Yoshuwa 14:1-15
14 Ou ukiko uswana vatambwile vaIsalele mulifuchi lyaKanane, uze vavahanyine kuli kapilishitu Eleyaza, naYoshuwa mwanaNune, navatwamina vakujizuvo javakakuluka jamiyachi yavaIsalele.+
2 Miyachi 9 nachimbwa chamuyachi,+ vavapangilile uswana wavo kuzachisa tutachikijilo+ ngana muze Yehova alwezele Mose.
3 Mwomwo Mose ahanyine lyehi uswana kumiyachi yivali nachimbwa chamuyachi musali* yize yaYotau.+ VaLevi kavavahanyine uswana muli vaIsaleleko.+
4 Vana vaYosefwe vapwile miyachi yivali,+ muyachi waManase nawou waEfwalime.+ Oloze vaLevi kavavahanyine uswana mulifuchiko, shina jinganda+ jakutwamamo kaha, navipapa vyakulila vimuna javo nakulaminamo vyuma vyavo.+
5 Ngocho vaIsalele valipangililile lifuchi nge muze Yehova alwezele Mose.
6 Jino malunga vavaYuta vapandamine kuli Yoshuwa kuNgilingale.+ Kaha Kaleve+ mwanaYefune kaKenaze ambile kuli Yoshuwa ngwenyi: “Ove unatachikiza kanawa mazu ahanjikile+ Yehova kuli ngamba yenyi+ Mose hali ami nayove kuKateshe-mbalaneya.+
7 Ngwapwile namyaka 40 omu Mose ngamba yaYehova angutumine kufuma kuKateshe-mbalaneya nakuya nakusondwesa lifuchi.+ Kaha ngwakindulukile nakumulweza mwosena muze ngwakawanyine kuze.*+
8 Numba tuhu vandumbwami vaze ngwayile navo valingishile vatu valizuzukile,* oloze ami ngwakavangijile Yehova Kalunga kami namuchima wami wosena.+
9 Mose alishingile halikumbi lize ngwenyi: ‘Lifuchi eli unalyate mahinji ove nalikapwa uswana wove navana vove haya myaka yosena, mwomwo unakavangiza Yehova Kalunga kami namuchima wove wosena.’+
10 Nge muze vene Yehova ahanjikile,+ Yehova nangulame+ hamyaka eyi 45 kufuma haze ashikile Mose omu vatambukilenga vaIsalele mupambo.+ Kaha noholili chinguyoya, nguli jino namyaka 85.
11 Nguchili nangolo nge jize ngwapwile najo halikumbi lize angutumine Mose. Noholili nguchili nangolo jakuya kujita nakuzata milimo yeka nge muze ngwapwile hakavanga.
12 Shikaho nguhane ngalila yajipili nge muze ahanjikile Yehova halikumbi lize. Numba tuhu wevwile ngwavo kuchihela kana kwatwama vaAnake,+ kaha jinganda jatwamamo nawa jikwechi jikembwe jakukola,+ oloze Yehova mwapwa nayami,+ nanguvahangamo nge muze ashikile Yehova.”+
13 Ngocho Yoshuwa akiswile Kaleve mwanaYefune, kaha amuhanyine Hevelone kupwa uswana wenyi.+
14 Shikaho Hevelone yapwila uswana waKaleve mwanaYefune kaKenaze palanga nakulelo, mwomwo akavangijile Yehova Kalunga kaIsalele namuchima wenyi wosena.+
15 Hakavanga Hevelone vayivulukilenga ngwavo Kilyate-alava+ (Alava apwile mutu wangolo muli vaAnake). Kaha mulifuchi mwapwile kuunda, kamwapwile cheka jitako.+
Kwinyikila Chamwishi
^ Kulumbununa, kumutamba wakumututuko.
^ Hepe., “nakumulweza mazu nge aze apwile mumuchima wami.”
^ Hepe., “valingishile michima yavatu yiyengunuke.”
