Yopa 34:1-37
34 Kaha Elihu atwalileho nakuhanjika ngwenyi:
2 “Ivwililenu mazu ami, enu vaka-mangana.Ngwivwililenu, enu mwatachikiza vyuma vyavivulu.
3 Matwitwi eji kusakulanga mazu,Nganomu lilimi* lyeji kumakilanga vyakulya.
4 Tukekesenu etu vavene tumone vyuma vyakwoloka.Tusakulenu mwetumwetu vyuma vyamwaza.
5 Mwomwo Yopa nambe ngwenyi, ‘Ami ngunoloka,+Oloze Kalunga nakane kunguyula mwaya chiyulo chakwoloka.+
6 Uno ngunahase kulyonga mangana ngwami vangusopese mujila yamwaza nyi?Numba tuhu nguli nambandu yize kaveshi kuhasa kukako, oloze ami kangwazombokele jishimbiko.’+
7 Mutu muka afwana nge Yopa,Uze eji kunwanga kuhenga nge meya?
8 Nalikate navaka-kuhenga,Nakulivwasana navatu vakuhuka.+
9 Mwomwo nambe ngwenyi, ‘Mutu keshi kunganyala,Hakwivwisa Kalunga kuwahako.’+
10 Ngocho enu malunga vakunangakana,* ngwivwililenu:Nachipwa chakuhenga kuli Kalunga wamuchano kulinga vyuma vyavipi,+Chipwe ou Wangolo Josena kulinga vyuma vyakuhenga.+
11 Mwomwo mwakafweta mutu kweseka navilinga vyenyi,+Kaha mwakalinga kuli mutu kweseka najijila jenyi.
12 Chikupu vene Kalunga keshi kuhasa kulinga mwakuhengako,+Ou Wangolo Josena keshi kuhasa kuhengesa chiyuloko.+
13 Iyaze amuhanyine wata wakulama mavu,Chipwe kumutongola atale kaye kosena?*
14 Kachi nge mwashishika vatu,Kachi nge mwatambula shipilitu yavo nakuhwima chavo,+
15 Kaha vatu* vosena navanonga,Navakinduluka kulukungu.+
16 Nge muvaka-kunangakana, kaha ivwililenu kuchumechi.Tengelekenu matwitwi enu kuvyuma nanguhanjika.
17 Uno mutu uze ahunga chiyulo chakwoloka nahase kuyula vatu,Chipwe kupayisa mutu wangolo uze apwa wakwoloka numba?
18 Kutala munahase kuhanjika kuli mwangana ngwenu, ‘Ove umutu wamokomoko’ tahi?Chipwe kuvatu vavalemu ngwenu, ‘Muvatu vaka-kuhuka’ nyi?+
19 Kalunga keshi kutala vilolo kumesoko,Keshi kuhakwila vaka-luheto, chipwe vaka-kuhutwako,*+Mwomwo vosena vanapu milimo yamavoko enyi.+
20 Vanahase kufwa mukukasumuka+ mukachi kaufuku+Veji kulichikiminanga, kaha hinavafwa,Navatu vavalemu veji kuvafumisako, oloze keshi kuli vakwavo vatuko.+
21 Meso aKalunga eji kutalanga jijila javatu,+Kaha eji kumonanga munayi jitambo javo.
22 Kakweshi chihela chakwilava wi chipwe chamilima yayineneChize vanahase kuswama vaka-kuhengako.+
23 Kalunga katongwela mutu lwola,Lwakwimana kumeso enyi amusopeseko.
24 Eji kuhokolanga vaka-ngolo chakuzeneka kuhehwojola unjiho,Kaha eji kushishisangaho veka.+
25 Mwomwo atachikiza vyuma veji kulinganga,+Kaha eji kuvakatumunanga naufuku nakuvanongesa.+
26 Eji kuvazangamisanga havilinga vyavo vyakuhukaEji kuvazangamishilanga kuchihela chize navamona vatu vosena.+
27 Mwomwo vanapyapumuka nakukana kumukavangiza,+Kavazakama jijila jenyiko.+
28 Veji kulingisanga vaka-kuhutwa vatete kuli ikiye.Kaha eji kwivwanga miteto yavaze vazeneka wakuvakafwa.+
29 Kachi nge Kalunga naliholela kulu, iyaze mwamuhana mulonga?Nge nalisweke, iyaze mwamumona?Chipwe nge nalisweke kuli vaka-lifuchi chipwe kuli mutu umwe, nou mwamumona wauchi,
30 Mangana muka-kuzamukila* Kalunga akazeneke kuyula,Chipwe kuhungumwisa vatu.+
31 Naumwe wauchi nahase kuhanjika kuli Kalunga ngwenyi,‘Unanguzangamisa chakuzeneka mulonga.+
32 Ngunangule vyuma vize ngunahono kutachikiza.Kachi nge ngunalingi vyuma vyakuhenga, kaha kangweshi kukavilinga chekako.’
33 Uno musaka akufwete kweseka nomu munayi vishinganyeka vyove, okunyi unakane kusopesa chenyi nyi?Ove yove watela kusakula, keshi yamiko.Shikaho ngulweze vyuma watachikiza kanawa.
34 Malunga vakunangakana* vosena,Malunga vamangana vosena vaze navevwa mazu ami, vanahase kungwitavila ngwavo,
35 ‘Yopa nahanjika chakuzeneka chinyingi,+Nahanjika chakuzeneka kunangakana.’
36 Nachiwaha nge Yopa navamweseka* nahamakumishiloMwomwo ali nakuhanjika nganomu vahanjika vaka-kuhuka.
37 Mwomwo kushili yenyi nawezelelako kulikanga.+Nalingi mumavoko pu nakutuleununaKaha nahanjika mazu amapi amavulu hali Kalunga wamuchano.”+
Kwinyikila Chamwishi
^ Hepe., “ndakwila.”
^ Hepe., “malunga vamichima.”
^ Chipwe “atale vaka-mavu vosena.”
^ Hepe., “vakwechi mijimba.”
^ Chipwe “Keshi kuhakwila vatu vavalemu kuhambakana vatu vamokomokoko.”
^ Chipwe “muka-kulikanga kuli.”
^ Hepe., “Malunga vamichima.”
^ Chipwe pamo, “Ove tata, yitavila Yopa vamweseke.”
