Yona 1:1-17
1 Yehova alwezele Yona*+ mwanaAmitai ngwenyi:
2 “Katuka uyenga kunganda yayinene yaNyineve+ mangana ukavilike lupi nalwiza havatu vamunganda kana, mwomwo ngunamono vilinga vyavo vyakuhuka.”
3 Oloze Yona akatukile mangana ayenga kuTalashishe achine Yehova. Ayile kuNjopa, kaha akawanyine wato uze wapwile nakuya kuTalashishe. Ngocho afwetele jimbongo, kaha engilile muwato mangana ayenga navo kuTalashishe achine Yehova.
4 Jino Yehova ahuhwishile peho yayinene hakalungalwiji, kaha hakatukile nyamanganda wamunene, ngocho wato wasakile kupazuka namakimba.
5 Vaka-kutambukisa wato vevwile woma chikuma, kaha mutu himutu aputukile kutwa kawelele kuli kalunga kenyi. Vaputukile kufumisa vyuma vimwe muwato nakuvimbila mukalungalwiji mangana wato uhehuke.+ Oloze halwola kana, Yona apwile muchihela chimwe chamukachi kawato, kaha asavalile nakulezukila mutulo.
6 Jino mukulwane wawato apandamine kuli ikiye nakumwamba ngwenyi: “Mwomwo ika unasavalila? Hinduka usanyike kalunga kove. Pamo Kalunga wamuchano mwatukafwa, ngocho katweshi kunongako.”+
7 Jino valyambile mwavomwavo ngwavo: “Tuzachisenu tutachikijilo+ mangana twijive ou nalingisa elu lupi lutuwane.” Ngocho vazachishile tutachikijilo, kaha katachikijilo kaholokelele hali Yona.+
8 Kaha vambile kuli ikiye ngwavo: “Tulweze, iya nalingisa elu lupi lutuwane? Milimo muka wazata, kaha wafuma kulihi? Wafuma kulifuchi muka nakumuyachi muka?”
9 Ikiye avakumbulwile ngwenyi: “Ami ngwapwa ngukaHepeleu, kaha ngweji kwivwanga woma* Yehova Kalunga wamelu, Ou atengele kalungalwiji natunda.”
10 Jino vaze malunga vevwile woma chikuma. Kaha vamwihwile ngwavo: “Ika unalingila chuma kana?” (Ava malunga vatachikijile ngwavo Yona apwile nakuchina Yehova, mwomwo avalwezele.)
11 Shikaho vamwihwile ngwavo: “Tukulinge muka numba kalungalwiji atule?” Mwomwo nyamanganda apwile nakutohwelako lika.
12 Ikiye avakumbulwile ngwenyi: “Nguzundulenu mungumbile mukalungalwiji, kaha mwatula. Mwomwo ngunatachikiza ngwami ami yami ngunalingisa ou nyamanganda ahuhwe.”
13 Chipwe ngocho vaze malunga vavuwile nangolo mangana vatwale uze wato kutunda, oloze vahonene, mwomwo nyamanganda apwile nakutohwelako lika.
14 Jino vatambakanyine kuli Yehova ngwavo: “Ove Yehova tunakulembelela, kanda natunonga mwomwo yayou mutuko.* Kanda nautuhana mulonga hamanyinga ayou mutu wakuzeneka mulongako, mwomwo ove Yehova unalingi kweseka nomu unasake.”
15 Ngocho vazundwile Yona nakumumbila mukalungalwiji, kaha kalungalwiji atulile.
16 Kufumaho vaze malunga vevwile chikuma Yehova woma,+ kaha vahanyine Yehova vimuna vakuvatula nakulishika jishiko.
17 Jino Yehova atumine ishi wamunene, kaha aminyine Yona. Ngocho Yona apwile mujimo lyayauze ishi makumbi atatu, namusana naufuku.+
Kwinyikila Chamwishi
^ Ulumbunwiso, “Liyembe.”
^ Chipwe “ngweji kulemesanga.”
^ Chipwe “mwomwo yamwono wayou mutuko.”
