Yoshuwa 11:1-23
11 Omu Yavine mwangana waHazole evwile vyuma kana, asanyikile Yovave mwangana waMatone,+ namwangana waShimilone, namwangana waAkashafwe,+
2 navamyangana vaze vapwilenga kungalila yajipili kunote, navaze vakuvyana* kusulo yaKinelete, navaze vakuShefwela, navaze vakumikandu yakuNdole+ kumulauko.
3 Asanyikile nawa vaKanane+ vaze vatwamine kumututuko nakumulauko, navaAmole,+ navaHete, navaPeliji, navaYevuse vaze vapwile kungalila yajipili, navaHivi+ vaze vapwile kushina yapili yaHelemone+ mulifuchi lyaMijipa.
4 Ngocho vamyangana vosena ava vayile namazavu avo avaka-jita, vapwile vavavulu kwijiva nge usekeseke wakungenge yakalungalwiji. Vayile natuvalu vavavulu namatemba ajita amavulu.
5 Vamyangana vosena ava valivwasanyine valiwanyine hamwe, kaha valikungulwilile kutuselwoke vameya vakuMelome mangana valwenga jita navaIsalele.
6 Jino Yehova ambile kuli Yoshuwa ngwenyi: “Kanda uvevwa womako,+ mwomwo hamene halwola nge luno, nanguvahana kuli vaIsalele mangana vavanongese. Kaha mukavatula mishisa yakumahinji atuvalu twavo+ nakwocha matemba avo nakakahya.”
7 Yoshuwa navatu jenyi vaka-kwasa jita vayile kuze kutuselwoke vameya vakuMelome, kaha vakavalukukile mukukasumuna.
8 Yehova avahanyine mumavoko avaIsalele,+ kaha vavafungulwile, vavahangasanyine swi nakunganda yayinene yaShitone,+ nakuMiselefwote-maime,+ nakuChinema chaMijipe kumututuko. Vavajihile vosena, kaha kakwasalile mutu numba umweko.+
9 Yoshuwa alingile nge muze amulwezele Yehova. Atengwile tuvalu twavo nakwocha matemba avo nakakahya.+
10 Kufumaho Yoshuwa akindulukile, kaha atambwile nganda yaHazole nakujiha mwangana wayo napoko yamukwale,+ mwomwo hakavanga Hazole yapwile nganda yayinene kumawangana osena aze.
11 Vajihile+ vatu* vamunganda yaHazole vosena najipoko jamikwale, kamwasalile mutu numba umweko.+ Kaha vochele nganda kana nakakahya.
12 Yoshuwa atambwile jinganda josena nakujiha vamyangana jajo najipoko jamikwale.+ Avanongesele+ ngana muze vamulwezele kuli ngamba yaYehova Mose.
13 Oloze jinganda josena jize japwililile hamilundu, vaIsalele kavajocheleko, shina nganda yaHazole kaha yize ochele Yoshuwa.
14 VaIsalele vapukwile vyuma vyamujinganda vyosena, navimuna.+ Oloze vatu vosena vavajihile najipoko jamikwale, kavaselemo mutu numba umweko.+
15 Yoshuwa+ alingile mwosena muze Yehova alwezele ngamba yenyi Mose. Havyuma vyosena vize Yehova alwezele Mose, Yoshuwa kazombokeleho chuma numba chimweko.+
16 Yoshuwa atambwile lifuchi lyosena lize lyangalila yajipili, naNengeve+ yosena, nangalila yaNgoshene yosena, naShefwela,+ naAlava,+ nangalila yajipili yaIsalele navyana vyayo,
17 nangalila yize yafuma kuPili yaHalake nakuheta kuSeile swi nakuMbale-ngate+ kuChinema chaLevanone kushina yaPili yaHelemone.+ Kaha akwachile vamyangana javo vosena nakuvajiha.
18 Yoshuwa alwile jita navava vamyangana hatando yayisuku.
19 Kakwapwile nganda yalikashile chivwasano chakutwama mukuunda navaIsaleleko, shina Ngiveyone+ kaha yize vatwaminenga vaHivi. Oloze eji jinganda jeka vajitambwile najita.+
20 Yehova avechelele vakaluhwise michima yavo+ valwenga jita navaIsalele, mangana avanongese chakuzeneka kuvevwila keke.+ Vatu kana vatelelele kuvanongesa nge muze Yehova alwezele Mose.+
21 Halwola luze, Yoshuwa anongesele vaAnake+ kungalila yajipili kuHevelone, nakuNdevile, nakuAnave, nakungalila yajipili yaYuta, nayeyi yaIsalele. Yoshuwa avanongesele najinganda javo kumwe.+
22 Mulifuchi lyavaIsalele kamwasalile vaAnakeko, oloze vasalile+ kaha muNgaza,+ namuNgata,+ namuAshatote.+
23 Ngocho Yoshuwa atambwile lifuchi lyosena nge muze Yehova ashikile Mose.+ Alihanyine kuli vaIsalele valipangilelyo kupwa uswana wavo kweseka namiyachi yavo.+ Kaha mulifuchi mwapwile kuunda, kamwapwile cheka jitako.+
