Yelemiya 37:1-21
37 Mwangana Zetekiya+ mwanaYoshiya ashishile Konyiya*+ mwanaYehoyakime kupwa mwangana. Nevukataneza* mwangana waMbavilone amutongwele apwenga mwangana mulifuchi lyaYuta.+
2 Oloze Zetekiya, navangamba jenyi, navatu vamulifuchi lyaYuta kavevwililile mazu aYehova aze ahanjikile kuhichila muli kapolofweto Yelemiyako.
3 Jino Mwangana Zetekiya atumine Yehukale+ mwanaShelemiya naZefwanyiya+ mwanakapilishitu Maseya vayenga nakulweza kapolofweto Yelemiya ngwavo: “Tulombeleko kuli Yehova Kalunga ketu.”
4 Halwola kana, Yelemiya apwilenga nakulitambwojokela kwenyi mukulihehwa mwomwo apwile kanda vamukase mukamenga.+
5 Omu vaKalateya vaze vahakile Yelusalema muchingombela vevwile ngwavo maswalale jaFwalo vali nakwiza kufuma kuEjipitu,+ valitwaminyine kunyemukila Yelusalema.+
6 Jino Yehova ahanjikile kuli kapolofweto Yelemiya ngwenyi:
7 “Yehova Kalunga kaIsalele nambe ngwenyi, ‘Kalweze mwangana wavaYuta ou nakutumu kwiza nakungwihula ngwove: “Maswalale jaFwalo vaze vali nakwiza nakumikafwa navakinduluka kulifuchi lyavo kuEjipitu.+
8 Kaha vaKalateya navakinduluka nakulwa nanganda yino. Navayitambula nakuyocha nakakahya.”+
9 Yehova nambe ngwenyi, “Kanda namulyonga enu vavene nakwamba ngwenu, ‘VaKalateya vanalitwamina kutunyemukilako.’ Kavalitwaminyineko.
10 Numba nge namujiha maswalale javaKalateya vosena vaze vali nakumizungisa, nakusezaho kaha vaze vanalemana, chochimwe navalovoka mujimbalaka javo nakwiza nakwocha yino nganda.”’”+
11 Omu maswalale javaKalateya valitwaminyine kunyemukila Yelusalema mwomwo yamaswalale jaFwalo,+
12 Yelemiya afumine kuYelusalema nakuya kungalila yavaMbenjamine+ mangana akatambule chazano chenyi muli vatu jenyi.
13 Omu ahetele kuChikolo chaMbenjamine, Iliya mwanaShelemiya, Shelemiya mwanaHananyiya uze apwile mukulwane wavaka-kulama akwachile kapolofweto Yelemiya nakumwamba ngwenyi: “Uli nakutuchina uyenga kuli vaKalateya.”
14 Oloze Yelemiya ambile ngwenyi: “Omwo keshi mukikoko. Kangweshi nakumichina nguyenga kuli vaKalateyako.” Chipwe ngocho Iliya kamufweleleleko. Akwachile Yelemiya nakumutwala kuli vilolo.
15 Vilolo vapihililile naYelemiya,+ kaha vamuvetele, vamukashile*+ nakumuhaka muzuvo yaYehonatane muka-kusoneka yize vatengele kupwa kamenga.
16 Yelemiya vamuhakile mukamenga,* mutupete vamumavu, kaha apwilenga muze makumbi amavulu.
17 Jino Mwangana Zetekiya asanyikile Yelemiya. Kahomu ejile, mwangana amuhulishilile kupenge muzuvo* yenyi+ ngwenyi, “Kuli Yehova kunafumu mazu amwe tahi?” Kaha Yelemiya amukumbulwile ngwenyi, “Eyo.” Ambile ngwenyi, “Navakuhana mumavoko amwangana waMbavilone.”+
18 Yelemiya ambile nawa kuli mwangana Zetekiya ngwenyi: “Mulonga muka ngunavulumuna kuli ove, nakuli vangamba jove, nakuli vatu ava numba munguhake mukamenga?
19 Vapolofweto jove vaze vapolofwetele kuli ove ngwavo, ‘Mwangana waMbavilone keshi kukunyemukila ove chipwe kunyemukila lifuchi linoko’ vali kulihi?+
20 Shikaho ove mwata wami mwangana, ngwivwilile. Linga kweseka nomu nangukulembelela. Kanda naungukindulwisa kuzuvo yaYehonatane+ muka-kusonekako, mokomoko nangukafwila kuze.”+
21 Ngocho Mwangana Zetekiya alwezele vatu vakase Yelemiya nakumuhaka muChipango chaVaka-kulama.+ Hakumbi hakumbi, vamuhanyinenga mbolo yimwe yamujingulule palanga nomu jimbolo josena jakumine munganda.+ Mbolo kana yafuminenga kujila vapwilenga vaka-kwocha jimbolo.+ Yelemiya atwaminenga lika muChipango chaVaka-kulama.
Kwinyikila Chamwishi
^ Vamuvuluka nawa ngwavo Yehoyakine chipwe Yekonyiya.
^ Hepe., “Nevukataleza,” kusoneka chikwavo.
^ Hepe., “vamuhakile muzuvo yamalenge.”
^ Hepe., “muzuvo yalishima.”
^ Chipwe “munganda.”
