Yoshuwa 13:1-33
13 Jino Yoshuwa apwile hanakulu lyehi, apwile kashinakaji.+ Kaha Yehova ambile kuli ikiye ngwenyi: “Ove hiukashinakaji, hiunakulu lyehi, oloze kunalitulu mafuchi aze mwatela kutambula.*
2 Awa akiko mafuchi analituluko:+ mafuchi avaFwilishite osena, namafuchi avaNgeshule+ osena
3 (kufuma kumwanakalwiji waNyile* kumututuko* waEjipitu swi nakungiza yaEkelone kunote, nganda yize yapwilenga yavaKanane),+ najingalila javamyata vatanu vavaFwilishite+ vaze vayulilenga Ngaza, naAshatote,+ naAshakelone,+ naNgata,+ naEkelone.+ Kwalitulile nangalila yavaAvime+
4 kusulo, nalifuchi lyavaKanane lyosena, naMeyala yize yapwa yavaka-Shitone,+ swi nakuAfweke, nakungiza yavaAmole,
5 nalifuchi lyavaNgevale,+ nangalila yaLevanone yosena kumututuko, kufuma kuMbale-ngate kushina yaPili yaHelemone swi nakuLevo-hamate,*+
6 nangalila yavaka-Shitone+ vaze vatwama kungalila yajipili, kufuma kuLevanone+ swi nakuMiselefwote-maime.+ Ami nangukavahanga kumeso avaIsalele.+ Kahove ukavahanalyo vaIsalele kupwa uswana wavo, ngana muze ngwakulwezele.+
7 Jino kapangile lifuchi eli kumiyachi 9, nachimbwa chamuyachi waManase kupwa uswana wavo.”+
8 Chimbwa chikwavo chamuyachi waManase, namuyachi wavaLuvene, nawou wavaNgate vatambwile uswana wavo uze avahanyine Mose ngamba yaYehova kuYotau chakutala kumututuko,+
9 kufuma kuAlowele+ kukulo yaChinema chaAlanone,*+ swi nakunganda yize yili mukachi kachinema kana, nakuchihela chakusalama chaMeteva chosena kuheta nakuNjivone,
10 najinganda josena jaShihone mwangana wavaAmole uze ayulilenga kuHeshevone swi nakungiza yavaAmone,+
11 naNgileyate nawa, nangalila yavaNgeshule, navaMakate,+ nangalila yaPili yaHelemone, nangalila yaMbashane+ yosena swi nakuSaleka,+
12 nangalila yamwangana Onge kuMbashane, uze ayulilenga kuAshatalote nakuEtelei. (Ou mwangana ikiye alitulileho hali vaLefwaime.)+ Mose avafungulwile nakuvahanga mulifuchi lyavo.+
13 VaIsalele kavahangile+ vaNgeshule navaMakateko, oloze vavechele, kaha vanatwamenga muli vakiko palanga nakulelo.
14 Muyachi wavaLevi kaha ukiko kavahanyine uswanako.+ Wana wakwocha hakakahya uze vahanyinenga Yehova ukiko wapwilenga uswana wavo,+ nge muze avashikile.+
15 Mose ahanyine uswana kumuyachi wavaLuvene kweseka najitanga javo.
16 Kaha ngalila yavo yafumine kuAlowele kukulo yaChinema chaAlanone,* swi nakunganda yize yili mukachi kachinema kana, nachihela chakusalama chaMeteva chosena,
17 naHeshevone, najimbongi+ jakuchihela chakusalama, Njivone, naMbamote-mbale, naMbete-mbalemeyone,+
18 naYahaze,+ naKetemote,+ naMefwate,+
19 naKilyataime, naShivima,+ naZelete-shahale yize yapwilile kupili kwakamwihi nachinema,*
20 naMbete-peyole, namikandu yaPishinga,+ naMbete-yeshimote,+
21 najinganda jakuchihela chakusalama josena, nangalila yaShihone mwangana wavaAmole uze ayulilenga kuHeshevone.+ Mose ajihile mwangana kanou,+ navamyata javaMichane kumwe, Evi, naLekeme, naZule, naHule, naLeva,+ navamyata* jaShihone vaze vatwaminenga mulifuchi lize.
22 Mbalame+ mwanaMbeyole, muka-kutaha,+ naikiye vamujihile kuli vaIsalele napoko yamukwale hamwe navakwavo.
23 Ngiza yavaLuvene yapwile kalwiji Yotau. Ngalila kaneyi najinganda jayo namembo ayo ukiko uswana wavaLuvene kweseka najitanga javo.
24 Mose ahanyine nawa uswana kumuyachi wavaNgate kweseka najitanga javo.
25 Ngalila yavo yapwile Yazele,+ najinganda jaNgileyate josena, nachimbwa chalifuchi lyavaAmone+ swi nakuAlowele kwakulitalasana naLava,+
26 nakufuma kuHeshevone+ kuheta nakuLamate-mijipe, nakuMbetonyime, nakufuma nawa kuMahanaime+ swi nakungiza yaNdevile.
27 Kaha kuchinema* vavahanyineko Mbete-halame naMbete-nyimila,+ naSukote,+ naZafwone, ngalila yize yalitulileko kuwangana waShihone mwangana waHeshevone.+ Yotau yikiko yapwile ngiza yavo swi nakusongo yaKalungalwiji waKinelete,*+ kaha ngalila yavo yapwililile kumututuko waYotau.
28 Ngalila kaneyi najinganda jayo namembo ayo ukiko uswana wavaNgate kweseka najitanga javo.
29 Mose ahanyine nawa uswana kuchimbwa chamuyachi waManase kweseka najitanga javo.+
30 Kaha ngalila yavo yaputukilile kuMahanaime+ nakuheta kuMbashane, ngalila yosena yaOnge mwangana waMbashane, namembo akuYaile+ osena muMbashane. Ngalila yosena yapwile najimbongi 60.
31 Kaha chimbwa chaNgileyate, naAshatalote, naEtelei,+ najinganda jakuwangana waOnge muMbashane, vajihanyine kuli vana vaMakile+ mwanaManase, chipwe ngwetu kuchimbwa chavana vaMakile kweseka najitanga javo.
32 Eji jikiko jingalila avahanyine Mose mulikundu lyaMowave, musali yaYotau, kumututuko waYeliko kupwa uswana wavo.+
33 Oloze muyachi wavaLevi kavauhanyine uswana+ kuli Moseko, mwomwo Yehova Kalunga kaIsalele ikiye apwilenga uswana wavo, nge muze avashikile.+
Kwinyikila Chamwishi
^ Chipwe “kufungulula.”
^ Hepe., “kulutwe.”
^ Chipwe “kufuma kuShihole.”
^ Chipwe “nakuwingililo wakuHamate.”
^ Chipwe “yaMwanakalwiji Alanone.”
^ Chipwe “yaMwanakalwiji Alanone.”
^ Chipwe “nachana.”
^ Kulumbununa, vamyangana vaze vapwile mwishi yaShihone.
^ Kulumbununa, chijiva chaNgenesaleta, chipwe Kalungalwiji waNgalileya.
^ Chipwe “kuchana.”
