Yelemiya 52:1-34
52 Zetekiya+ aputukile kuyula omu apwile namyaka yakusemuka 21, kaha ayulile myaka 11 muYelusalema. Lijina lyanaye apwile ikiye Hamutale+ mwanaYelemiya wakuLivina.
2 Zetekiya alingilenga vyuma vyavipi kumeso aYehova, nge muze alingilenga Yehoyakime.+
3 Yehova evwile kupihya, shikaho vyuma kanevi vyasolokele muYelusalema namuYuta palanga nomu avafumishile kumeso enyi.+ Zetekiya alikangile kuli mwangana waMbavilone.+
4 Mumwaka wakusokesa 9 wachiyulo chaZetekiya, mukakweji wakusokesa 10, halikumbi lyakusokesa 10 lyakakweji kana, Nevukataneza* mwangana waMbavilone ejile namaswalale jenyi vosena mangana vanyemukile Yelusalema. Kaha vatungile chilombo chavo nakembwe kunganda jingulwishi ndo.+
5 Nganda vayihakile muchingombela palanga nakumwaka wakusokesa 11 wachiyulo chaMwangana Zetekiya.
6 Mukakweji wamuchiwana, halikumbi lyakusokesa 9,+ zala yatohwele chikuma munganda, kaha mulifuchi kamwapwile vyakulyako.+
7 Kutwala muze, vatuvile lihanya hakembwe yanganda nakwingila, kaha maswalale vosena vachinyine naufuku nakulovokela kuchikolo chapwile hakachi kajikembwe jivali kwakamwihi namilemba yamwangana, oku vaKalateya vanajingilika nganda. Kaha vachinyinyine mujila yakuya kuAlava.+
8 Oloze maswalale javaKalateya vahangasanyine mwangana Zetekiya,+ kaha vakamuwanyine mulikundu lyaYeliko. Maswalale jenyi vosena vachinyine nakumuseza.
9 Maswalale javaKalateya vamukwachile, kaha vamutwalile kuli mwangana waMbavilone kuLivila kungalila yaHamate nakumusopesa.
10 Mwangana waMbavilone ajihilile vana vaZetekiya vamalunga hameso enyi, kaha ajihile nawa vilolo javaYuta kuze vene kuLivila.
11 Kufumaho mwangana waMbavilone atuvile Zetekiya meso,+ kaha amukashile namalenge aunengu nakumutwala kuMbavilone. Amukashile mukamenga palanga nakulikumbi afwile.
12 Mukakweji wamuchitanu, halikumbi lyakusokesa 10 lyakakweji kana, mumwaka wakusokesa 19 wachiyulo chaNevukataneza* mwangana waMbavilone, Nevuzalatane mukulwane wavaka-kulama mwangana uze apwile nawa ngamba yamwangana waMbavilone, ayile kuYelusalema.+
13 Akochele zuvo yaYehova,+ nazuvo* yamwangana najizuvo japwile muYelusalema josena. Akochele nawa najizuvo jajinene josena.
14 Kaha maswalale javaKalateya vaze vapwile namukulwane wavaka-kulama mwangana vapuzwile jikembwe jize jajingilikile nganda yaYelusalema.+
15 Nevuzalatane mukulwane wavaka-kulama mwangana, ambachile vatu vamwe vakukalikiza navaze vasalile munganda, navaze valitwalile vavene kuli mwangana waMbavilone, navitotombwe vakukuluka malambu, kaha avatwalile muufunge.+
16 Oloze vatu vakuhutwa vamulifuchi lize avasezele mangana vazatenga mumande amivinyo nakuzatanga milimo yaundungo.+
17 VaKalateya vachikile jize jipanda jaunengu+ japwile kuzuvo yaYehova, namatemba,+ nalize Limbashiya+ lyaunengu vyapwile kuzuvo yaYehova. Kaha unengu wavyo wosena vautwalile kuMbavilone.+
18 Vambachile navifwoyo, najifwosholo, natuzola twamanongo, naviloso,+ najipasa,+ navyuma vyaunengu vyosena vize vazachishilenga kutembele.
19 Uze mukulwane wavaka-kulama mwangana ambachile jimbashiya,+ natumalonga twakukwachila kakahya, naviloso, navifwoyo, navitumbikilo vyamanongo,+ najipasa, naviloso vize vyapwile vyaulu napalata yamwaza.+
20 Oloze unengu wajize jipanda jivali, nalize Limbashiya, navangombe vaunengu 12+ vaze vapwile mwishi yalize Limbashiya, namatemba aze atengele Mwangana Solomone akuzachisa kuzuvo yaYehova, kavahashile kuupezalisako.
21 Panda hipanda yasuhwile jikuvite* 18, kaha mukutohwa chapanda yimwe mwanyengumukile lungoji lwajikuvite 12.+ Pimo yapanda hipanda yapwile chikapa chaminwe yiwana,* kaha mukachi mwapwile mwahululu.
22 Mutwe uze wapwile helu lyapanda hipanda wapwile waunengu. Mutwe kana wazandamine jikuvite jitanu,+ kaha uze wanda wakuselasana najiloma vahakile kuze kumutwe jingulwishi ndo, vyapwile vyaunengu. Omu mukiko yapwile napanda yize yamuchivali namutwe wayo, najiloma nawa.
23 Kujisali josena kwapwile jiloma 96. Jiloma josena vahakile hawanda vaselasanyine japwile 100.+
24 Uze mukulwane wavaka-kulama mwangana akwachile nawa kapilishitu wamukulwane Selaya,+ nakapilishitu wamuchivali Zefwanyiya,+ navaka-kulama kuvikolo vatatu.+
25 Munganda akwachilemo chilolo umwe uze apwile muka-kutala maswalale. Akwachile nawa masepa jamwangana 7 vaze vapwile munganda, namuka-kusoneka wakapitau kamaswalale uze akungulwilenga vatu mulifuchi, namalunga 60 vamulifuchi vaze awanyine munganda.
26 Nevuzalatane mukulwane wavaka-kulama mwangana avambachile nakuvatwala kuli mwangana waMbavilone kuLivila.
27 Kaha mwangana waMbavilone avajihililile kuLivila+ kungalila yaHamate. Ngocho vaYuta vafumine mulifuchi lyavo nakuya muufunge.+
28 Ava vakiko vatu vaze Nevukataneza* atwalile muufunge. Mumwaka wakusokesa 7, atwalile vaYuleya 3,023 muufunge.+
29 Mumwaka wakusokesa 18 wachiyulo chaNevukataneza,*+ vambachile vatu* 832 muYelusalema nakuvatwala muufunge.
30 Mumwaka wakusokesa 23 wachiyulo chaNevukataneza,* Nevuzalatane mukulwane wavaka-kulama mwangana ambachile vaYuleya 745 nakuvatwala muufunge.+
Vatu* vosena vatwalile muufunge vapwile 4,600.
31 Jino mumwaka wakusokesa 37 waufunge waYehoyakine+ mwangana wavaYuta, mukakweji wakusokesa 12, halikumbi lyakusokesa 25 lyakakweji kana, Evile-melotake mwangana waMbavilone, mumwaka wenyi aputukile kuyula, afumishile* Yehoyakine mwangana wavaYuta mukamenga.+
32 Mwangana waMbavilone ahanjikile kuli Yehoyakine nalikoji, kaha azezwile litanda lyenyi helu lyamatanda avamyangana vakwavo vaze apwile navo muMbavilone.
33 Yehoyakine azulile uvwalo wenyi wamukamenga, kaha alilenga vyakulya kumeso amwangana hamakumbi akuyoya chenyi osena.
34 Kaha hakumbi hakumbi vamuhanyinenga vyakulya kuli mwangana waMbavilone hamakumbi akuyoya chenyi osena, palanga nakulikumbi afwile.
Kwinyikila Chamwishi
^ Hepe., “Nevukataleza,” kusoneka chikwavo.
^ Hepe., “chaNevukataleza,” kusoneka chikwavo.
^ Chipwe “nanganda.”
^ Kuvite yimwe yapwile jisendimita 44.5. Tala Chihande B14.
^ Munwe umwe wapwile jisendimita 1.85. Tala Chihande B14.
^ Hepe., “Nevukataleza,” kusoneka chikwavo.
^ Hepe., “chaNevukataleza,” kusoneka chikwavo.
^ Chipwe “myono.”
^ Hepe., “chaNevukataleza,” kusoneka chikwavo.
^ Chipwe “Myono.”
^ Hepe., “azundwile mutwe.”
