Yelemiya 49:1-39
49 Yehova nahanjika hali vaAmone+ ngwenyi:“Uno Isalele katwama navanako numba?Uno katwama naswanako numba?Nyi ikaze Malakame+ nahetela Ngate?+Ikaze vatu jaMalakame vali nakutwamina mujinganda jaIsalele?”
2 “Shikaho Yehova nambe ngwenyi, ‘Makumbi ali nakwizaOmu nangukevwakanyisa luvila lwajita yize yili nakwiza hanganda yaLava+ yavaAmone.+Navakayinongesa, kaha nayikasala malala,Jimbongi jajingilikako navakajocha nakakahya.’Yehova nambe ngwenyi, ‘Isalele mwakaheta lifuchi lyavaze vamutambwile lifuchi lyenyi.+
3 Ove Heshevone, lila jimbimbi mwomwo Ai vanayinongesa.Enu jimbongi jajingilika Lava, tetenu miteto.Vwalenu vikeleyi.Lilenu jimbimbi, hitanganenu kumemba amalolwa,*Mwomwo Malakame mwaya muufunge,Navapilishitu jenyi navilolo jenyi hohamwe.+
4 Ove mwanapwevo wakuhona kushishika,Ove wafwelela muluheto lwove,Ove weji kwambanga ngwove, “Iyaze mwangulukuka?”Ikaze weji kulisashilanga havinema* nahavyana vyove vyameya?’”
5 “Mwata Wakulitulaho, Yehova wamayongomena nambe ngwenyi, ‘Nangukunehela chuma chakukwivwisa woma,Nachifuma kuli vosena vaze vakujingilika.Navakumwangila kumitamba yosena,Kaha naumwe wauchi mwakakungulula vaze navachina.’”
6 “Yehova nambe ngwenyi, ‘Kutwala muze, nangukakungulula vaAmone vaze navaya muufunge.’”
7 Yehova wamayongomena nahanjika kutalisa kuli Etome ngwenyi:“Uno vatu vamangana vanakumu muTemane+ nyi?Uno vaze vanangakana vanahono kulweza vatu mangana tahi?Uno mangana anavakumu nyi?
8 Enu muli nakutwama muNdetane,+ chinenu, kindulukenu,Yenunga mukaswame muvinema,Mwomwo nangunehela Esau lupiOmu nangumuzangamisa.
9 Kachi nge vaka-kuhela mihako yamivinyo naveza muwande wove wamivinyo,Kutala kaveshi kuseza mihako yimwe yakuhuhwojolako nyi?Kachi nge veji naveza naufuku,Kutala kaveshi kwiva kaha vyuma vize vanasakeko nyi?+
10 Oloze Esau nangukamutambula vyuma vyosena.Nangukasolola vihela vyenyi vyakuswama,Mangana akazeneke kuswamako.Vana venyi, navandumbwenyi, navaze alihata navo vosena navakavanongesa,+Ikiye keshi kukapwako chekako.+
11 Seza vana vove vavanginga,Ami nanguvalama.Vatuliwe jove navangufwelelanga.”
12 Yehova nambe ngwenyi:
“Kachi nge vaze kavalwezele kunwa lupasa lwautenu wami navalunwa, kahove vakweche chakuzeneka kukuzangamisa nyi? Vatela kukuzangamisa, watela kunwa lupasa kana.”+
13 Yehova nambe ngwenyi, “Ngunalishingi ami ivene ngwami Mbozola navakayinongesa, kaha nayikakomwesa vatu,+ navakayitoleka, nakuyangula. Navakayinongesa ndolokoto, kaha jinganda jayo josena najikasala malala.”+
14 Ngunevu mujimbu unafumu kuli Yehova,Vanatumu muluwa muli vaka-mafuchi ambulule ngwenyi:“Likungulwilenu hamwe muyinyemukile.Lizangenu muyenga kujita.”+
15 “Tala, ngunakulingisa upwenga uwamokomoko muli vaka-mafuchi,Upwenga uwakulumbilisa muli vatu.+
16 Ove watwama mumwaji walilolwa,Ove watwama hapili yayisuku,Woma unevwisanga vakwenu,Namuchima wove wakazamuzamu vinakuhungumwisa.Numba tuhu unatungu uswa wove helu kwijiva nge ngonga,Oloze nangukutulula.” Omu mukiko mwanambe Yehova.
17 “Etome nayikomwesa vatu.+ Kaha vosena vaze navahita kuEtome navalikomokela nakulihaha halupi lwosena lunayiwane.
18 Nanguyinongesa ngana muze ngwanongesele Sotome naNgomola najimbongi jajingilikileko,+ kaha naumwe wauchi mwakatwamamo chipwe kutungamo.”+ Omu mukiko mwanambe Yehova.
19 “Talenu! Mutu umwe mweza kwijiva nge ndumba+ uze ali nakufuma mulivunda lyakuchikulo chaYotau. Mweza enyeke maulilo akukingiwa. Kaha mukapyapya kakandende, nangumulingisa achine kuli ikiye. Kufumaho nangutongola ou vasakula apwenga nawata hali ikiye. Mwomwo iyaze napu nge yami? Iyaze nahase kunguhonesa? Kafunga mukaze nahase kwimana kumeso ami?+
20 Shikaho enu vatu, ivwenu vyumevi najinyi Yehova hali Etome, navyevi nashinganyeka kulinga hali vaze vatwama muTemane:+Vana vamikoko navakavakokangiza.Mwakalingisa vihela vatwamamo vikasale ngundu mwomwo yavakiko.+
21 Mavu anandende omu vanaholoka.Vali nakuteta miteto.Miteto kana yinevwakana nakuKalungalwiji Uchila.+
22 Mwakanduka nakushikumuka nge ngonga uze mwahukula chuma chimwe,+Kaha mwatanduwila mavava enyi haMbozola.+Halikumbi kana, vaka-kwasa jita vaEtomeNavakalyonyinga nge pwevo uze ali nakusapuluka.”
23 Awa akiko mazu akutalisa kuli Ndamashiku:+“Hamate+ naAlapate vanavevwisa sonyi,Mwomwo vanevu mujimbu waupi.Muzuzu unavakwate.Kalungalwiji ali nakunganjanga lika.
24 Ndamashiku nalizuzukila nawoma.Nanyinguluka ngwenyi achine, oloze ali nakulichikimina.Ali nakwivwa kukola nakulyonyingaNge pwevo uze ali nakusapuluka.
25 Mwomwo ika vatu vanahonena kuseza nganda yize vanapunga nakwalisa?Mwomwo ika vanahonena kuseza mbongi yize vanalisambilanga?
26 Vakweze vamunganda kana navakalindumukila muvihela vyayo vyasanga,Kaha maswalale vosena navakanonga halikumbi kana.” Omu mukiko mwanambe Yehova wamayongomena.
27 “Nangukaswamika kembwe yaNdamashiku nakakahya,Kaha nakakocha tuposhi vakukola vaMbene-hatate.”+
28 Yehova nahanjika kutalisa kuli Ketale+ nakumawangana aHazole aze anongesele Nevukataneza* mwangana waMbavilone ngwenyi:“Katukenu, yenunga kuKetale,Kanongesenu vana vakuMututuko.
29 Navakavatambula jimbalaka javo namautanga avo,Navakavatambula mahina akujimbalaka javo navikumba vyavo vyosena.Navakavatambula vangamela javo,Vatu navakamba kuli vakiko ngwavo, ‘Kuvihela vyosena kuli nakwivwisa woma.’”
30 Yehova nambe ngwenyi: “Enu muli nakutwama muHazole, chinyinenu kwakusuku,Yenunga mukaswame kuvinema.Mwomwo Nevukataneza* mwangana waMbavilone najinyi kumilukuka,Najinyi kumilinga mwamupi.”
31 Yehova nambe ngwenyi: “Katukenu, nyemukilenu lifuchi eli lili mukuunda,Lifuchi lyakukingiwa.Kalyeshi navikolo chipwe natupachisoko. Vatu jalyo vatwama kwauka wavo.
32 Vangamela javatu vamulifuchi kana navakavapupa,Vimuna javo vavavulu navakavapukula.Vaze veji kuteulanga mavinji awevu wavo,+Nangukavapekumwina kumitamba yosena kuze kweji kuyanga peho.Nangukavanehela lupi kufuma kumitamba yosena.” Omu mukiko mwanambe Yehova.
33 “Hazole nayikapwa liuku lyavamyumbwe,Nayikapwa ngundu haya myaka yosena.Naumwe wauchi mwakatwamamo,Kakweshi kukapwa mutu mwakatungamoko.”
34 Jino kumaputukilo achiyulo chaZetekiya+ mwangana wavaYuta, Yehova ahanjikile kuli kapolofweto Yelemiya kutalisa kuli vaElame+ ngwenyi:
35 “Yehova wamayongomena nambe ngwenyi, ‘Nangukahokola uta wamanana wavaElame,+ haze hapendamina* ngolo javo.
36 Nangukahuhwisa peho yakumitamba yiwana yamavu hali vaElame, kaha nangukavapekumwina kumitamba yoseneyi. Navakalimwanga nakuya kumafuchi osena.’”
37 Yehova nambe ngwenyi: “VaElame nangukavevwisa woma kumeso avaka-kole javo vaze vali nakusaka kuvajiha. Nangukavakwachila utenu nakuvanehela lupi. Nangukavatumina poko yamukwale yikavahangasane palanga nomu nangukavalalisa.”
38 Yehova nambe ngwenyi: “Nangukahaka litanda lyami muElame,+ kaha nangukanongesa mwangana navilolo vamulifuchi kana.”
39 Oloze Yehova nambe ngwenyi: “Hamakumbi akukuminyina, nangukakungulula vaElame vaze navaya muufunge.”
Kwinyikila Chamwishi
^ Chipwe “kumemba amikoko.”
^ Chipwe “havyana.”
^ Hepe., “Nevukataleza,” kusoneka chikwavo.
^ Hepe., “Nevukataleza,” kusoneka chikwavo.
^ Hepe., “haputukila.”
