Yelemiya 39:1-18
39 Mumwaka wakusokesa 9 wachiyulo chaZetekiya mwangana wavaYuta, mukakweji wakusokesa 10, Nevukataneza* mwangana waMbavilone namaswalale jenyi vosena vejile kuYelusalema, kaha vayihakile muchingombela.+
2 Jino mumwaka wakusokesa 11 wachiyulo chaZetekiya, mukakweji wamuchiwana, halikumbi lyakusokesa 9, vatuvile kembwe yanganda.+
3 Kaha vilolo jamwangana waMbavilone vosena vengilile mukachi, vatwamine muChikolo chaHakachi.+ Vilolo kana vapwile Nelengale-shaleze uze apwile Samangale, naNevo-Salasekime uze apwile Lavesalise,* naNelengale-shaleze uze apwile Lavamange,* navilolo veka vamwangana waMbavilone vosena.
4 Kahomu Zetekiya mwangana wavaYuta namaswalale vosena vamwene vaze vilolo, vachinyine.+ Valovokele munganda naufuku kuzachisa jila yakumilemba yamwangana, kaha vahichile muchikolo chapwile hakachi kajikembwe jivali. Vayile lika mujila yakuya kuAlava.+
5 Oloze maswalale javaKalateya vahangasanyine Zetekiya namaswalale jenyi, kaha vawanyine Zetekiya muchinema chaYeliko.+ Vamukwachile, vamunehele kuli Nevukataneza* mwangana waMbavilone kuLivila+ mungalila yaHamate.+ Oku kukiko amusopeselele.
6 Mwangana waMbavilone ajihilile vana vaZetekiya kuze kuLivila. Avajihilile hameso aZetekiya. Kaha ajihile nawa vatu vavalemu vamuYuta vosena.+
7 Kufumaho atuvile Zetekiya meso, kaha amukashile namalenge aunengu nakumutwala kuMbavilone.+
8 Kaha vaKalateya vochele zuvo* yamwangana najizuvo javatu vosena.+ Kufumaho vapuzwile kembwe yaYelusalema.+
9 Nevuzalatane+ mukulwane wavaka-kulama mwangana ambachile vatu vaze vasalile munganda, navaze valitwalile vavene kuli ikiye, navatu veka, avatwalile muufunge kuMbavilone.
10 Oloze Nevuzalatane mukulwane wavaka-kulama mwangana asezele vatu vamwe vakuhutwa mulifuchi lyaYuta, vaze kavapwile nachuma numba chimweko. Avahanyine nawa mulimo wakuzata mumande amivinyo namumande eka.*+
11 Jino Nevukataneza* mwangana waMbavilone alwezele Nevuzalatane mukulwane wavaka-kulama mwangana mazu ano kutalisa kuli Yelemiya ngwenyi:
12 “Mbata Yelemiya umulame. Kanda naumulemekako. Kaha muhane vyeshovyo mwakulomba.”+
13 Ngocho Nevuzalatane mukulwane wavaka-kulama mwangana, naNevushazavane uze apwile Lavesalise,* naNelengale-shaleze uze apwile Lavamange,* navilolo jamwangana waMbavilone vosena vatumine vatu
14 vakafumise Yelemiya muChipango chaVaka-kulama.+ Vamumbachile, vamuhanyine kuli Ngetaliya+ mwanaAhikame,+ Ahikame mwanaShafwane+ mangana amutwale kuzuvo yenyi. Ngocho Yelemiya atwaminenga jino hamwe navatu.
15 Omu Yelemiya vamukashile muChipango chaVaka-kulama,+ Yehova ahanjikile kuli ikiye ngwenyi:
16 “Yako ukalweze Evete-meleke+ kaEchopa ngwove, ‘Yehova wamayongomena, Kalunga kaIsalele nambe ngwenyi: “Tala, nangukatesamo mazu ngunahanjika akuneha lupi hanganda yino keshi vyuma vyamwazako. Kahove naukalimwena nameso ove omu nawakatesamo mazu ami halikumbi lize.”’
17 “Yehova nambe ngwenyi, ‘Oloze ove nangukakupululula halikumbi lize. Kaveshi kukakuhana mumavoko amalunga vaze uli nakwivwa womako.’
18 “Yehova nambe ngwenyi, ‘Nangukakuyovola, kaweshi kukafwa kupoko yamukwaleko. Naukapululula mwono wove*+ mwomwo wangufwelelele.’”+
Kwinyikila Chamwishi
^ Hepe., “Nevukataleza,” kusoneka chikwavo.
^ Muvisoneka vyeka vyachiHepeleu vasoneka ngwavo, “Nelengale-shaleze, naSamangale-nevo, naSalasekime, naLavesalise.”
^ Chipwe “apwile mukulwane wavaka-kulinga visava (muka-kuzachisa vatanganyika).”
^ Hepe., “Nevukataleza,” kusoneka chikwavo.
^ Chipwe “nganda.”
^ Chipwe pamo, “Avahanyine nawa milimo yaundungo.”
^ Hepe., “Nevukataleza,” kusoneka chikwavo.
^ Chipwe “apwile mukulwane wavilolo jamwangana.”
^ Chipwe “apwile mukulwane wavaka-kulinga visava (muka-kuzachisa vatanganyika).”
^ Chipwe “Naukapuluka namwono wove.”
