Yelemiya 42:1-22
42 Jino tupitau twamaswalale vosena, naYohanane+ mwanaKaleya, naYezanyiya mwanaHoshaya, navatu vamokomoko navava vavalemu vosena vejile
2 kuli kapolofweto Yelemiya. Vambile kuli ikiye ngwavo: “Ivwilila kukulembelela chetu, kaha tulombeleko kuli Yehova Kalunga kove. Lombelako vatu vosena ava vanasaleho mwomwo vanapu vavandende nganomu unalimwena.+
3 Yehova Kalunga kove atulweze jila twatela kukavangiza navyuma twatela kulinga.”
4 Kapolofweto Yelemiya ambile kuli vakiko ngwenyi: “Vyuma munahanjika ngunavivu. Nangumilombelako kuli Yehova Kalunga kenu nganomu munangulweze. Kaha mweshomwo mwamikumbulwila Yehova nangumilweza. Kangweshi kumiswekela chuma numba chimweko.”
5 Vakiko vambile kuli Yelemiya ngwavo: “Yehova apwenga chinjiho wamuchano, wakushishika, kaha atupayise kachi nge natuzeneka kulinga vyuma mwatulweza Yehova Kalunga kove kuhichila muli ove.
6 Natwononoka mulizu lyaYehova Kalunga ketu ou tunakulweze uyenga ukatwihwileko, numba nge vyuma mwatulweza navipwa vyamwaza chipwe vyavipi. Natwononoka mulizu lyaYehova Kalunga ketu mangana vyuma vituwahile.”
7 Omu mwahichile makumbi 10, Yehova ahanjikile kuli Yelemiya.
8 Ngocho Yelemiya asanyikile Yohanane mwanaKaleya, natupitau twamaswalale vosena vaze apwile navo, navatu vamokomoko navava vavalemu vosena.+
9 Ambile kuli vakiko ngwenyi: “Yehova Kalunga kaIsalele ou mwangutumangako nguyenga nakumulweza kulembelela chenu nambe ngwenyi:
10 ‘Kachi nge namutwama lika mulifuchi lino, kaha nangumitunga, kangweshi kumipuzulako, nangumitumba, kangweshi kumivunyako. Nangwivwa kupihya halupi elu ngunaminehela.+
11 Kanda namwivwa woma mwangana waMbavilone ou mweji kwivwanga womako.’+
“Yehova nambe ngwenyi, ‘Kanda namumwivwa womako mwomwo ami nguli nayenu. Nangumilwila nakumipululula mulivoko lyenyi.
12 Nangumivwila keke,+ kaha naikiye mwamivwila keke nakumikindulwisa kulifuchi lyenu.
13 “‘Oloze kachi nge namwamba ngwenu, “Katute kutwama muno mulifuchi,” kachi nge namukana kwononoka mulizu lyaYehova Kalunga kenu
14 nakwamba ngwenu, “Natuya nakutwama kulifuchi lyaEjipitu+ kuze katweshi kukamona jita, chipwe kwivwa chivumo chaluneta, chipwe kwivwa zala,”
15 kaha ivwenu vyuma nahanjika Yehova, enu vaYuta munasaleho. Yehova wamayongomena, Kalunga kaIsalele nambe ngwenyi: “Kachi nge namuya nakutwama* kuEjipitu nge omu muli nakufwila,
16 kaha poko yamukwale eyi muli nakwivwa woma nayikamiwana kuze kulifuchi lyaEjipitu. Zala yakalombolombo nawa eyi muli nakuchina nayikamiwana kuEjipitu, kaha namukafwilako.+
17 Vatu vosena vaze vali nakufwila kuya kuEjipitu nakukatwamako navakafwa kupoko yamukwale, nakuzala yakalombolombo, nakumusongo wachihita. Naumwe wauchi mwakayovoka chipwe kupuluka kulupi nangukavanehela.”’
18 “Yehova wamayongomena, Kalunga kaIsalele nambe ngwenyi: ‘Nganomu ngwakwachilile vatu vamuYelusalema utenu namatoto,+ nayenu nangumikwachila utenu kachi nge namuya kuEjipitu. Namukakomwesa vatu, kaha navakamyangulanga, nakumishinga, nakumitoleka.+ Kamweshi kukamona cheka chihela chinoko.’
19 “Enu vaYuta munasaleho, Yehova namikande. Kanda namuya kuEjipituko. Anukenu vyuma ngunamihuhumuna likumbi lyalelo
20 ngwami kuhenga chenu nachihichikisamo myono yenu. Enu mwangutumanga kuli Yehova Kalunga kenu ngwenu, ‘Tulombeleko kuli Yehova Kalunga ketu, tulweze vyuma vyosena mwahanjika Yehova Kalunga ketu, kaha natuvilinga.’+
21 Kaha ngunamilweze likumbi lyalelo, oloze enu munakane kwononoka mulizu lyaYehova Kalunga kenu. Kamute kulinga vyuma nangutumu ngumilwezeko.+
22 Ngocho tachikizenu ngwenu namukafwila kulifuchi muli nakusaka kuya nakutwama. Namukafwa kupoko yamukwale, nakuzala yakalombolombo, nakumusongo wachihita.”+
Kwinyikila Chamwishi
^ Chipwe “nakutwama tando yayindende.”
