Yopa 8:1-22
8 Mbilitate+ wakuShuwa+ ambile ngwenyi:
2 “Muhanjikanga ngana palanga nakumwaka uka?+Mazu amukanwa kove anapu nge peho yayinene.
3 Uno Kalunga mwahasa kuhengesa chiyulo numba?Ou Wangolo Josena mwahasa kuhengesa jila yakwoloka numba?
4 Kachi nge vana vove valinganga shili kuli Kalunga,Kaha navazangamisa hakulikanga chavo.
5 Oloze nge mulomba kuli Kalunga,+Nakulembelela ou Wangolo Josena akwivwile uselewa,
6 Kachi nge wapwanga uwakwoloka, uwakusungama,+Kachi nakuhake mangana,Nakukulingisa upwenga nge muze wapwile.
7 Numba tuhu kukuputuka wapwile uwakukalikiza,Oloze kusongo naukafukila chikuma.+
8 Achihulise vaka-chisemunwino chakunyima,Achihake mangana kuvyuma vamwene visemi javo.+
9 Chinafwane nge twasemukanga zau, kaha nevi tunatachikiza vyauchi,Mwomwo makumbi etu hano hamavu anapu nge muvwimbimbi.
10 Uno kaveshi kukunangulako,Chipwe kukulweza vyuma vatachikizako numba?*
11 Uno mateve anahase kusuhwa kuchihela chakuzeneka ulova numba?Uno mahongo anahase kusuhwa chakuzeneka meya numba?
12 Shimbu achili andembendembe, kanda ahete halwola lwakuwateta,Nawalivanga kuma shimbu kanda mitondo yeka.
13 Omu mukiko munavapwanga* vosena vaze navavulyama Kalunga,Vyuma vatalilila vaka-kuzamukila* Kalunga kavyeshi kukatesamoko,
14 Vyuma vafwelela vinapu vyaufwefwelekete,Lufwelelo lwavo lwapwa lwakuhehela ngana mwawanda* wakauvi.
15 Mwakundamina hazuvo yenyi, oloze nayishiuka.Mwalijikililaho, oloze kayeshi kuzama mbe koko.
16 Napu nge mutondo ututa uli mumusana,Kaha mitango yawo nayitanjila mulitepa.+
17 Miji yawo nayiliselasana mumalolwa.Kaha mwatonda zuvo yenyi mumalolwa.*
18 Oloze nge vanamutukula* muchihela chenyi,Kaha chize chihela chenyi nachimukana ngwacho, ‘Kangwakutachikizako.’+
19 Omu mukiko mwakajimbangana.+Kaha kumavu nakukafuma veka.
20 Kalunga keshi kukakana vaze veji kulamanga kulonga chavo,*Chipwe kukafwa vatu vavapiko.
21 Mwakazalisa kanwa kove namiselo,Kaha mivumbo yove nawa nayikatwa jingunda.
22 Vaze vakuhunga navakevwa sonyi,Kaha mbalaka yavaka-kuhuka kayeshi kukapwako chekako.”
Kwinyikila Chamwishi
^ Hepe., “Chipwe kutufula mazu amumichima yavoko numba?”
^ Hepe., “Omu mukiko japwa jijila.”
^ Chipwe “vaka-kulikanga kuli.”
^ Hepe., “mwazuvo.”
^ Chipwe “Kaha mwatonda zuvo yenyi yamalolwa.”
^ Chipwe “vanamuminyi.”
^ Chipwe “vaze vazeneka chuma chakuvahanyina mulonga.”
