Yopa 21:1-34
21 Yopa ambile ngwenyi:
2 “Ivwililenu kanawa kumazu nanguhanjika,Apwenga mazu namunguvendejeka nawo.
3 Ngwivwililenu nguhanjike.Omu nangukumisa kuhanjika numbanyi mungutoleke.+
4 Uno nguli nakuyayavala kuli mutu numba?Kachi chapwanga ngocho, kutala kachi kangwasulakanyineko nyi?
5 Ngutalenu mulikomokele,Likwatenu mavoko kutunwa twenu.
6 Omu ngweji kushinganyekanga vyakunyima, ngweji kwivwanga woma,Mujimba wami wosena weji kuchikimanga.
7 Mwomwo ika vaka-kuhuka veji kuyoyanga lika,+Nakushinakaja, nakupwa naluheto?*+
8 Kaha vana vavo chivayoya navo hamwe,Veji kumonanga navazukulu javo nawa.
9 Kujizuvo javo kwapwa kwakukingiwa, kaveshi nakwivwa womako,+Kalunga nawa kavazangamisako.
10 Vangombe javo vavakuji veji kusemesanga.Vangombe javo vavitole nawa veji kusemanga, kaveshi kupulumwisako.
11 Vana vavo vavakweze veji kulitambwojokela haweluka kwijiva nge utanga wavimuna,Kaha vana vavo vavandende veji kutumbwojokanga.
12 Veji kwimbanga myaso natungoma, natulyalya,Veji kuwahililanga hakwimba jipanda.+
13 Vapwa vakuwahilila mukuyoya chavo,Veji kuyanga kuFuka* mukukasumuna.
14 Veji kwambanga kuli Kalunga wamuchano ngwavo, ‘Tweche!Katwasakile kutachikiza jijila joveko.+
15 Ou Wangolo Josena ikiye iyaze numba tumuzachile?+Natunganyala ikaze hakumutachikiza?’+
16 Oloze ngunatachikiza ngwami kufukila chavaka-kuhuka kacheshi mungolo javoko.+Vishinganyeka* vyavo vili kwakusuku nayami.+
17 Kangahi eji kujimanga manongo avaka-kuhuka?+Kangahi lweji kuvawananga lupi?Kangahi eji kuvanongesanga Kalunga hamatoto enyi?
18 Kutala vapekumukaho lyehi napeho kwijiva nge viswaswa nyi?Uno vavahukulaho lyenyi kunyamanganda kwijiva nge muzungu nyi?
19 Kalunga mwakazangamisa vana vavo muchishishisa chavakiko.Mwakavazangamisa mujila kana mangana vakatachikize.+
20 Meso avo akamone kunonga chavo,Kaha vakanwe kulundundu yayou Wangolo Josena.+
21 Kutala navakazakama vyuma navikasoloka kuvana vavo,Omu tukweji twavo navakalinga hivanakumu lyehi tahi?+
22 Uno kuli umwe nahase kunangula Kalunga chinyingi,*+Okunyi ikiye eji kuyulanga navatu vavalemu nyi?+
23 Mutu umwe mwafwa nangolo jenyi,+Halwola luze nazeneka kulizakamina chuma numba chimwe.+
24 Omu jitungi jenyi jichili nanyama,Nomu vifuwa vyenyi vichili nangolo.*
25 Oloze mutu mukwavo nawa mwafwa wakuhomba,Mwafwa chakuzeneka kulivwisa kuwaha vyuma vyamwaza.
26 Vosena vavali navasavala mulukungu,+Kaha vosena navavalya kumavunu.+
27 Ivwenu! Ngunatachikiza kanawa vishinganyeka vyenu,Navyuma vyavipi munajinyi kungulinga.+
28 Mwomwo muli nakwamba ngwenu, ‘Zuvo yamutu wamulemu yili kulihi?Nyi mbalaka atwaminenga muka-kuhuka yili kulihi?’+
29 Uno kamwehwile vaka-kutambwojokako nyi?Uno kamwahehwojwele unjiho* wavo vanawane,
30 Ngwavo, mutu wamupi veji kumupulululanga halikumbi lyavihuli,Veji kumuyovolanga halikumbi lyandomboko tahi?
31 Iyaze mwahamuka nakulweza muka-kuhuka jijila jenyi?Iyaze mwamuzangamisa havyuma nalingi?
32 Omu navamutwala kuchimbumbe,Vatu navanyingama nakulama chimbumbe chenyi.
33 Mavu amuchinema* mwawevwa ngwenyi amwaza,+Kaha vatu vosena navamukava munyima yenyi,*+Ngana mwavaze valivangile shimbu kanda ikiye.
34 Ngocho, ikaze muli nakunguvendejekela namazu amokomoko?+Mazu muli nakuhanjika amakuli.”
Kwinyikila Chamwishi
^ Chipwe “nangolo.”
^ Chipwe “kuSheyole,” kulumbununa fuka yavatu vosena. Tala Mukana waMazu.
^ Chipwe “Kujina.”
^ Chipwe “kunangula Kalunga vyuma.”
^ Hepe., “Nomu usongosongo wenyi uchinavwovuwa.”
^ Hepe., “vinjikizo.”
^ Chipwe “amumwanakalwiji.”
^ Hepe., “vatu vosena mwavakokela munyima yenyi.”
