Yoshuwa 2:1-24
2 Jino Yoshuwa mwanaNune atumine vandoji vavali kufuma kuShichime.+ Avalwezele ngwenyi: “Yenunga mukasondwese lifuchi, chikumanyi nganda yaYeliko.” Ngocho vayile, vakahetele kuzuvo yaLahave+ pwevo muka-ujila, kaha vatwamine vene kuze.
2 Vatu valwezele mwangana waYeliko ngwavo: “Tala! Malunga vavaIsalele vaneza chingoloshi chino nakusondwesa lifuchi lyetu.”
3 Ngocho mwangana waYeliko atumine mazu kuli Lahave ngwenyi: “Lovola malunga vaze vaneza muzuvo yove, mwomwo vaneza kuno nakusondwesa lifuchi lyetu lyosena.”
4 Oloze uze pwevo aswekele vaze malunga vavali. Kaha ambile ngwenyi: “Mukiko vene, ava malunga vezanga kuli ami, oloze kangwejivile okwo vafumangako.
5 Kahomu kwelavanga, shimbu kanda vasoke vikolo vyanganda, valovokanga nakuya. Oloze kangwatachikijile okwo vanayiko. Kachi nge namuvakavangiza jimbushi namuvawana.”
6 (Oloze ikiye avatwalile hamulungu wazuvo, kaha avaswekele muvisachi vyalinyu vize valumbikile hamulungu.)
7 Vaze malunga vamunganda vakavangijile vaze vandoji chakutala kumwava+ waYotau. Kahomu valingile hivanalovoka lyehi, chikolo changanda vachisokele.
8 Shimbu vapwile vaze vandoji kanda vachisavale, Lahave ayile kuli vakiko haze hamulungu vapwile.
9 Kaha ambile kuli vakiko ngwenyi: “Ngunatachikiza ngwami Yehova mwamihana lifuchi lino.+ Puho yenu yinatuzuzwisa,+ kaha vatu vosena mulifuchi lino vali nachiwomawoma mwomwo yayenu.+
10 Twevwile omu Yehova omishile meya amuKalungalwiji Uchila halwola mwafumine kuEjipitu,+ novyo mwalingile kuli vamyangana javaAmole, vaShihone+ naOnge+ vaze mwanongesele musali* yaYotau.
11 Omu twevwile mijimbu kana twahombele,* kaha oholili kakweshi mutu mwomika* nakumimanyina nakoleko, mwomwo Yehova Kalunga kenu apwa Kalunga wamwilu nahano hamavu.+
12 Shikaho lishingenu Yehova ngwenu namukasolwela vakuzuvo yatata zangi yakwilila nganomu ngunamisolwelayo ami, kaha nguhanenu chinjikizo chamwenemwene.
13 Mukayovola tata namama, navandumbwami vamalunga navava vamapwevo, navaze vakujizuvo javo vosena, kaha mukatukinge kukufwa.”+
14 Ngocho vaze vandoji vambile kuli ikiye ngwavo: “Nachikawaha kufwa etu muchishishisa chakufwa enu.* Kachi nge kamweshi kulweza vatu ovyo tunakatukilako, kaha natukamisolwela zangi yakwilila nakupwa vakushishika kuli enu omu Yehova mwakatuhana lifuchi lino.”
15 Kufumaho avalowelelele munjanena namukole, mwomwo zuvo yenyi yapwile kuluhachi lwakembwe yanganda. Kaha ikiye atwaminenga helu lyakembwe.+
16 Lahave ambile kuli vakiko ngwenyi: “Yenu kungalila yajipili muswame kuze makumbi atatu, mangana vaze vali nakumikava vahone kumiwana. Omu navakinduluka vaze vali nakumikava, numbanyi mukaye kumahyenu.”
17 Vaze malunga vambile kuli ikiye ngwavo: “Natulama lushingo elu unatushingisa mangana tukazeneke kupwa namulonga.+
18 Omu natukeza mulifuchi lino, tukawane unakase elu lufungo luchila munjanena muze unatulowela. Kaha ukasanyika iso, nanoko, navandumbwove vosena, navosena vaze vali kuzuvo yaiso vakakungulukile muzuvo yove.+
19 Kachi nge nakukapwa umwe mwakalovoka muzuvo yove nakuya haweluka, manyinga enyi nawakapwa hamutwe wenyi, etu katweshi kukapwa namulonga wamanyingako. Oloze nge hali vaze navakapwa nayove muzuvo nahakafwa umwe, kaha mulonga wamanyinga enyi naukapwa hamitwe yetu.
20 Kachi nge nawambulila nawa vatu veka ovyo tunakatukila,+ kaha katweshi kukapwa namulonga halushingo elu unatushingisako.”
21 Ikiye ambile kuli vakiko ngwenyi: “Chipwenga vene nganomu munahanjika.”
Ngocho avasuwile vayenga, kaha valiyililile mujila yavo. Kufumaho akashile luze lufungo luchila munjanena.
22 Kaha vakiko vayile kungalila yajipili, vakatwamine kuze makumbi atatu palanga nomu vakindulukile vaze vavakavile. Vaze vavakavangijile, vatalatalile mujijila josena, oloze kavavawanyineko.
23 Vaze vandoji vavali vafumine kuze kungalila yajipili, vazaukile kalwiji nakuya kuli Yoshuwa mwanaNune. Kaha vamulwezele vyuma vyosena vize vyasolokele kuli vakiko.
24 Kaha vambile kuli ikiye ngwavo: “Yehova natuhane lifuchi lyosena mumavoko etu.+ Vatu vosena nawa mulifuchi vali nachiwomawoma mwomwo yayetu.”+
Kwinyikila Chamwishi
^ Kulumbununa, kumutamba wakumututuko.
^ Hepe., “kaha oholili shipilitu kayakatukile muli mutuko.”
^ Hepe., “michima yetu yayengunukile.”
^ Chipwe “Myono yetu yikafwe muchishishisa chakufwa myono yenu.”
