Yoshuwa 1:1-18
1 Omu alingile ngamba yaYehova Mose hanafu lyehi, Yehova ambile kuli Yoshuwa*+ mwanaNune, uze apwile muka-kuzachila+ Mose ngwenyi:
2 “Ngamba yami Mose nafu.+ Ngocho katuka uzauke Yotau navatu vosena, mangana mwingile mulifuchi lize nanguhana vaIsalele.+
3 Cheshocho chihela namukalyata mahinji enu, nangukachihana kuli enu nganomu ngwashikile Mose.+
4 Ngalila yenu nayikaputukila kupambo nakuya kuLevanone swi nakukalwiji wamunene Yufwalate, lifuchi lyavaHete+ lyosena. Kaha nayikaheta nakuKalungalwiji Wamunene* chakutala kumulauko.+
5 Naumwe wauchi mwakahasa kukwimanyina nakole hamakumbi akuyoya chove osenako.+ Nangukapwanga nayove ngana muze ngwapwilenga naMose.+ Kangweshi kukakumbila chipwe kukusezako.+
6 Umika, jikiza,+ mwomwo ove yove nautetekela vaIsalele vaswane lifuchi eli ngwalishingile kuhana kuli vakakuluka javo.+
7 “Ove umika, jikiza ulamenga Jishimbi josena jize ngwalwezele ngamba yami Mose. Kanda nauhandukila kuchilyo chipwe kuchimosweko+ mangana ulingenga mwakwoloka kweshokwo nauyanga.+
8 Ou mukanda waJishimbi kanda ukafuma mukanwa koveko.+ Utangenga mazu awo nakuwashinganyekanga* musana naufuku mangana ulamenga jishimbi josena vasonekamo.+ Kachi nge naulinganga ngocho, kaha naufukisanga jila yove nakulinganga mwakwoloka.+
9 Anuka omu ngunakulweze ngwami, umika, jikiza. Kanda naulizuzukila chipwe kwivwa womako, mwomwo Yehova Kalunga kove ali nayove kweshokwo nauyanga.”+
10 Kaha Yoshuwa alwezele vakulwane javatu ngwenyi:
11 “Hitenu muchilombo mulweze vatu ngwenu, ‘Likungulwilenu vyakulya, mwomwo kunasale makumbi atatu muzauke kalwiji Yotau nakuya mulifuchi lize mwamihana Yehova Kalunga kenu mangana mulihete.’”+
12 Jino Yoshuwa alwezele muyachi wavaLuvene, navaNgate, nachimbwa chamuyachi waManase ngwenyi:
13 “Anukenu mazu amilwezele ngamba yaYehova Mose, ngwenyi:+ ‘Yehova Kalunga kenu mwakaminokesa nakumihana lifuchi eli.
14 Mapwevo jenu, navana venu, navimuna jenu navasala mulifuchi amihanyine Mose musali yino* yaYotau.+ Oloze vaka-jita vangolo+ vosena valipakate vitwa, vakazauke nakutwaminyina vandumbwenu.+ Vakafwenu
15 palanga nomu Yehova mwahana vandumbwenu kunoka, nge omu namihane enu, nomu navatambula lifuchi lize mwavahana Yehova Kalunga kenu. Kufumaho numba mukakinduluke mulifuchi lyenu vamihanyine kutwama nakuliheta, lifuchi eli amihanyine ngamba yaYehova Mose musali yino yaYotau,+ kumututuko.’”
16 Ngocho vambile kuli Yoshuwa ngwavo: “Natulinga vyuma vyosena unatulweze, kaha natuya kweshokwo naututuma.+
17 Natukwivwilila muvyuma vyosena ngana muze twevwililile Mose. Yehova Kalunga kove apwenga nayove nge muze apwilenga naMose.+
18 Weshowo mwalikanga kulushimbi lwove nakukana kwivwilila mazu ove, vamujihe.+ Oloze ove umika, jikiza.”+
Kwinyikila Chamwishi
^ Chipwe “Yehoshuwa,” kulumbununa “Yehova Ikiye Ulwilo.”
^ Ikiye Kalungalwiji waMendetelenya.
^ Chipwe “nakuhunananangaho.” Hepe., “nalizu lyamwishi.”
^ Kulumbununa, kumutamba wakumututuko.
