Yelemiya 38:1-28
38 Jino Shefwachiya mwanaMatane, naNgetaliya mwanaPashule, naYukale+ mwanaShelemiya, naPashule+ mwanaMalakiya vevwile mazu ahanjikile Yelemiya kuli vatu vosena ngwenyi:
2 “Yehova nambe ngwenyi, ‘Weshowo mwatwama muno munganda mwafwa kupoko yamukwale, nakuzala yakalombolombo, nakumusongo wachihita.+ Oloze weshowo mwalitwala* kuli vaKalateya mwayoyanga lika, mwapululula mwono wenyi,* keshi kufwako.’+
3 Yehova nambe ngwenyi, ‘Nganda yino navayihana kumaswalale jamwangana waMbavilone, kaha mwangana waMbavilone mwayitambula.’”+
4 Jino vilolo vambile kuli mwangana ngwavo: “Suula ou lunga vamujihe,+ mwomwo awa mazu ali nakuhanjika ali nakuzuzwisa maswalale vaze vanasale munganda yino navatu vosena. Ou lunga keshi nakusaka vatu vatwame mukuundako, oloze ali nakusaka vamone lupi.”
5 Mwangana Zetekiya avakumbulwile ngwenyi: “Talenu! Ou lunga ali mumavoko enu. Ami mwangana kangweshi kuhasa kumikanyisako.”
6 Ngocho vambachile Yelemiya, vamumbilile mulishima lyaMalakiya mwanamwangana lize lyapwile muChipango chaVaka-kulama.+ Vamuzezumwinyinemo namikole. Muze mulishima kamwapwile meyako, mwapwile kaha ulova. Ngocho Yelemiya aputukile kwingila muulova.
7 Evete-meleke+ kaEchopa uze apwile chilolo muzuvo* yamwangana evwile ngwavo Yelemiya vanamumbili mulishima. Jino mwangana atwamine kuChikolo chaMbenjamine.+
8 Kaha Evete-meleke alovokele muzuvo* yamwangana, ayile nakuhanjika namwangana ngwenyi:
9 “Ove mwata wami mwangana, vyuma vanalingi ava malunga kuli kapolofweto Yelemiya vinapihi. Vanamumbili mulishima, kaha mwafwa kuzala, mwomwo vyakulya munganda vinakumu.”+
10 Kaha mwangana alwezele Evete-meleke kaEchopa ngwenyi: “Mbata malunga 30 kuno muyenga mukafumise kapolofweto Yelemiya mulishima shimbu kanda afwenga.”
11 Ngocho Evete-meleke ambachile malunga kana, ayile navo muzuvo* yamwangana, muchihela chize chapwilile mwishi yakapete kakulamina vikumba.+ Vakambachile vitau namahina akupulijeka, kaha vavizezumwinyine muze mulishima apwile Yelemiya kuzachisa mikole.
12 Jino Evete-meleke kaEchopa alwezele Yelemiya ngwenyi: “Haka ovyo vitau namahina akupulijeka mutuhwa twove kuchina oyo mikole nauhaka mukahwa nayikulemeka.” Kaha Yelemiya alingile ngocho.
13 Vakokele Yelemiya namikole nakumufumisa muze mulishima. Kaha Yelemiya atwaminenga jino muChipango chaVaka-kulama.+
14 Mwangana Zetekiya atumine vatu vakasake kapolofweto Yelemiya mangana ezenga kuchikolo chamuchitatu chize chapwile kuzuvo yaYehova. Kahomu ejile, mwangana ambile kuli ikiye ngwenyi: “Nguli nakusaka kukuhulisako vyuma vimwe. Kanda naunguswekela chuma numba chimweko.”
15 Yelemiya ambile kuli Zetekiya ngwenyi: “Kachi nge nangukulwezavyo, naungujiha. Kachi nge nangukulweza nawa vyakulinga, kaweshi kungwivwililako.”
16 Ngocho Mwangana Zetekiya alishingile kuli Yelemiya kupenge ngwenyi: “Omu ayoya Yehova tu, ou atuhana kuyoya,* kangweshi kukujiha chipwe kukuhana mumavoko avatu vaze vali nakusaka kukujihako.”
17 Jino Yelemiya ambile kuli Zetekiya ngwenyi: “Yehova Kalunga wamayongomena, Kalunga kaIsalele nambe ngwenyi, ‘Kachi nge naulitwala* kuli vilolo jamwangana waMbavilone, kaha kaweshi kufwako.* Nanganda yino kaveshi kuyochako. Navaka-tanga yove nawa kaveshi kufwako.+
18 Oloze kachi nge kaweshi kulitwala* kuli vilolo jamwangana waMbaviloneko, kaha nganda yino navayihana kuli vaKalateya. Navayocha,+ kahove kaweshi kupuluka mumavoko avoko.’”+
19 Jino Mwangana Zetekiya ambile kuli Yelemiya ngwenyi: “Nguli nakwivwa woma vaYuleya vaze vanachinyina kuli vaKalateya. Kachi nge navanguhana mumavoko avo, navanguyanjisa mwamupi.”
20 Oloze Yelemiya ambile ngwenyi: “Kaveshi kukuhana mumavoko avoko. Ove ononoka mulizu lyaYehova eli nguli nakukulweza, kaha vyuma naviwaha, nauyoya lika.
21 Oloze nge naukana kulitwala,* kaha vyuma nangumwenesa Yehova navisoloka.
22 Nangumwenesa mapwevo vosena vaze vanasale muzuvo* yamwangana wavaYuta vali nakuvalovola nakuvatwala kuli vilolo jamwangana waMbavilone.+ Mapwevo kana vali nakwamba ngwavo,‘Malunga vaze wafwelelele* vanakwongo, vanakuhonesa.+Vanakulingisa ukakachile muulova.Oholyapwa jino vanakinduluka nakuchina.’
23 Mapwevo jove vosena, navana vove vosena vali nakuvatwala kuli vaKalateya, kahove nawa kaweshi kupuluka mulivoko lyavoko. Mwangana waMbavilone+ mwakukwata, kaha nganda yino navayocha mwomwo yayove.”+
24 Jino Zetekiya ambile kuli Yelemiya ngwenyi: “Kanda naulweza mutu vyuma kaneviko, kuchina naufwa.
25 Kachi nge vilolo navevwa ngwavo ngunashimutwila nayove, kaha hinaveza kuli ove nakukwamba ngwavo, ‘Tulweze vyuma unahanjika namwangana. Kanda nautuswekela chuma numba chimweko, katweshi kukujihako.+ Mwangana nakulweze vyuma muka?’
26 Kahove uvakumbulula ngwove, ‘Ngwapwanga nakulomba mwangana azeneke kungukindulwisa kuzuvo yaYehonatane kuchina nangukafwilako.’”+
27 Kutwala muze, vilolo vosena vejile kuli Yelemiya nakumuhulisa. Kaha ikiye avalwezele nge kutesa namuze amulwezele mwangana. Ngocho kavahanjikile cheka vyuma vyeka kuli ikiyeko mwomwo kakwapwile umwe evwile vyuma vize Yelemiya ashimutwilile namwanganako.
28 Yelemiya atwamine lika muChipango chaVaka-kulama+ palanga nakulikumbi vatambwile Yelusalema. Apwile muze muchipango omu vatambwile Yelusalema.+
Kwinyikila Chamwishi
^ Hepe., “mwalovoka nakuya.”
^ Chipwe “mwapuluka namwono wenyi.”
^ Chipwe “munganda.”
^ Chipwe “munganda.”
^ Chipwe “munganda.”
^ Chipwe “ou atengele mwono uno.”
^ Hepe., “naulovoka nakuya.”
^ Chipwe “kaha mwono wove nauyoyanga lika.”
^ Hepe., “kulovoka nakuya.”
^ Hepe., “kulovoka nakuya.”
^ Hepe., “Malunga vakuunda chove.”
^ Chipwe “munganda.”
