Yelemiya 46:1-28
46 Yehova alwezele kapolofweto Yelemiya mazu akupandama kuli vaka-mafuchi.+
2 Awa akiko mazu ahanjikile hali Ejipitu,+ hali maswalale jaFwalo Neko+ mwangana waEjipitu uze apwile kuKalwiji Yufwalate, uze vafungulwile kuli Nevukataneza* mwangana waMbavilone kuKalakemishe mumwaka wamuchiwana wachiyulo chaYehoyakime+ mwanaYoshiya mwangana wavaYuta:
3 “Wahisenu mikingo* yenu najikepwe jenu jajinene,Kaha yenunga kujita.
4 Enu vaka-kutambukila hatuvalu, lemenu tuvalu twenu, nyinenu hatuvalu.Imanenu muvihela vyenu, vwalenu matepa enu akukola.Kalulenu makunga enu, vwalenu tuhuma venu vavikungo.
5 Yehova nambe ngwenyi, ‘Mwomwo ika vanalizuzukila nawoma?Vali nakukinduluka nakuchina, vatu javo vaka-kwasa jita vananongo.Vanevu woma nakuchina, vatu javo vaka-kwasa jita kavatalile kunyimako.Kaha kuvihela vyosena kuli nakwivwisa woma.
6 Vaka-jimbushi navaka-kwasa jita vanahono kuchina.Vanahukana nakuholokelaKunote, kungenge yaKalwiji Yufwalate.’+
7 Iya ou ali nakwiza nge meya alivaji amuKalwiji Nyile,Nge meya amavulu amutulwiji?
8 Ejipitu ikiye ali nakwiza nge meya alivaji amuKalwiji Nyile,+Nge meya amavulu amutulwiji.Ali nakwamba ngwenyi, ‘Nanguya ngukafwike hamavu hosena.Nangunongesa nganda navaze vatwamamo.’
9 Enu tuvalu, yenunga.Enu vaka-matemba, tambukisenu jimbushi.Kaha vaka-kwasa jita vayenga,VaKushe navaPute vaze vatachikiza kuzachisa jikepwe,+NavaLute+ vaze vatachikiza kulema mata amanana nakuwasa.+
10 “Likumbi kana linapu likumbi lyaMwata Wakulitulaho, Yehova wamayongomena. Linapu likumbi lyakulinga sambanjinga kuli vaka-kole jenyi. Kaha poko yamukwale nayikalya nyama yavo nakwikuta, nayikanwa manyinga avo nakuvatula lipwila lyayo, mwomwo Mwata Wakulitulaho, Yehova wamayongomena mwakavatula* vimuna mulifuchi lyakunote, kungenge yaKalwiji Yufwalate.+
11 Ove mwanapwevo Ejipitu,Yako kuNgileyate ukambate maji ambalasamu.+Unalishinyi tuhu kulivulishila vitumbo,Mwomwo kakweshi vitumbo vyakukukako.+
12 Vaka-mafuchi vanevu omu unasauka,+Miteto yove yinevwakana mulifuchi lyosena.Vaka-kwasa jita vali nakuhukana hali vakwavo vaka-kwasa jita,Kaha vosena vali nakulimbwojoka.”
13 Yehova ahanjikile kuli kapolofweto Yelemiya kutalisa kuli Nevukataneza* mwangana waMbavilone uze apwile nakwiza nakunongesa lifuchi lyaEjipitu+ ngwenyi:
14 “Vilikenu chumechi muEjipitu, chambululenu muMingitole.+Chambululenu muNofwe* namuTapanese.+Vilikenu ngwenu, ‘Imanenu muvihela vyenu, liwahisenu,Mwomwo poko yamukwale nayilyana kuvihela vyosena.
15 Vatu jenu vangolo vanavanongesela ika?Kavahashile kujikiza nakwimanako,Mwomwo Yehova navalimbwila hamavu.
16 Vavavulu vali nakuhukana nakulimbuka.Vali nakulilweza mwavomwavo ngwavo:“Tukatukenu! Tukindulukenu kwimbo lyetu, kuvatu jetuMangana tuchine poko yamukwale.”’
17 Vali nakuvilika kuze ngwavo,‘Fwalo mwangana waEjipitu ali nakutavwa kaha,Nechelela vyuma* vimuhite.’+
18 Mwangana ukwechi lijina lyenyi ikiye Yehova wamayongomena nambe ngwenyi, ‘Omu ngwayoya tu,Mwakeza,* kaha mwakasoloka nge pili yaTavole+ hajipili jikwavo,Mwakasoloka nge pili yaKalamele+ kukalungalwiji.
19 Ove mwanapwevo uli nakutwama muEjipitu,Longejeka viteli vyove uyenga navyo muufunge.Mwomwo Nofwe* nayikakomwesa vatu.Navakayocha nakakahya,* kaha kamweshi kukatwama vatuko.+
20 Ejipitu napu nge mwanangombe wakununa,Oloze kunote nakukafuma vikesu vaze navakamusuma.
21 Numba tuhu maswalale vaze nakumuna vanapu nge vana vavangombe vakununa,Oloze navakiko vanakinduluka nakuchina.Kavahashile kujikiza nakwimanako,+Mwomwo likumbi lyavo lyakumona lupi linahete,Lwola lwakuvasopesa lunahete.’
22 ‘Vyema vyenyi vinapu nge mulukushu walinoka uze ali nakuchina,Mwomwo vaka-kole vangolo vanamukatukila najingimbu,Nge malunga vaze vali nakupakula mitondo.’*
23 Yehova nambe ngwenyi, ‘Navakapakula musenge wenyi, numba tuhu unajiki chikuma.Mwomwo vanapu vavavulu kuhambakana vambimba makumbi, kaveshi kuhasa kuvalavako.
24 Mwanapwevo Ejipitu navakamwivwisa sonyi.Navakamuhana mumavoko avatu vakunote.’+
25 “Yehova wamayongomena, Kalunga kaIsalele nambe ngwenyi: ‘Nanguzangamisa Amone+ wakuNo,*+ naFwalo, naEjipitu natulunga twenyi+ navamyangana jenyi. Nanguzangamisa Fwalo navosena vaze vamufwelela.’+
26 “Yehova nambe ngwenyi: ‘Nanguvahana mumavoko avaze vali nakusaka kuvajiha, mumavoko aNevukataneza* mwangana waMbavilone+ navangamba jenyi. Kutwala muze, muEjipitu namukatwamanga vatu nganomu chinapunga kunyima.’+
27 ‘Ove ngamba yami Yakova, kanda nawivwa womako,Ove Isalele, kanda naulizuzukila nawomako.+Mwomwo nangukulwila nakukufumisa kuchihela chakwakusuku.Kaha vaka-tanga* yove nawa nanguvafumisa kulifuchi kuze vanavakwate ufunge.+Yakova mwakinduluka, mwatwama mukuunda chakuzeneka kumuzungisa,Naumwe wauchi mwamwivwisa woma.’+
28 Yehova nambe ngwenyi: ‘Ami nguli nayove.Nangunongesa vatu vakumafuchi osena kuze ngunamimwangila.+Oloze ove kangweshi kukunongesako.+Nangukuzangamisa* mujila yakutamo,+Kangweshi kukwechelela chakuzeneka kukuzangamisako.’”
Kwinyikila Chamwishi
^ Hepe., “Nevukataleza,” kusoneka chikwavo.
^ Jikepwe jajindende jize vambachilenga vaka-kwasa mata amanana.
^ Chipwe “mwakajiha.”
^ Hepe., “Nevukataleza,” kusoneka chikwavo.
^ Chipwe “muMemefwise.”
^ Hepe., “Nechelela lwola vatongola.”
^ Kulumbununa, ou mwakafungulula Ejipitu.
^ Chipwe “Memefwise.”
^ Chipwe pamo, “Nayikasala ngundu.”
^ Chipwe “vali nakuchava jikunyi.”
^ Kukiko kuTevese.
^ Hepe., “aNevukataleza,” kusoneka chikwavo.
^ Hepe., “mbuto.”
^ Chipwe “Nangukwolola.”
