Yelemiya 43:1-13
43 Omu Yelemiya akumishile kulweza vatu vosena vyuma vize ahanjikile Yehova Kalunga kavo, vyuma vyosena vize Yehova Kalunga kavo amutumine kuya nakuvalweza,
2 Azaliya mwanaHoshaya, naYohanane+ mwanaKaleya, namalunga vakazamuzamu vosena vambile kuli ikiye ngwavo: “Vyuma uli nakuhanjika vyamakuli. Yehova Kalunga ketu kakutumine uhanjike ngwove, ‘Kanda namuya nakutwama kuEjipituko.’
3 Oloze Mbaluke+ mwanaNeliya ikiye ali nakukusowangiza utuhane mumavoko avaKalateya mangana vatujihe chipwe kututwala muufunge kuMbavilone.”+
4 Ngocho Yohanane mwanaKaleya, natupitau twamaswalale vosena, navatu vosena kavononokele mazu aYehova aze avalwezele ngwenyi vatwame mulifuchi lyaYutako.
5 Yohanane mwanaKaleya, natupitau twamaswalale vosena, vambachile vaYuta vosena vaze vasalileho, vaze vafumine kumafuchi kuze vavamwangilile nakwiza vatwame mulifuchi lyaYuta, kaha vayile navo.+
6 Vambachile malunga, namapwevo, navana, navana vamwangana vamapwevo, navatu vosena* vaze Nevuzalatane+ mukulwane wavaka-kulama mwangana asezele mumavoko aNgetaliya+ mwanaAhikame,+ Ahikame mwanaShafwane.+ Vambachilile kumwe nakapolofweto Yelemiya naMbaluke mwanaNeliya.
7 Kavononokele mazu aYehovako, ngocho vayile kulifuchi lyaEjipitu. Kutwala muze vakahetele kuTapanese.+
8 Jino Yehova ahanjikile kuli Yelemiya kuTapanese ngwenyi:
9 “Mbata malolwa amanene uwasweke mutumenga vaze vanale muchikolo chazuvo yaFwalo muTapanese, kaha salimbaho ndaka. Vyuma kana vilinge oku vaYuleya vali nakumona.
10 Kaha valweze ngwove, ‘Yehova wamayongomena, Kalunga kaIsalele nambe ngwenyi: “Nangukasanyika ngamba yami Nevukataneza* mwangana waMbavilone,+ kaha nangukahaka litanda lyenyi hamalolwa awa ngunasweke. Mwakatanduwila mbalaka yenyi yawangana hamalolwa kana.+
11 Mwakeza nakunongesa lifuchi lyaEjipitu.+ Weshowo atela kukafwa kumusongo wachihita mwakafwa kumusongo wachihita, weshowo atela kukaya muufunge mwakaya muufunge, kaha weshowo atela kukafwa kupoko yamukwale mwakafwa kupoko yamukwale.+
12 Nangukocha jizuvo* jatulunga vamuEjipitu.+ Nevukataneza ikiye mwakajocha, kaha mwakatwala tulunga kana muufunge. Mwakalikupilika lifuchi lyaEjipitu nganomu kafunga eji kulikupilikanga chikuto chenyi. Kaha mwakaya mukuunda.*
13 Nevukataneza mwakapuzwojola jipanda* jaMbete-shemeshe* mulifuchi lyaEjipitu, kaha mwakocha jizuvo* jatulunga vamuEjipitu.”’”
Kwinyikila Chamwishi
^ Chipwe “namyono yosena.”
^ Hepe., “Nevukataleza,” kusoneka chikwavo.
^ Chipwe “jitembele.”
^ Chipwe “mwakaya chakuzeneka kumulemeka.”
^ Chipwe “mwakapuzwojola malolwa akwanukilaho.”
^ Chipwe “jaZuvo (Tembele) yakalunga Likumbi,” kulumbununa Helyopolise.
^ Chipwe “jitembele.”
