Yoshuwa 20:1-9
-
Jinganda jakuswamamo (1-9)
20 Jino Yehova ambile kuli Yoshuwa ngwenyi:
2 “Lweza vaIsalele ngwove, ‘Lisakwilenu enu vavene jinganda jakuswamamo+ jize ngwavulukile kuli enu kuhichila muli Mose,
3 mangana weshowo mwakajiha mukwavo* chakuzeneka kuchisakula* akachinyinemo. Jinganda kana jikapwe jakuswamamo mutu ali nakuchina muka-kulinga sambanjinga.+
4 Akachinyine kunganda yimwe hajinganda kana jize,+ kaha akemane kuchikolo chayo+ nakulweza vakulwane vanganda chihande chenyi. Vaze vakulwane vakamwitavile nakumuhana chihela chakutwamamo.
5 Nge muka-kulinga sambanjinga mwakamuhangasana, kaha vaze vakulwane kanda vakamuhana mumavoko enyiko, mwomwo ajihanga mukwavo chakuzeneka kuchisakula,* kaha nawa kapwanga nachijindo nenyiko.+
6 Uze ajihanga mukwavo akatwame munganda kana palanga nomu navakamusopesa kulizavu+ lyavaka-kuyula. Kachi nge navakawana ngwavo ajihanga mukwavo chakuzeneka kuchisakula, kaha akatwame munganda kana palanga nomu mwakafwa kapilishitu wakulitulaho,+ numba akakinduluke kunganda yenyi nakuzuvo yenyi kuze afumine.’”+
7 Ngocho vatongwele* nganda yaKeteshe+ kuNgalileya kungalila yajipili yavaNafwatale, nayeyi yaShekeme+ kungalila yajipili yavaEfwalime, naKilyate-alava+ chipwe ngwavo Hevelone kungalila yajipili yavaYuta.
8 Kaha kumututuko waYotau, kwakulitalasana naYeliko, vasakwileko nganda yaMbezele+ mupambo kuchihela chakusalama kungalila yamuyachi waLuvene, naLamote+ muNgileyate kungalila yamuyachi waNgate, naNgolane+ muMbashane kungalila yamuyachi waManase.+
9 Eji jikiko jinganda vatongwelele vaIsalele vosena, navamwiza vaze vatwaminenga mukachi kavo, mangana weshowo mwajiha mukwavo* chakuzeneka kuchisakula achinyineko+ kuchina navamujiha kuli muka-kulinga sambanjinga. Kaha akatwamenga kuze palanga nomu navakamusopesa kulizavu lyavaka-kuyula.+
Kwinyikila Chamwishi
^ Chipwe “mwakajiha mwono.”
^ Chipwe “chakuzeneka kutachikiza.”
^ Chipwe “chakuzeneka kutachikiza.”
^ Chipwe “vahandwile.”
^ Chipwe “mwono.”
