Nwenu vinyo.”
6 Oloze vambile ngwavo: “Etu katweshi kunwa vinyoko, mwomwo kakuluka yetu Yehonatave*+ mwanaLekave atuhanyine lushimbi ngwenyi, ‘Enu navana venu kanda namukanwa vinyoko.
7 Kanda namukatunga nawa jizuvo, chipwe kukuva jimbuto, chipwe kupwa namande amivinyo, chipwe kulima mande amivinyoko. Oloze katwamenunga mujimbalaka mangana mukayoyenga myaka yayivulu mulifuchi muze namukazuzumana.’
8 Ngocho etu twononoka mulizu lyaYehonatave mwanakakuluka yetu Lekave nakulinga vyuma vyosena atulwezele. Etu namapwevo jetu, navana vetu vamalunga navava vamapwevo katweshi kunwa vinyoko.
9 Katweshi kutunga jizuvo jakutwamamoko, kaha nawa katweshi namande amivinyo, chipwe mande eka, chipwe jimbutoko.
10 Etu twatwama mujimbalaka. Twononoka vyuma vyosena vize atulwezele kakuluka yetu Yehonatave.*
11 Oloze omu Nevukataneza* mwangana waMbavilone anyemukilile lifuchi eli,+ etu twalyambile ngwetu, ‘Tuyenu kuYelusalema, tuchinenu maswalale javaKalateya namaswalale javaSulya.’ Shikaho tuli nakutwamina muYelusalema oholyapwa.”
12 Yehova ahanjikile kuli Yelemiya ngwenyi:
13 “Yehova wamayongomena, Kalunga kaIsalele nambe ngwenyi, ‘Yako kuli vaYuta nakuli vatu vamuYelusalema ukavalweze ngwove: “Uno kavamilwezele mapapa kakavulu ngwavo mwononokenga mazu amiko nyi?”+ Omu mukiko mwanambe Yehova.
14 “Yehonatave mwanaLekave ahanyine lushimbi vaka-tanga yenyi ngwenyi kanda navanwa vinyoko, kaha vanalamenga lushimbi kana nakuzeneka kunwa vinyo palanga nakulelo lino. Vanononokanga lushimbi lwakakuluka yavo.+ Jino ami ngunahanjikanga kuli enu mapapa kakavulu,* oloze kamwangwivwililileko.+
15 Ngunamituminanga vangamba jami, vapolofweto vosena. Ngunamituminangavo mapapa kakavulu,*+ kaha vanamilwezenga ngwavo, ‘Sezenu jijila jenu jajipi+ nakulinga vyuma vyakwoloka. Kanda namukavangiza tulunga veka nakuvazachilako. Nge namulinga ngocho, kaha namutwamanga lika mulifuchi lize ngwamihanyine navakakuluka jenu.’+ Oloze enu munakanenga kutengeleka matwitwi enu chipwe kungwivwilila.
16 Vaka-tanga yaYehonatave mwanaLekave vanalamenga lushimbi luze avahanyine kakuluka yavo,+ oloze enu munakane kungwivwilila.”’”
17 “Ngocho Yehova Kalunga wamayongomena, Kalunga kaIsalele nambe ngwenyi, ‘VaYuta navatu vosena vamuYelusalema nanguvanehela lupi lwosena luze ngunahanjikanga.+ Mwomwo ngunavahanjikilanga, oloze kavangwivwililileko, ngunavasanyikanga, oloze kavangukumbulwileko.’”+
18 Jino Yelemiya ahanjikile kuli vaze vakuzuvo yaLekave ngwenyi: “Yehova wamayongomena, Kalunga kaIsalele nambe ngwenyi, ‘Hakuwana nge munononokanga lushimbi lwakakuluka yenu Yehonatave, munalamenga jishimbi jenyi josena nakulinga vyuma vyosena amilwezele,
19 ngocho Yehova wamayongomena, Kalunga kaIsalele nambe ngwenyi: “Kuli vaka-tanga yaYehonatave* mwanaLekave nakufumanga lika mutu mwazachilanga kumeso ami.”’”
Kwinyikila Chamwishi
^ Hepe., “Yonatave,” hilijina lyaYehonatave mukavatu.
^ Hepe., “Yonatave,” hilijina lyaYehonatave mukavatu.
^ Hepe., “Nevukataleza,” kusoneka chikwavo.
^ Hepe., “ngunahindukanga chimenemene nakuhanjika kuli enu.”
^ Hepe., “Ngunahindukanga chimenemene nakuvatuma kuli enu.”
^ Hepe., “yaYonatave,” hilijina lyaYehonatave mukavatu.