Yelemiya 36:1-32
36 Jino mumwaka wamuchiwana wachiyulo chaYehoyakime+ mwanaYoshiya, mwangana wavaYuta, Yehova ahanjikile kuli Yelemiya ngwenyi:
2 “Mbata mukanda wakuvunga usonekemo mazu osena ngunakulwezenga hali vaIsalele, navaYuta,+ navaka-mafuchi osena.+ Soneka mazu osena ngunakulwezenga kufuma kulikumbi lyakulivanga lize ngwahanjikile kuli ove mumakumbi aYoshiya palanga nakulikumbi lyalelo.+
3 Pamo vaze vakuzuvo yaYuta navaseza jijila javo jajipi omu navevwa lupi lwosena nguli nakushinganyeka kuvanehela, kaha nanguvakonekela kuhenga chavo nashili yavo.”+
4 Kufumaho Yelemiya asanyikile Mbaluke+ mwanaNeliya. Yelemiya aputukile kuhanjika mazu osena amulwezele Yehova, kaha Mbaluke awasonekele mumukanda wakuvunga.+
5 Jino Yelemiya ambile kuli Mbaluke ngwenyi: “Ami vanangukanyisa kwingila muzuvo yaYehova.
6 Shikaho yako ukengilemo yove ukatangile helu mazu aYehova aze unasoneka mumukanda wakuvunga, aze ngwapwanga nakukulweza. Kawatangile vatu muzuvo yaYehova halikumbi lyakulijilika kulya. Kawatangile vaYuta vosena vaze navafuma kujinganda javo.
7 Pamo Yehova mwakevwa kulembelela chavo, kaha mutu himutu mwakalumuka nakuseza jijila jenyi jajipi, mwomwo Yehova navakwachila utenu namatoto amanene.”
8 Ngocho Mbaluke mwanaNeliya alingile nge muze amulwezele kapolofweto Yelemiya. Atangilile helu mazu aYehova aze apwile mumukanda wakuvunga muzuvo yaYehova.+
9 Jino mumwaka wamuchitanu wachiyulo chaYehoyakime+ mwanaYoshiya, mwangana wavaYuta, mukakweji wakusokesa 9, vatu vamuYelusalema vosena, navatu vosena vaze vejile kuYelusalema kufuma kujinganda jamuYuta vavilikile lwola lwakulijilika kulya kumeso aYehova.+
10 Kaha Mbaluke atangilile helu mazu aYelemiya aze apwile mumukanda wakuvunga. Awatangilile vatu vosena muzuvo yaYehova, mukapete kaNgemaliya+ mwanaShafwane+ muka-kunungulula mazu,* muchipango chahelu, kuwingililo wachikolo chachihya chazuvo yaYehova.+
11 Omu Mikaya mwanaNgemaliya, Ngemaliya mwanaShafwane evwile mazu aYehova osena aze apwile mumukanda wakuvunga,
12 ayile kuzuvo* yamwangana, kukapete kamuka-kusoneka. Awanyine vilolo vosena vanatwame. Vilolo kana vapwile Elishama+ muka-kusoneka, naNdelaya mwanaShemaya, naElenatane+ mwanaAkavole,+ naNgemaliya mwanaShafwane, naZetekiya mwanaHananyiya, navilolo veka vosena.
13 Mikaya avalwezele mazu osena aze evwile omu Mbaluke apwile nakutangila vatu mazu amumukanda wakuvunga.
14 Jino vilolo vosena vatumine Yehute mwanaNetanyiya, Netanyiya mwanaShelemiya, Shelemiya mwanaKushi akalweze Mbaluke ngwenyi: “Twaya namukanda wakuvunga uze watangilanga vatu.” Kaha Mbaluke mwanaNeliya ambachile mukanda wakuvunga mulivoko lyenyi nakuya kuli vakiko.
15 Omu ahetele kuze, vamulwezele ngwavo: “Twama ututangile mazu amumukanda kana.” Ngocho Mbaluke avatangililewo.
16 Kahomu vevwile mazu kana, vevwile woma nakuputuka kulitalatala mwavomwavo. Vambile kuli Mbaluke ngwavo: “Mazu osena awa twatela chikupu kuwalweza mwangana.”
17 Jino vehwile Mbaluke ngwavo: “Tulweze, mazu osena awa wawasonekanga ngachilihi? Uno Yelemiya ikiye akulwezangawo tahi?”
18 Mbaluke avakumbulwile ngwenyi: “Yelemiya ikiye apwanga nakuhanjika mazu osena awa kuli ami, kaha ami ngwapwanga nakuwasoneka naulombo mumukanda ou wakuvunga.”
19 Kaha vaze vilolo vambile kuli Mbaluke ngwavo: “Ove naYelemiya yenunga mukaswame. Kanda nakupwa mutu atela kutachikiza okwo munaswameko.”+
20 Vaze vilolo vayile kuli mwangana kuchipango, kaha vahakile uze mukanda wakuvunga mukapete kaElishama muka-kusoneka. Kufumaho vahichililemo mwangana vyuma vyosena vize vevwile.
21 Ngocho mwangana atumine Yehute+ ayenga nakumbata uze mukanda wakuvunga vahakile mukapete kaElishama muka-kusoneka. Kahomu Yehute anehele uze mukanda, autangilile mwangana navilolo vosena vaze vemanyine kumeso amwangana.
22 Halwola kanelu, mwangana atwamine muzuvo yenyi yakutwama hangonde yachishika, mukakweji wakusokesa 9.* Apwile nakwota kakahya hambaula.
23 Omu Yehute alingilenga natange lyehi vihanda vitatu chipwe viwana, mwangana atetelenga vihanda kana napoko yamuka-kusoneka nakuvimbila mukakahya kaze kapwile hambaula. Alingilenga lika ngocho palanga nomu ochele mukanda wakuvunga wosena mukakahya.
24 Mwangana navangamba jenyi vosena vaze vevwile mazu osena awa kavevwile woma chipwe kupihilila nakupula uvwalo wavoko.
25 Numba tuhu Elenatane,+ naNdelaya,+ naNgemaliya+ valembelelele mwangana ngwavo kanda ocha uze mukandako, oloze ikiye kavevwililileko.
26 Kufumaho mwangana alwezele Yelamele mwanamwangana, naSelaya mwanaAzalyele, naShelemiya mwanaAvatele vayenga nakukwata Mbaluke muka-kusoneka nakapolofweto Yelemiya. Oloze Yehova avaswekele.+
27 Kahomu alingile mwangana nocho lyehi mukanda wakuvunga uze wapwile namazu aze ahanjikile Yelemiya kuli Mbaluke,+ Yehova ahanjikile cheka kuli Yelemiya ngwenyi:
28 “Mbata mukanda weka wakuvunga usonekemo mazu osena aze apwanga mumukanda wakuvunga wakavanga, uze ochanga Yehoyakime mwangana wavaYuta.+
29 Kaha lweza Yehoyakime mwangana wavaYuta ngwove, ‘Yehova nambe ngwenyi: “Unocho mukanda wakuvunga nakwamba ngwove, ‘Mwomwo ika unasonekelamo ngwove: “Mwangana waMbavilone mweza nakunongesa lino lifuchi nakukombamo vatu natunyama”?’+
30 Shikaho Yehova nahanjika kuli ove Yehoyakime mwangana wavaYuta ngwenyi, ‘Kaweshi kukapwa namutu mwakatwama halitanda lyaNdavichiko.+ Omu naukafwa, mujimba wove navakaumbila hangana vene, kaha namusana naukatwila musana, naufuku naukawilila chishika.+
31 Nangukakusopesa hohamwe navaka-tanga* yove, navangamba jove hakuhenga chenu. Kaha lupi lwosena luze ngunamilwezenga nangukaluneha hali enu, navatu vamuYelusalema, navaYuta vosena. Ngunamilwezenga vyalupi kanelu,+ oloze enu munakanenga kungwivwilila.’”’”+
32 Jino Yelemiya ambachile mukanda weka wakuvunga, auhanyine muka-kusoneka Mbaluke mwanaNeliya.+ Mbaluke aputukile kusoneka mazu osena aze amulwezelenga Yelemiya, aze apwile mumukanda uze ochele Yehoyakime mwangana wavaYuta.+ Kaha vahakilileko mazu eka amavulu akulifwana nawaze apwile mumukanda wakulivanga.
Kwinyikila Chamwishi
^ Chipwe “muka-kusoneka.”
^ Chipwe “kunganda.”
^ Chimbwa chamakumishilo chaNovember nachimbwa chatete chaDecember. Tala Chihande B15.
^ Hepe., “nambuto.”
