Yelemiya 44:1-30
44 Awa akiko mazu atambwile Yelemiya mangana awalweze vaYuleya vosena vaze vatwaminenga mulifuchi lyaEjipitu,+ kuMingitole+ nakuTapanese,+ nakuNofwe,*+ nakungalila yaPatalose:+
2 “Yehova wamayongomena, Kalunga kaIsalele nambe ngwenyi, ‘Munamono lupi ngwanehele haYelusalema+ nahajinganda jamuYuta josena. Oholyapwa jino jinapu jingundu, naumwe wauchi ali nakutwamamo.+
3 Ngwanehele lupi kana mwomwo yavyuma vyavipi mwalingilenga vize vyangwivwishilenga kupihya. Mwalumbililenga tulunga veka vimuna vakuvatula+ nakuvazachila. Enu navakakuluka jenu kamwatachikijile tulunga kanako.+
4 Ngwamituminyinenga vangamba jami, vapolofweto vosena mapapa kakavulu ngwami: “Kanda namulinga chumechi chaunyengwe ngwahungako.”+
5 Oloze kamwangwivwililileko chipwe kutengeleka matwitwi enu kuli ami mangana museze vilinga vyenu vyavipi vyakulumbila tulunga veka+ vimuna vakuvatula.
6 Ngocho utenu wami namatoto ami vyapwile nge kakahya kaze kapwile nakwenya mujinganda jamuYuta namujijila jaYelusalema. Ngwajinongesele, kaha jasala ngundu nganomu jili oholyapwa.’+
7 “Yehova Kalunga wamayongomena, Kalunga kaIsalele nambe ngwenyi, ‘Ikaze muli nakulinehela lupi enu vavene?* Ikaze namulingishila malunga, namapwevo, navanyike, navakemba vanonge muYuta chakuzeneka mutu wakusalaho?
8 Ikaze muli nakungwivwishila kupihya navilinga vyenu vyakulumbila tulunga veka vimuna vakuvatula mulifuchi lyaEjipitu muze muli nakutwama? Namunonga, kaha vaka-mafuchi osena navakamyangulanga nakumitoleka.+
9 Uno munavulyama vilinga vyavipi vyavakakuluka jenu, navilinga vyavipi vyavamyangana javaYuta+ navyevi vyamapwevo javo,+ navilinga vyenu vyavipi navyevi vyamapwevo jenu+ vize mwalingilenga mulifuchi lyaYuta namujijila jaYelusalema nyi?
10 Putu kushikulu kamwalinyisako. Kamwangwivwa woma+ chipwe kukavangiza jishimbi jami najindongi jami jize ngwamihanyine enu navakakuluka jenuko.’+
11 “Ngocho Yehova wamayongomena, Kalunga kaIsalele nambe ngwenyi, ‘Ngunajinyi kuminehela lupi, kaha nangunongesa vaYuta vosena.
12 Nangukwata vaYuta vanasaleho vaze vafwililile kwiza kulifuchi lyaEjipitu nakutwamako, kaha vosena navanongela mulifuchi lyaEjipitu.+ Navalindumuka kupoko yamukwale nakuzala yakalombolombo. Vatu vamokomoko navava vavalemu vosena navafwa kupoko yamukwale nakuzala yakalombolombo. Navakomwesa vatu, kaha navavangulanga, nakuvashinga, nakuvatoleka.+
13 Nanguzangamisa ava vatu vali nakutwama mulifuchi lyaEjipitu. Nanguvazangamisa napoko yamukwale, nazala yakalombolombo, namusongo wachihita+ nge muze ngwazangamishile vaze vatwaminenga muYelusalema.
14 VaYuta vaze vanasaleho, vaze vaneza nakutwama mulifuchi lyaEjipitu kaveshi kupuluka nakukinduluka kulifuchi lyaYutako. Navafwilanga* kukinduluka vakatwame kuze, oloze kaveshi kukakindulukako. Nakupuluka kaha vavandende vaze navakakinduluka.’”
15 Jino malunga vosena vaze vatachikijile ngwavo mapwevo javo valumbililenga tulunga veka vimuna vakuvatula, nalizavu lyalinene lyamapwevo vaze vemanyine kuze, navatu vosena vaze vatwaminenga kuPatalose+ mulifuchi lyaEjipitu,+ vambile kuli Yelemiya ngwavo:
16 “Katweshi kwivwilila mazu awa unatulweze mulijina lyaYehovako.
17 Natulinga vyuma tunahanjika natunwa twetu. Natulumbilanga Mwangana waMwilu waPwevo* vimuna vakuvatula, nakumuhana wana wavinyo+ ngana muze twalingilenga navakakuluka jetu, navamyangana jetu, navilolo jetu mujinganda jaYuta namujijila jaYelusalema, omu twalilenga nakwikuta nakutwama kanawa chakuzeneka kumona lupi.
18 Kufuma vene haze twalitwaminyine kulumbila Mwangana waMwilu waPwevo* vimuna vakuvatula nakumuhana wana wavinyo, tunatwamenga mukukalikiza, kaha tunanongo kupoko yamukwale nakuzala yakalombolombo.”
19 Vaze mapwevo vambile ngwavo: “Omu twalumbililenga Mwangana waMwilu waPwevo* vimuna vakuvatula nakumuhana wana wavinyo, malunga jetu vatwitavishilenga twochenga vindanda vize twatengelenga muchifwanyisa chenyi nakumuhana wana wavinyo.”
20 Jino Yelemiya ambile kuli malunga namapwevo javo navatu vosena vaze vapwile nakuhanjika kuli ikiye ngwenyi:
21 “Yehova anukile vimuna vakuvatula vaze mwahanyinenga navakakuluka jenu, navamyangana jenu, navilolo jenu, navatu veka mujinganda jamuYuta namujijila jaYelusalema,+ kahechi chamuvezwile kumuchima wenyi.
22 Kutwala muze Yehova kamyechelelele mutwaleho lika navilinga vyenu vyavipi, vyaunyengweko. Anongesele lifuchi lyenu, kaha lyakomwesele vatu. Valyangwilenga, kaha kamwatwama vatuko palanga nakulelo lino.+
23 Lupi elu lunamiwane mwomwo munalumbunga ava vimuna vakuvatula. Munalinginga shili kuli Yehova hakuzeneka kwononoka mulizu lyaYehova, najishimbi jenyi, najindongi jenyi, namazu enyi akwanukisa.”+
24 Yelemiya ambile nawa kuli vatu vosena namapwevo vosena ngwenyi: “Enu vaYuta muvosena muli nakutwama mulifuchi lyaEjipitu, ivwenu vyuma nahanjika Yehova.
25 Yehova wamayongomena, Kalunga kaIsalele nambe ngwenyi, ‘Enu namapwevo jenu mwambile ngwenu: “Natutesamo jishiko jetu jakulumbila Mwangana waMwilu waPwevo* vimuna vakuvatula nakumuhana wana wavinyo.”+ Kaha vyuma mwahanjikile vikiko munalingi. Shikaho enu mapwevo, twalenuho kutesamo jishiko jenu mwalishikile.’
26 “Shikaho enu vaYuta muvosena muli mulifuchi lyaEjipitu, ivwenu vyuma nahanjika Yehova. ‘Yehova nambe ngwenyi: “Ngunalishingi lijina lyami lyalinene ngwami, vaYuta+ vaze vali mulifuchi lyaEjipitu lyosena kaveshi kukalishinga cheka lijina lyamiko ngwavo, ‘Omu ayoya Mwata Wakulitulaho Yehova tu!’+
27 Nguli nakuminyingilila, kaha nanguminehela lupi keshi vyuma vyamwazako.+ Enu vaYuta muvosena muli mulifuchi lyaEjipitu namunonga kupoko yamukwale nakuzala yakalombolombo palanga nomu namukuma muvosena.+
28 Nakupwa vavandende kaha vaze navapuluka kupoko yamukwale, vaze navafuma mulifuchi lyaEjipitu nakukinduluka kulifuchi lyaYuta.+ Ngocho vaYuta vaze vasalileho vosena, vaze vejile nakutwama mulifuchi lyaEjipitu navakatachikiza numba nge mazu ami akiko anatesamo nyi avo.”’”
29 “Yehova nambe ngwenyi, ‘Nangumihana chinjikizo chakusolola nge nangumizangamisa muchihela chino, mangana mutachikize ngwenu mazu aze ngwahanjikile ngwami nangukaminehela lupi nawatesamo.
30 Yehova nambe ngwenyi: “Fwalo Hofwola mwangana waEjipitu nangumuhana mumavoko avaka-kole jenyi, mumavoko avaze vali nakusaka kumujiha. Nangumuhana nge muze ngwahanyine Zetekiya mwangana wavaYuta mumavoko aNevukataneza* mwangana waMbavilone uze apwile muka-kole wenyi, uze asakilenga kumujiha.”’”+
Kwinyikila Chamwishi
^ Chipwe “nakuMemefwise.”
^ Chipwe “nakunehela myono yenu lupi.”
^ Chipwe “Navazundulanga myono yavo.”
^ Vulukiso yakalunga wapwevo uze valemeselenga vaIsalele vakulikanga. Apwile pamo kalunga walusemo.
^ Vulukiso yakalunga wapwevo uze valemeselenga vaIsalele vakulikanga. Apwile pamo kalunga walusemo.
^ Vulukiso yakalunga wapwevo uze valemeselenga vaIsalele vakulikanga. Apwile pamo kalunga walusemo.
^ Vulukiso yakalunga wapwevo uze valemeselenga vaIsalele vakulikanga. Apwile pamo kalunga walusemo.
^ Hepe., “aNevukataleza,” kusoneka chikwavo.
