Yelemiya 40:1-16
40 Yelemiya atambwile mazu kufuma kuli Yehova omu Nevuzalatane+ mukulwane wavaka-kulama mwangana amwechele kuLama+ aliyile kwenyi. Kuchihela kana kukiko amutwalile Nevuzalatane oku namukase malenge. Kaha apwile hali vafunge vamuYelusalema namuYuta vaze vapwile nakutwala kuMbavilone.
2 Uze mukulwane wavaka-kulama mwangana asanyikile Yelemiya kupenge, ambile kuli ikiye ngwenyi: “Yehova Kalunga kove ahanjikile vyakuneha lupi hachihela echi.
3 Ngocho Yehova nanehe lupi kanelu nganomu ahanjikile, mwomwo munalingi shili kuli Yehova, kamwononokele mulizu lyenyiko. Shikaho munamwena lupi elu.+
4 Likumbi lyalelo nangukujitula awa malenge ali kumavoko ove. Nge unasake, tuyenga hamwe kuMbavilone, nangukakulama. Oloze nge kawasakile kuya nayami kuMbaviloneko, kaha litwamine kwove. Tala! Lifuchi lyosena lili mumavoko ove. Yako kweshokwo nausakula.”+
5 Shimbu kanda Yelemiya anyinguluke nakuya, Nevuzalatane ambile kuli ikiye ngwenyi: “Kinduluka kuli Ngetaliya+ mwanaAhikame,+ Ahikame mwanaShafwane+ uze vanasakula kuli mwangana waMbavilone ayule jinganda jamuYuta, ukatwame nenyi nakuyoya hamwe navatu. Nge pimbi, kaha yako kweshokwo nausakula.”
Jino uze mukulwane wavaka-kulama mwangana amuhanyine vyakulya nawana, kaha amusuwile ayenga.
6 Ngocho Yelemiya ayile kuli Ngetaliya mwanaAhikame kuMijipa,+ kaha akatwamine nenyi nakuyoya hamwe navatu vaze vasalile mulifuchi.
7 Kutwala muze tupitau twamaswalale vosena vaze vapwile muchipapa namaswalale javo vevwile ngwavo mwangana waMbavilone natongola Ngetaliya mwanaAhikame ayulenga lifuchi. Vevwile nawa ngwavo namutongola ayulenga vaka-kuhutwa, malunga, namapwevo navana vaze kavayile kuMbaviloneko.+
8 Ngocho vayile kuli Ngetaliya kuMijipa.+ Tupitau kana vapwile Ishimele+ mwanaNetanyiya, naYohanane+ naYonatane vana vaKaleya, naSelaya mwanaTanahumete, navana vaEfwai wakuNetofwa, naYezanyiya+ mwanauze lunga wakuMakate. Vayile hamwe namaswalale javo.
9 Jino Ngetaliya mwanaAhikame, Ahikame mwanaShafwane alishingile kuli vakiko nakuli maswalale javo, kaha ambile ngwenyi: “Kanda namwivwa woma wakupwa vangamba javaKalateyako. Twamenu mulifuchi lino muzachilenga mwangana waMbavilone, kaha vyuma navimiwahilanga.+
10 Ami nangutwama kuMijipa mangana ngumimanyineko kuli* vaKalateya vaze naveza kuli etu. Oloze enu kungululenu vinyo, namihako yahangonde yanonga, namaji nakuvihaka muvitenga vyakulamina vyuma. Kaha twamenu mujinganda jize munahete.”+
11 Jino vaYuleya vosena vaze vapwile kuMowave, nakuAmone, nakuEtome, navaze vapwile kumafuchi eka osena vevwile ngwavo mwangana waMbavilone naseze vatu vamwe muYuta. Kaha natongola Ngetaliya mwanaAhikame, Ahikame mwanaShafwane avayulenga.
12 Ngocho vaYuleya vosena vaputukile kukinduluka kufuma kuvihela vyosena kuze valimwangilile, vejile kuli Ngetaliya kuMijipa mulifuchi lyaYuta. Vakungulwile vinyo vyavivulu chikuma namihako yahangonde yanonga.
13 Yohanane mwanaKaleya natupitau twamaswalale vosena vaze vapwile muchipapa vejile kuli Ngetaliya kuMijipa.
14 Vambile kuli ikiye ngwavo: “Uno kawatachikijileko ngwove Mbalise mwangana wavaAmone+ natumu Ishimele mwanaNetanyiya ezenga nakukujiha* nyi?”+ Oloze Ngetaliya mwanaAhikame kavafweleleleko.
15 Jino Yohanane mwanaKaleya alwezele Ngetaliya kupenge kuMijipa ngwenyi: “Nguli nakusaka kuya nakujiha Ishimele mwanaNetanyiya, kaha naumwe mwatachikiza wauchi. Mwomwo ikaze mwakujihila* nakulingisa jino vaYuta vosena vaze vanakunguluka kuli ove valimwange, navaYuta vaze vanasaleho vanonge?”
16 Oloze Ngetaliya+ mwanaAhikame ambile kuli Yohanane mwanaKaleya ngwenyi: “Kanda naulinga chuma kanako, uli nakumuvangila Ishimele.”
Kwinyikila Chamwishi
^ Hepe., “mangana ngwimane kumeso.”
^ Chipwe “nakujiha mwono wove.”
^ Chipwe “ikaze mwajihila mwono wove.”
