Yelemiya 7:1-34
7 Yehova ahanjikile kuli Yelemiya ngwenyi:
2 “Imana kuchikolo chakuzuvo yaYehova, kaha vilika mazu awa ngwove, ‘Enu vaYuta muvosena, enu muli nakwingilanga muvikolo evi nakwiza nakulifukula kuli Yehova, ivwenu vyuma nahanjika Yehova.
3 Yehova wamayongomena, Kalunga kaIsalele nambe ngwenyi: “Alumunenu jijila jenu navilinga vyenu, kaha nangumitavisa mutwamenga muchihela chino.+
4 Kanda namufwelela mazu akwongako nakwamba ngwenu, ‘Eyi* hitembele yaYehova, hitembele yaYehova, hitembele yaYehova!’+
5 Kachi nge namwalumuna jijila jenu navilinga vyenu, kachi nge namuyulanga mwakwoloka mutu ali nachihande namukwavo,+
6 kachi nge kamweshi kuyanjisa vamwiza, navanginga,* navatuliweko,+ kachi nge kamweshi kumwanga manyinga avatu vakuzeneka mulonga muchihela chinoko, kachi nge kamweshi kuzachila tulunga veka nakulivindamisa jino enu vaveneko,+
7 kaha nangumitavisa mutwamenga muchihela chino, mulifuchi eli ngwahanyine vakakuluka jenu mangana vatwamengamo haya myaka yosena.”’”*
8 “Oloze enu muli nakufwelela mazu akwonga.+ Echi kacheshi kuminganyalisa numba hahandendeko.
9 Muli nakwiva,+ nakujiha vatu, nakulinga ujila, nakulishinga vyuma vyamakuli,+ nakulumbila Mbale vimuna vakuvatula,*+ nakuzachila tulunga veka vaze kamwatachikijileko.
10 Kufumaho hinamwiza nakwimana kumeso ami muzuvo yino vavulukila lijina lyami nakwamba ngwenu, ‘Navatulwila,’ okunyi muli nakulinga vyuma vyosenevi vyaunyengwe.
11 Uno zuvo yino vavulukila lijina lyami munayimono kupwa nge wina wakuswama vihwanga nyi?+ Ngunamono vyuma muli nakulinga.” Omu mukiko mwanambe Yehova.
12 “‘Yenunga jino kuchihela chami kuShilo+ kuze vavulukililenga lijina lyami hakavanga+ mangana mukamone vyuma ngwalingile kuze mwomwo yavilinga vyavipi vyavatu jami vaIsalele.+
13 Oloze munalinginga lika vyuma vyosenevi. Numba tuhu ngunamihanjikilanga mapapa kakavulu,* oloze kamwevwililileko.+ Ngunamisanyikanga, oloze kamwetavileko.’+ Omu mukiko mwanambe Yehova.
14 ‘Ngocho zuvo eyi vavulukila lijina lyami,+ eyi mwafwelela,+ nachihela echi ngwamihanyine enu navakakuluka jenu nanguvilinga nge muze ngwalingile kuShilo.+
15 Nangumimbila nakumifumisa kumeso ami ngana muze ngwambilile vandumbwenu, vaka-tanga yaEfwalime vosena.’+
16 “Shikaho ove kanda naulombela ava vatuko. Kanda nauvatwila kawelele, chipwe kuvalombela, chipwe kuvalembelela kuli amiko,+ mwomwo kangweshi kukwivwililako.+
17 Uno kaweshi nakumona vyuma vali nakulinga mujinganda jaYuta namujijila jamuYelusalemako numba?
18 Vana vali nakuchava jikunyi, masevo vali nakuwika kakahya, kaha mapwevo vali nakuchika unga mangana vochenga jimbolo jakulumbila Mwangana waMwilu waPwevo.*+ Vali nakuhana nawa tulunga veka mawana avinyo mangana vangwivwise kupihya.+
19 Yehova nambe ngwenyi, ‘Kutala ami yami vali nakwivwisa kukola kumuchima* numba? Vali nakulivwisa vavene kukola kumichima nakulisawisa.’+
20 Shikaho Mwata Wakulitulaho Yehova nambe ngwenyi, ‘Talenu! Nanguhingunwina utenu wami nakulundundu yami hachihela chino,+ nahali vatu natunyama, nahamitondo yamuchipapa nahavyuma vyakusoka hamavu vyosena. Utenu wami nawenya nge kakahya, kaha kaveshi kuhasa kuujimako.’+
21 “Yehova wamayongomena, Kalunga kaIsalele nambe ngwenyi, ‘Havimuna vamawana enu akulumba hakilenuho vimuna veka vakuvatula, kaha lyenu nyama yavimuna kana.+
22 Mwomwo halikumbi lize ngwalowele vakakuluka jenu mulifuchi lyaEjipitu, kangwavalwezele vyuma vimwe kupandama kumawana akulumba navimuna vakuvatula chipwe kuvahana jishimbi kupandama kumawana kanako.+
23 Oloze ngwavahanyine kaha lushimbi luno ngwami: “Ivwililenunga mulizu lyami, kahami nangupwa nguKalunga kenu, kahenu nawa namupwa muvatu jami.+ Lingenunga vyuma vyosena nangumilweza mangana mutwamenga kanawa.”’+
24 Oloze kavangwivwililileko, kavatengelekele matwitwi avo kuli amiko.+ Valingilenga vyuma vajinyinenga, vanjinjavalile nakulinga mwaya michima yavo yayipi.+ Ngocho vanakindulukanga munyima, mukutela kuya kulutwe,
25 kufuma vene halikumbi lize vakakuluka javo valovokele mulifuchi lyaEjipitu palanga nakulelo lino.+ Ngocho ngwavatuminyinenga vangamba jami, vapolofweto vosena. Ngwavatuminenga kuli vakiko hakumbi hakumbi mapapa kakavulu.*+
26 Oloze vakanyine kungwivwilila, kavatengelekele matwitwi avo kuli amiko.+ Vapwile vakunjinjavala,* kaha valingile vyuma vyavipi chikuma kuhambakana vakakuluka javo.
27 “Ove nauvalweza vyuma vyosenevi,+ oloze kaveshi kukwivwililako. Nauvasanyika, oloze kaveshi kukwitavako.
28 Jino nauvalweza ngwove, ‘Ou himuyachi wavatu vaze kavevwililile mulizu lyaYehova Kalunga kavoko, kaha kavetavilile kuvazangamisako. Muli vakiko kamweshi mutu wakushishikako, kaha kavahanjika hakushishikako.’*+
29 “Teula jikambu jove nakujimbila, imbila lungungu* hajipili, mwomwo Yehova nakane chisemunwino echi chinamwivwisa kupihya, kaha nachisuvilila.
30 Yehova nambe ngwenyi, ‘VaYuta vanalingi vyuma vyavipi kumeso ami. Vanahake makombelo avo aunyengwe muzuvo yize vavulukila lijina lyami mangana vayipihise.+
31 Vanatungu nawa vihela vyakulunduka kuTofwete yize yapwila muChinema chaMwanaHinome*+ mangana valumbenga vana vavo vamalunga navava vamapwevo.+ Kangwavalwezele kulinga chuma kanako, kaha nawa kangwachishinganyekele mumuchima wamiko.’*+
32 “Shikaho Yehova nambe ngwenyi, ‘Talenu! Makumbi ali nakwiza omu navakazeneka kuvuluka chihela kana ngwavo Tofwete, chipwe ngwavo Chinema chaMwanaHinome.* Oloze navakachivulukanga ngwavo Chinema Chakujihila. Navakafundanga vafu muTofwete palanga nomu namukazala mwosena nakuhona kwakuvafunda.+
33 Mijimba yavatu ava vakufwa nayikapwa kulya chatujila vakutuka mwilu, natunyama vahamavu, kaha naumwe wauchi mwakavevwisa woma.+
34 Nangukaholesa vyema vyakulisamba, navyema vyakuwahilila, navyema vyamwenyamwenga, navyema vyamwenga+ mujinganda jaYuta namujijila jamuYelusalema, mwomwo lifuchi lyosena navakalinongesa nakusala malala kaha.’”+
Kwinyikila Chamwishi
^ Hepe., “Eji,” kulumbununa jizuvo jahatembele josena.
^ Chipwe “navana vakuzeneka masevo.”
^ Chipwe “vatwamengamo kufuma kumyaka yosena nakutwala kumyaka yosena.”
^ Chipwe “vimuna vakuvatula mangana vakakumuke wishi.”
^ Hepe., “ngunahindukanga chimenemene nakuhanjika kuli enu.”
^ Vulukiso yakalunga wapwevo uze valemeselenga vaIsalele vakulikanga. Apwile pamo kalunga walusemo.
^ Chipwe “nakwivwisa kupihya; nakusowangiza.”
^ Hepe., “Ngwahindukilenga chimenemene hakumbi hakumbi nakuvatuma kuli vakiko.”
^ Hepe., “vakukakama jishingo.”
^ Hepe., “kaha kushishika vachiteta lyehi kutunwa twavo.”
^ Chipwe “mwaso wakulishona.”
^ Tala Mukana waMazu, “Ngehena.”
^ Chipwe “kavyapwile muvishinganyeka vyamiko.”
^ Tala Mukana waMazu, “Ngehena.”
