Yelemiya 5:1-31
5 Hitanganenu mujijila jaYelusalema.Talatalenu mumone.Tondetondenu muvihela vyasanga vyanganda kana tutaleNumba nge namuwanamo mutu wachiyulo,+Wakushishika.Kachi nge namumuwanamo, kaha nganda kana nanguyikonekela.
2 Numba tuhu vatu vamunganda kana veji kulishinganga ngwavo: “Omu ayoya Yehova tu,”Oloze veji kulishinganga vyuma vyamakuli.+
3 Ove Yehova, meso ove eji kutondatondanga vatu vakushishika.+Vatu jove wavavetele, oloze walishinyine kaha.*Numba tuhu hasalile hahandende nakuvanongesa vosena, oloze vakanyine kukwivwilila.+Michima* yavo yanjinjilile, yapwile yakukola kuhambakana lilolwa,+Vakanyine kwalumuka.+
4 Oloze ngwalyambile ngwami: “Vatu kana vapwa vamokomoko chikupu.Veji kulinganga vyuma vyauleya mwomwo kavatachikiza jijila jaYehovako,Kavatachikiza mwaya chiyulo chaKalunga kavoko.
5 Nanguya kuli vatu vavalemu nguhanjike navo,Vakiko vanatachikiza jijila jaYehova,Vanatachikiza mwaya chiyulo chaKalunga kavo.+Oloze vosena vanahokola toka yaKalunga,Vanapazwojola jikuli.”*
6 Shikaho ndumba eji kuvalukukilanga,Shikaho kangunge wamulikundu eji kuvajihilanga,Shikaho chisupa eji kuvaswaminyinanga kujinganda javo.Eji kutanyanga weshowo mwalovoka mujinganda kana.Mwomwo milonga yavo yakuzombwojoka jishimbi yinavulu,Kaha nawa vilinga vyavo vyakuhenga vinasweze.+
7 Kahaze nangumikonekela ngachilihi?Vana venu vananguseze,Veji kulishinganga chuma chize kachapwa Kalungako.+Ngwavahanyinenga vyuma vasakilenga,Oloze valingilenga lika ujila,Vaungililenga kuzuvo yamuka-ujila.
8 Vanapu nge tuvalu vali napeha chikuma,Mutu himutu ali nakuhwimasana mangana alisavale napwevo lyamukwavo.+
9 Yehova nambe ngwenyi: “Nanguvasopesa havyumevi vali nakulinga.Vaka-lifuchi kana nanguvashishishilamo.”+
10 “Yenunga muwande wenyi wamivinyo muwenyeke,Oloze kanda namuwenyeka wosenako.+Vatulenu miketengo yamuwande wenyi,Mwomwo miketengo kana keshi yaYehovako.
11 Vaze vakuzuvo yaIsalele navaze vakuzuvo yaYutaVanangumbembejeka chikuma.” Omu mukiko mwanambe Yehova.+
12 “Vanakane Yehova, kaha vali nakuhanjikanga ngwavo,‘Keshi kutulinga mumweko.*+Katweshi kumona lupiko.Poko yamukwale nazala yakalombolombo kavyeshi kwiza hali etuko.’+
13 Vapolofweto vali nakuhanjika vyuma vyamokomoko,Kaveshi nakuhanjika mazu amuchanoko.*Navakiko vapwenga vamokomoko ngana mwavyuma vali nakuhanjika.”
14 Ngocho Yehova Kalunga wamayongomena nambe ngwenyi:“Hakuwana nge vali nakuhanjika vyuma kana,Nanguhaka mazu ami mukanwa kove apwenga nge kakahya,+Kaha vakiko navapwa nge jikunyi,Ngocho kakahya kana nakavocha.”+
15 Yehova nambe ngwenyi: “Enu vakuzuvo yaIsalele, nangumikatwila lifuchi lyakwakusuku mangana limilukuke.+Lifuchi kana linatwame myaka yayivulu,Linashimbula chikuma.Vatu vatwamamo vahanjika lilimi lize kamwatachikizako,Vyuma veji kuhanjikanga nawa kamweshi kuhasa kuvivwako.+
16 Misakali yavo yinapu nge chimbumbe chamupolongwa.Vosena vapwa vaka-kwasa jita.
17 Navenyeka jimbuto jenu munahe navyakulya vyenu.+Navajiha vana venu vamalunga navava vamapwevo.Navajiha mikoko jenu navangombe jenu.Navapakula mivinyo yenu namikuyu yenu.Jinganda jenu jajikembwe jize mwafwelela navajinongesa najipoko jamikwale.”
18 Yehova nambe ngwenyi: “Oloze chipwe hamakumbi kana kangweshi kukaminongesa muvosenako.+
19 Kachi nge navakakuhulisa ngwavo, ‘Yehova Kalunga ketu natulingila ika ngana?’ Kahove ukavakumbulula ngwove, ‘Hakuwana nge mwamusezele nakuputuka kuzachila kalunga weka mulifuchi lyenu, ngocho namuzachila jino vatu mulifuchi lyeka.’”+
20 Vilikenu kuli vaze vakuzuvo yaYakova,Ambululenu muYuta ngwenu:
21 “Ivwenu, enu vatu vakuhulama, vakuzeneka mangana,*+Mukwechi meso, oloze kamweshi kumonako.+Mukwechi matwitwi, oloze kamweshi kwivwako.+
22 Yehova nambe ngwenyi: ‘Kutala kamwatela kungwivwa womako numba?Kutala kamwatela kunguchikimako numba?Ami yami ngwahakile usekeseke upwenga ngiza yakalungalwiji.Kalungalwiji keshi kukazomboka ngiza kanako haya myaka yosena.Numba tuhu makimba nawanganjanga ngachilihi, kaweshi kuzomboka ngiza kanako.Numba tuhu nawakatuka ngachilihi, kaweshi kuzomboka ngiza kanako.+
23 Oloze ava vatu vali namichima yakunjinjavala, yakulikanga.Vanapyapumuka nakunjinjimika mwauka wavo.+
24 Kaveshi kulyamba mumichima yavo ngwavo:“Twivwenu Yehova Kalunga ketu woma,Ou eji kunokesanga vula hangonde yayo,Ou eji kunokesanga vula yakulivanga navula yakukuminyina,Ou eji kulingisanga kupwenga vyalumingo vyakwaha.”+
25 Kuhenga chenu chikiko chinahonesa vyuma kana.Jishili jenu jikiko jinamiminyisa vyuma vyamwaza.+
26 Mwomwo hali vatu jami hali vatu vakuhuka.Veji kukekesanga nganomu mwalivemba muka-kwasa tujila.Veji kutanga miheto,Kaha veji kwozanga vatu.
27 Jizuvo javo jinazale navyuma vize vanahetela mumakuli,+Jinazale nge chingala* chize chinazale natujila.Shikaho vanapichi nakupwa naulemu.
28 Vanatoho nakushikima.Vilinga vyavo vyavipi vinavulu chikuma.Kaveshi kuyula kanawa vihande vyavana vakuzeneka masevoko.+Veji kulinganga ngocho mangana vafukile.Kaveshi kusopesa vaka-kuhutwa mwakwolokako.’”+
29 Yehova nambe ngwenyi: “Nanguvasopesa havyumevi vali nakulinga.Vaka-lifuchi kana nanguvashishishilamo.
30 Mulifuchi munalingiwa chumechi chakukomwesa, chakufwisa chishima:
31 Vapolofweto vali nakupolofweta vyuma vyamakuli,+Vapilishitu nawa vali nakuzachisa ngolo javo nakushinyinyika vatu.Kahomu mukiko vanazange vatu jami.+Oloze namulinga ngachilihi omu kukuma nachiza?”
Kwinyikila Chamwishi
^ Hepe., “oloze kavazeyeleko.”
^ Hepe., “Kumeso.”
^ Hepe., “Vanavatwojola mikole.”
^ Chipwe pamo, “Katwamakoko.”
^ Kulumbununa, mazu aKalunga.
^ Hepe., “vakuzeneka muchima.”
^ Chipwe “nge ngala.”
