Yopa 39:1-30
39 “Uno watachikiza lwola veji kusemanga vapembe vakujipili nyi?+Uno wamonaho lyehi omu kayi eji kusemanga vana venyi tahi?+
2 Uno weji kulavanga tukweji veji kuhitangamo numba vaseme?Uno weji kutachikizanga lwola veji kusemanga nyi?
3 Veji kuulikanga hamavu hakusema vana vavo,Kaha misongo yavo yakusema yeji kukumanga.
4 Vana vavo veji kukwatanga ngolo nakukolela muchipapa.Veji kuhandukanga kuli manevo, kaha kaveshi kukindulukako.
5 Iya asuwile chimbulu wamuchipapa aliyile kwenyi,+Chipwe kumukasununa mumikole?
6 Ngunamuhane likundu kupwa limbo lyenyi,Ngalila yamungwa nawa kupwa utwamo wenyi.
7 Ahunga vyema vyamunganda.Keshi kwivwa vyema vyamuka-kutambukisa tunyamako.
8 Eji kutambwojokanga kujipili nakutonda vyakulyaNakulengeza vyuma vituta vyosena.
9 Uno ngombe wamuchipapa nahase kukuzachila tahi?+Uno nahase kusavala mumulaka wove numba?
10 Kutala unahase kukasa ngombe wamuchipapa namikole mangana atambuke mumwozongolo nakulimaChipwe kukukavangiza munyima omu mwalambisa muze munanekama* muwande wove nyi?
11 Uno unahase kufwelela mungolo jenyiChipwe kumwecha akuzachile milimo yove yayikalu nyi?
12 Kutala unahase kumufwelela mangana akakwahile jimbuto joveNakujikungulwila kuchizungwilo chove numba?
13 Nyamalanda eji kulisambanga nakuhupa mavava enyi,Kutala mavava namangona enyi anahase kulyeseka nawawa andalangimbu nyi?+
14 Eji kusezanga maulu enyi hamavuKaha eji kuwashikilanga mangana azume,
15 Eji kuvulyamanga ngwenyi vatu vanahase kuwalyata nakuwachikaChipwe kanyama wamuchipapa kuwalyatangila.
16 Eji kuyanjisanga vana venyi kwijiva nge keshi venyiko+Keshi kulizakamina ngwenyi kukilikita chenyi nachiya mwanganaveneko.
17 Kalunga namuminyi* mangana,Kaha kamuhanyine kunangakanako.
18 Omu eji kukatukanga nakuhupa mavava enyi,Eji kusehanga kavalu namuka-kumutambukisa.
19 Uno yove weji kuhananga kavalu ngolo jenyi,+Chipwe kumuvwika lizangu lyakulinyika mushingo yenyi nyi?
20 Uno unahase kumulingisa atumbwojoke nge vambimba makumbi nyi?Kuhwimasana chamumazulu enyi cheji kwivwisanga woma.+
21 Eji kulihalanga hamavu muchinema nakusambwojoka nangolo jenyi.+Kaha eji kulupukila kujita.+
22 Eji kusehanga nakulumbilisa woma, kaha keshi kulizuzukila vyuma vimweko.+Keshi kukinduluka mwomwo yapoko yamukwaleko.
23 Musakali weji kulivetaveta hali ikiye,Likunga namumba vyeji kuvyakumanga.
24 Eji kulupukilanga kulutwe* mwomwo yakulyangalyanga kumuchima,Keshi kwimana hakwivwa* chivumo chalunetako.
25 Nge vanembi luneta, kaha eji kwambanga ngwenyi, ‘Eyo!’Eji kuhumbikanga livumba lyajita shimbu achili kwakusuku,Eji kwivwanga mazu navatambika vakulwane jamaswalale naluvila lwajita.+
26 Uno kunangakana chove chikiko cheji kulingisanga kambembe atuke helu,Nakutanduula mavava enyi atale kusulo tahi?
27 Uno yove weji kulwezanga ngonga atuke helu,+Chipwe kutungila uswa wenyi kwilu,+
28 Nakutwama ufuku wosena hachihela chakumbolomoka,Hachihela chenyi chakukola halilolwa nyi?
29 Kuze kukiko eji kutalatalilanga kulya chenyi.+Meso enyi eji kumwenanga vyuma hahasuku.
30 Vana venyi veji kuhuvilanga manyinga.Kweshokwo kuli mujimba wakufwa, kukiko vene eji kupwanga.”+
Kwinyikila Chamwishi
^ Chipwe “mwalambisa mumwozongolo.”
^ Hepe., “namulingisa avulyame.”
^ Hepe., “kuminanga mavu.”
^ Chipwe pamo, “Keshi kufwelela.”
