Yona 4:1-11
4 Oloze chuma kana chevwishile Yona kupihya, kaha evwile matoto chikuma.
2 Ngocho alombele kuli Yehova ngwenyi: “Ove Yehova, kutala omu keshi mukiko ngwashinganyekele haze ngwapwile mulifuchi lyamiko nyi? Echi chikiko changulingishile hakavanga numba ngusake kuchinyina kuTalashishe,+ mwomwo ngwatachikijile ngwami ove wapwa uKalunga wakutetela,* wakeke, wakushipwokela kukwata utenu, wazangi yakwilila,+ kaha weji kwalumunanga vishinganyeka vyove halupi nausaka kuneha.
3 Shikaho ove Yehova ngujihe, mwomwo nachiwaha ngufwenga kuhambakana kuyoya.”+
4 Jino Yehova amwihwile ngwenyi: “Kutala chinapu chakutamo kuli ove kupihilila nyi?”
5 Yona alovokele muze munganda, kaha akatwamine kumututuko wanganda. Atungile kapundo kenyi kuze, kaha atwamine mumuvule wakapundo kana mangana amone vyuma navisoloka hanganda kana.+
6 Jino Yehova Kalunga asokesele liyango,* kaha lyatanjilile helu mangana Yona atwame mumuvule walyo asuuluke. Ngocho Yona awahililile chikuma hakutwama mwishi yalize liyango.
7 Oloze lichako Kalunga wamuchano atumine mbumbu halungulungu lyakucha, kaha alile lize liyango, ngocho lyazujile.
8 Omu likumbi lyatutukile, Kalunga atumine nawa peho yizuma yakumututuko, kaha musana watwililile mumutwe waYona, ngocho azeyele chikuma. Alombele ngwenyi afwenga,* ambilenga ngwenyi: “Nachiwaha ngufwenga kuhambakana kuyoya.”+
9 Jino Kalunga ehwile Yona ngwenyi: “Kutala chakutamo kuli ove kupihilila hali eli liyango nyi?”+
Ikiye amukumbulwile ngwenyi: “Chinapu chakutamo kuli ami kupihilila, kaha nachiwaha ngufwenga tuhu.”
10 Oloze Yehova ambile kuli ikiye ngwenyi: “Ove unevwila keke liyango lize unazeneka kukilikichila chipwe kukolesa. Lyasokanga nakukola muufuku umwe, kaha linafu nawa muufuku umwe.
11 Kahami nguzeneke kwivwila keke nganda yayinene+ yaNyineve yize yili navatu vakuhambakana 120,000 vaze kavatachikiza kuhandununa vyuma vyamwaza navyevi vyavipiko* nyi? Uno nguzeneke kwivwila keke vimuna javo vavavuluko nyi?”+
Kwinyikila Chamwishi
^ Chipwe “wakukokweza.”
^ Chipwe pamo, “lumono.”
^ Chipwe “ngwenyi mwono wenyi ufwenga.”
^ Chipwe “kutumbununa mavoko avo avilyo namavoko avo avimosweko.”
