Yopa 7:1-21
7 “Uno kuyoya chavatu hano hamavu kachapwa chakuyandangilako numba?Uno makumbi avo kaweshi nge aze avangamba vakukambako numba?+
2 Vanapu ngana mwavandungo vaze navasaka muvule,Ngana mwavangamba vakukamba vaze navatalijiza fweto yavo.+
3 Ngocho vanangutongwela tukweji valamba,Vananguhane maufuku avihuli.+
4 Hakusavala ngweji kulihulisanga ngwami, ‘Nanguhinduka lwola muka?’+Oloze ngweji kupindasananga ufuku wosena palanga nakulungulungu lyakucha.*
5 Nyama yami yosena yili namavunu namikamo yamajilo.+Chikova chami chosena chili namavanda namashina.+
6 Makumbi ami ali nakutambuka washi kuhambakana nandongo yalikina lyamuka-kutunga mahina,+Kaha ali nakukuma chakuzeneka lutalililo.+
7 Anuka ngwove kuyoya chami chinapu nge peho.+Meso ami kaweshi kukamona cheka vyuma vyamwazako.*
8 Meso ayou ali nakungumona oholili kaweshi kukangumona chekako.Naukangutalatala nameso ove, oloze kaweshi kukangumonako.+
9 Ngana muze livwi lyeji kuyanga nakulelangana,Mukiko mwanapu nayou mwaya nakushikumuka muFuka,* keshi kukafumamoko.+
10 Keshi kukakinduluka cheka kuzuvo yenyiko,Kaha kaveshi kukamona cheka kuchihela chenyiko.+
11 Ngocho kangweshi kulitwamina kuhanjikako.Nanguhanjika mwomwo yakulyonyinga chamumuchima wami.Nanguyayavala mwomwo yaukalu wami.+
12 Uno ngwapwa ngukalungalwiji chipwe ngukanyama wamukalungalwiji,Numba unguhakile mukingo wakungukinga tahi?
13 Omu nangulyamba ngwami, ‘Kahela kami nakanguvendejeka,Ngwami nakakehesako ukalu wami,’
14 Weji kungwivwisanga woma navilota,Weji kunguzuzwisanga navyakungumwenesa,
15 Ngocho ngweji kusakanga ngwami kachi ngufwenga nachitukulu,Ngwami ngufwenga tuhu kuhambakana kulama mujimba wami.*+
16 Ngunahungu kuyoya chami.+ Kangweshi nakusaka kuyoya likako.Ngweche uka wami, mwomwo makumbi ami anapu nge peho yakuhwima kaha.+
17 Mutu ikiye iyaze numba umuzakame?Ikiye iyaze numba umuhake mangana?*+
18 Mwomwo ika weji kumukekeselanga chimene hichimene,Nakumweseka mwakamwihi mwakamwihi?+
19 Uno kaweshi kutalako kweka,Nakunguseza uka wami nguchimineko maleji tahi?+
20 Kachi nge ngunalingi shili, kaha ukalu mukaze nanguneha hali ove Muka-kutala vatu?+Mwomwo ika unangutakilikila ngana?
Uno ngunapu nguchiteli kuli ove tahi?
21 Ika unazenekela kungukonekela mulonga wami wakuzomboka jishimbiChipwe kuvulyama shili yami?Mwomwo kalinwomu ngusavale mulukungu.+Naungutalatala, oloze kaweshi kungumonako.”
Kwinyikila Chamwishi
^ Chipwe “palanga namuze zwalala.”
^ Hepe., “kukamona cheka kuwahako.”
^ Chipwe “muSheyole,” kulumbununa fuka yavatu vosena. Tala Mukana waMazu.
^ Hepe., “kulama vifuwa vyami.”
^ Hepe., “umuhake muchima?”
