Yelemiya 50:1-46
50 Awa akiko mazu ahanjikile Yehova kuli kapolofweto Yelemiya kutalisa kuMbavilone,+ lifuchi lyavaKalateya:
2 “Vilikenu chumechi muli vaka-mafuchi, chambululenu.Katulenu chinjikizo,* chambululenu.Kanda namusweka chuma numba chimweko.Ambenu ngwenu, ‘Mbavilone vanayitambula.+Mbele vanamwivwisa sonyi.+Melotake vanamwivwisa woma.Tuponya twenyi vanavevwisa sonyi.Makombelo enyi aunyengwe* vanawevwisa woma.’
3 Mwomwo lifuchi limwe lyakunote linamunyemukila.+Linalingisa lifuchi lyenyi likomwese vatu.Naumwe wauchi ali nakutwamamo.Vatu natunyama vosena vanachinyimo.Vosena vanayi.”
4 Yehova nambe ngwenyi, “Hamakumbi aze, nahalwola luze, vaIsalele navaYuta navakalikungulwila hamwe.+ Navakaya oku vali nakulila,+ kaha vosena navakatondatonda Yehova Kalunga kavo.+
5 Navakehula jila yakuya kuZeyone oku vanatale kuze.+ Navakamba ngwavo, ‘Twayenu tulipanjike kuli Yehova, tulishikenu nenyi lushiko lwahaya myaka yosena luze katweshi kukavulyamako.’+
6 Vatu jami vanapu nge utanga wamikoko unajimbala.+ Tufunga twavo vanavahungumwisa.+ Vanavatwale kujipili, kaha vali nakulumbwangila hajipili. Vanavulyama nachihela chavo chakunokela.
7 Vosena vaze vali nakuvawana vali nakuvalya,+ kaha vaka-kole javo vali nakwamba ngwavo, ‘Etu katweshi namulongako, vakiko valingile shili kuli Yehova uze apwa wakwoloka, Yehova uze vanafwelelanga vakakuluka javo.’”
8 “Chinenu muMbavilone,Fumenu mulifuchi lyavaKalateya,+Pwenu nge vizamba jamikoko vaze veji kutwaminyinanga utanga.
9 Mwomwo Mbavilone nanguyikatwilaLizavu lyavaka-mafuchi amanene akunote.+Navakayinyemukila mumazavu akulongesa kanawa.Kaha navakayitambula.Mivwi yavo yinapu nge mivwi yavaka-kwasa jita vangolo,Yize yeji kujihanga vana.+Kayeshi kukinduluka mavokovokoko.
10 Lifuchi lyavaKalateya navakalipupa.+Kaha vosena vaze navakambata vyuma vyakupupa mulifuchi kana navakekuta.”+ Omu mukiko mwanambe Yehova.
11 “Mwomwo mwawahilililenga+ nakulisambaOmu mwapukwilenga uswana wami.+Mwalyatangililenga uswana wami nge omu mwanangombe mwalyatangila mwila.Mwahwimasanyinenga kwijiva nge tuvalu.
12 Nenu nasauka.+Ou amisemene vanamwivwisa sonyi.Napu wakukuminyina hali vaka-mafuchi,Napu nge pambo yaumu, nge likundu.+
13 Vatu kaveshi kukatwama muMbaviloneko mwomwo yautenu waYehova.+Nayikasala ngundu.+Weshowo mwakahichilako mwakalikomokela,Mwakalihaha halupi lunayiwane.+
14 Enu muli nakulema mata amanana,Nyemukilenu Mbavilone kumitamba yosena mumazavu akulongesa kanawa.Yasenu, kanda namusezaho mwivu numba umweko,+Mwomwo yinalingi shili kuli Yehova.+
15 Yivilikenu luvila lwajita kumitamba yayo yosena.Yinasumu kupoko.*Jipanda jayo jinaholoka, kaha jikembwe jayo vanajipuzula,+Mwomwo Yehova ikiye nayilingi sambanjinga.+Yilingenu sambanjinga.Yilingenu nge omu yinamilinginga yikiko.+
16 Jihenu vaka-kukuva mbuto muMbaviloneNavaka-kukwata chekeshi hangonde yakwaha.+Mutu himutu mwakakinduluka kuvatu jenyi,Mwakachinyina kulifuchi lyenyi mwomwo yapoko yamukwale.+
17 “VaIsalele vanapu nge mikoko vaze vanalimwange.+ Vanavamwange kuli vandumba.+ Hakavanga mwangana wavaAsulya avalile.+ Kufumaho Nevukataneza* mwangana waMbavilone ambolokotele vifuwa vyavo.+
18 Ngocho Yehova wamayongomena, Kalunga kaIsalele nambe ngwenyi: ‘Mwangana waMbavilone nalifuchi lyenyi nangukamulinga nge muze ngwalingile mwangana waAsulya.+
19 Nangukakindulwisa Isalele kuulilo wenyi,+ kaha mwakalilanga kuKalamele nakuMbashane.+ Mwakalyanga nakwikuta hajipili jaEfwalime+ najeji jakuNgileyate.’”+
20 Yehova nambe ngwenyi: “Hamakumbi aze, nahalwola luze,Navakatondatonda mulonga waIsalele,Oloze kaveshi kukauwanako.Shili yaYuta nawa kaveshi kukayiwanako,Mwomwo nangukakonekela vaze nangukasezaho.”+
21 Yehova nambe ngwenyi: “Nyemukilenu lifuchi lyaMelataime navatu vakuPekote.+Vajihenu nakuvanongesa ndolokoto,Lingenu vyuma vyosena ngunamilweze.
22 Mulifuchi muli nakwivwakana vyema vyajita,Muli ukalu waunene.
23 Muveto wakuvetesa vaka-mavu vosena vanautete nakuuchika.+Mbavilone yili nakukomwesa vaka-mafuchi.+
24 Ove Mbavilone, ngunakutela muheto, kaha unafumo,Oloze ove kawatachikijileko.Vanakuwane, kaha vanakukwate+Mwomwo unemanyinanga Yehova nakole.
25 Yehova nasokolola muchisete chenyi,Kaha nalovola vitwa vyautenu wenyi.+Mwomwo Mwata Wakulitulaho, Yehova wamayongomena ali namulimo atela kuzataMulifuchi lyavaKalateya.
26 Nyemukilenu Mbavilone kufuma kuvihela vyakwakusuku.+Sokololenu visete vyayo.+Yilumbikenu nge milumba yajimbuto jamanona.Yinongesenu ndolokoto.+Kanda namusala mutu numba umweko.
27 Jihenu vangombe jayo vavakuji vosena.+Vosena vayenga kwakuvajihila.Lamba kuli vakiko, mwomwo likumbi lyavo lineza,Lwola lwakuvasopesa lunahete.
28 Kuli nakwivwakana vyema vyavatu vaze vali nakuchina,Vaze vali nakuchina mulifuchi lyaMbavilone,Mangana vakambulule omu Yehova Kalunga ketu nalingi sambanjinga,Vakambulule omu nalingi sambanjinga hatembele yenyi.+
29 Sanyikenu vaka-kwasa mata amanana vanyemukile Mbavilone,+Sanyikenu vosena vaze veji kulemanga mata amanana.Yihakenu muchingombela, kanda nakupwa mutu umwe mwachinako.Yizangamisenu nge kutesa navilinga vyayo.+Yilingenu nge omu yinamilinginga yikiko.+Mwomwo yinalivwimbi kumeso aYehova.Yinalivwimbi kumeso aYou Wajila waIsalele.+
30 Ngocho vakweze jayo navakalindumukila muvihela vyayo vyasanga,+Maswalale jayo vosena navakanonga* halikumbi kana.” Omu mukiko mwanambe Yehova.
31 Mwata Wakulitulaho, Yehova wamayongomena nambe ngwenyi: “Ove muka-kulikanga,+ ngunakwimanyina nakole,+Likumbi lyove lili nakwiza, lwola lwakukuzangamisa luli nakwiza.
32 Ove muka-kulikanga, naukahukana nakulimbuka,Naumwe wauchi mwakakukatula.+Nangukocha jinganda jove josena nakakahya,Kakahya kana nakakocha vyuma vyosena vinakujingilika.”
33 Yehova wamayongomena nambe ngwenyi:“VaIsalele navaYuta vali nakuvayanjisa,Kaha vosena vaze vanavakwate ufunge vanavakakachila,+Kavate kuvasuula.+
34 Oloze Muka-kuvasokola akwechi ngolo.+Lijina lyenyi ikiye Yehova wamayongomena.+Mwakavahakwila chikupu,+Mangana akanehe kuunda mulifuchi,+Nakuneha nawa pindangano kuvatu vamuMbavilone.”+
35 Yehova nambe ngwenyi: “Poko yamukwale nayiza hali vaKalateya,Nayiza hali vatu vamuMbavilone, navilolo vatwamamo, navaka-mangana.+
36 Poko yamukwale nayiza hali vaka-kuhanjika vyuma vyamokomoko,* kaha navalinga vyuma vyauleya.Poko yamukwale nayiza hali vaka-kwasa jita vamuMbavilone, kaha navalizuzukila nawoma.+
37 Poko yamukwale nayiza hatuvalu twavo nahamatemba avo ajita,Nayiza nawa hali vatu veka naveka vamuMbavilone,Kaha navapwa nge mapwevo.+Poko yamukwale nayiza haluheto lwamuMbavilone, kaha navalupupa.+
38 Tulwiji vamuMbavilone navavenyeka, kaha navoma chau.+Lifuchi kana linazale namakombelo akusonga,+Kaha vatu vatwamamo valinga vyuma nge vaka-kuzaluka mwomwo yavyakumwenesa vyakwivwisa woma veji kumonanga.
39 Ngocho tunyama vamulikundu navakatwamangamo natunyama vakuwoza,Namukatwamanga nawa vanyamalanda.+Kamweshi kukatwama cheka vatuko,Kamweshi kukatunga vatu muvisemunwino vyosenako.”+
40 Yehova nambe ngwenyi: “Nanguyinongesa ngana muze ngwanongesele Sotome naNgomola+ najimbongi jajingilikileko,+ kaha naumwe wauchi mwakatwamamo chipwe kutungamo.+
41 Talenu! Vatu vali nakwiza kufuma kunote.Vaka-lifuchi lyalinene navamyangana vavalemu+Navafuma kusongosongo yamavu.+
42 Naveza namata amanana namakunga.+Vatu kana vapwa vikenya, kaveshi kutetelako.+Jishindo jatuvalu twavo vaze vali nakutambukilahoJinapu nge vyema vyakunganjanga chakalungalwiji.+Vatu kana vanalinungu hamwe nakulitanjika mumazavu akulongesa kanawa mangana vakunyemukile ove mwanapwevo Mbavilone.+
43 Mwangana waMbavilone nevu mujimbu wavatu kana,+Ngocho nalizuzukila nawoma,+Nalizakamina chikuma,Kaha ali nakwivwa kukola nge pwevo uze ali nakusapuluka.
44 “Talenu! Mutu umwe mweza kwijiva nge ndumba uze ali nakufuma mulivunda lyakuchikulo chaYotau. Mweza enyeke maulilo akukingiwa. Kaha mukapyapya kakandende, nanguvalingisa vachine kuli ikiye. Kufumaho nangutongola ou vasakula apwenga nawata hali ikiye.+ Mwomwo iyaze napu nge yami? Iyaze nahase kunguhonesa? Kafunga mukaze nahase kwimana kumeso ami?+
45 Shikaho enu vatu, ivwenu vyumevi najinyi Yehova hali Mbavilone,+ navyevi nashinganyeka kulinga halifuchi lyavaKalateya:Vana vamikoko navakavakokangiza.Mwakalingisa vihela vatwamamo vikasale ngundu mwomwo yavakiko.+
46 Mavu nawakandenda omu navakatambula Mbavilone,Kaha miteto nayikevwakana muli vaka-mafuchi.”+
Kwinyikila Chamwishi
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Chipwe “chitondo chachinjikizo.”
^ Hepe., “Yinahane mavoko ayo.”
^ Hepe., “Nevukataleza,” kusoneka chikwavo.
^ Hepe., “navakavaholesa kulu.”
^ Chipwe “hali vapolofweto vamakuli.”
