Yoshuwa 22:1-34
22 Jino Yoshuwa asanyikile vaLuvene navaNgate nachimbwa chamuyachi waManase,
2 ambile kuli vakiko ngwenyi: “Munalingi vyuma vyosena vize amilwezele+ Mose ngamba yaYehova, kaha nawa munononokanga mazu ami ngunamilwezenga.+
3 Kamwasezele vandumbwenuko palanga nakulikumbi lyalelo.+ Oloze munalamenga jishimbi amilwezele Yehova Kalunga kenu.+
4 Ngocho Yehova Kalunga kenu nanokesa lyehi vandumbwenu nge muze avashikile.+ Shikaho kindulukenu kujimbalaka jenu mulifuchi lyenu lize amihanyine Mose ngamba yaYehova musali* yaYotau.+
5 Lamenunga jindongi naJishimbi jize amilwezele Mose ngamba yaYehova,+ muzangenga Yehova Kalunga kenu,+ nakutambukanga mujijila jenyi,+ nakulamanga jishimbi jenyi,+ nakulipanjikanga nenyi,+ nakumuzachilanga+ namichima yenu yosena, namyono* yenu yosena.”+
6 Ngocho Yoshuwa avakiswile nakuvasuula, kaha vayile kujimbalaka javo.
7 Mose ahanyine ngalila yaMbashane+ kuchimbwa chamuyachi waManase. Kaha Yoshuwa ahanyine ngalila yaYotau+ yakumulauko kuchimbwa chikwavo chamuyachi waManase navandumbwavo hamwe. Kahomu Yoshuwa avasuwile vayenga kujimbalaka javo, avakiswile,
8 nakwamba kuli vakiko ngwenyi: “Mbatenu luheto lwaluvulu, navimuna, napalata, naulu, naunengu, nauvwalo wauvulu mangana mukinduluke kujimbalaka jenu.+ Kaha lipangilenu+ navandumbwenu vyuma munapukula kuli vaka-kole jenu.”
9 Ngocho vaLuvene, navaNgate, nachimbwa chamuyachi waManase vafumine kuli vandumbwavo vaIsalele kuShilo mulifuchi lyaKanane nakukinduluka kuNgileyate+ kungalila yavo yize avahanyine Yehova kuhichila muli Mose.+
10 Omu vahetele kwakamwihi naYotau mulifuchi lize lyaKanane, vaLuvene, navaNgate, nachimbwa chamuyachi waManase vatungile lijiko lyakulumbila lyalinene kuze.
11 Jino vaIsalele vavalwezele+ ngwavo: “VaLuvene, navaNgate, nachimbwa chamuyachi waManase vanatungu lijiko lyakulumbila kungiza yalifuchi lyaKanane kwakamwihi naYotau, musali muno muli yetu.”
12 Omu vaIsalele vevwile mazu kana, lizavu lyosena lyakungulukile kuShilo+ mangana vayenga nakulwa navo jita.
13 Jino vaIsalele vatumine Fwinehase+ mwanakapilishitu Eleyaza, ayenga kuli vaLuvene, navaNgate, nachimbwa chamuyachi waManase kungalila yaNgileyate.
14 Vamutumine hamwe navamyata 10, mwata umwe umwe wakuzuvo yavakakuluka jamiyachi yavaIsalele. Kaha vapwile mutu himutu twamina wakuzuvo yavakakuluka jamakombakaji* avaIsalele.+
15 Omu vahetele kuli vaLuvene, navaNgate, nachimbwa chamuyachi waManase kungalila yaNgileyate, vambile kuli vakiko ngwavo:
16 “Lizavu lyosena lyavatu jaYehova vanambe ngwavo, ‘Ika munalingila chuma kanechi chachipi+ kumeso aKalunga kaIsalele? Munaseze Yehova hakulitungila lijiko lyakulumbila nakulikanga kuli Yehova.+
17 Uno shili yize twalingile kuPeyole yayindende tahi? Mwomwo noholili kanda tuchilitomese kuyikiko numba tuhu uze musongo wachihita wejile halizavu lyavatu jaYehova.+
18 Muli nakusaka kuseza Yehova likumbi lyalelo. Oloze ijivenu ngwenu nge namulikanga kuli Yehova lelo, kaha hamene utenu waYehova nawiza halizavu lyavaIsalele lyosena.+
19 Kachi nge munamono ngwenu lifuchi lyenu linapihi, kaha zaukenu Yotau mwizenga mulifuchi lyaYehova+ muli tavanaku yaYehova,+ mangana mutwamenga nayetu. Kanda namulikanga kuli Yehovako, chipwe kutulingisa tulikange kuli ikiye nakulitungila lijiko lyeka lyakulumbila lyakuwezela kulijiko lyakulumbila lyaYehova Kalunga ketuko.+
20 Uno shili alingile Akane+ mwanaZela yakumbata vyuma vyakutela kunonga, kayalingishile utenu waKalunga wizenga halizavu lyavaIsalele lyosenako tahi?+ Akane kafwile kaha uka wenyi hamulonga alingileko.’”+
21 Ngocho vaLuvene, navaNgate nachimbwa chamuyachi waManase vakumbulwile vatwamina jamakombakaji* avaIsalele ngwavo:+
22 “Yehova Kalunga katulunga, Yehova+ Kalunga katulunga natachikiza, kaha nayenu vaIsalele nawa namutachikiza. Ove Yehova, kachi nge tunalikange nakulinga chuma chachipi kumeso ove, kaha kanda nautuyovola likumbi lyaleloko.
23 Kachi nge tunalitungila lijiko lyakulumbila mangana ngwetu tumuseze Yehova chipwe kulumbilaho wana wakulumba, chipwe wana wamanona, chipwe mawana akusolola kuunda, kaha Yehova atuzangamise.+
24 Oloze twalinganga ngocho mwomwo twalizakamina havyuma vyeka, ngwetu, ‘Kulutwe vana venu navakamba kuli vana vetu ngwavo: “Lisesa muka muli nalyo lyakulemesa Yehova Kalunga kaIsalele hamwe nayetu?
25 Yehova nasakula Yotau kupwa ngiza hakachi ketu nayenu vaLuvene, navaNgate. Enu kamweshi nachazano kuli Yehovako.” Vana venu navakalingisa vana vetu vakahone kulemesa* Yehova.’
26 “Ngocho twalyambanga ngwetu, ‘Tulitungilenu lijiko lyakulumbila, keshi lyamawana akulumba, chipwe lyakuvatwila vimunako,
27 oloze nalipwanga kaha unjiho hakachi ketu nayenu,+ nahakachi kavaka-tanga* yetu vaze navakeza hanyima yetu, mangana tukazatenga milimo yaYehova kumeso enyi nakuhana mawana etu akulumba nawawa avimuna vakuvatula, nawawa akusolola kuunda,+ mangana vana venu kulutwe vakazeneke kwamba kuli vana vetu ngwavo: “Enu kamweshi nachazano kuli Yehovako.”’
28 Kaha nawa ngwetu, ‘Omu navakamba ngocho kuli etu chipwe kuli vana* vetu, natukamba ngwetu: “Talenu lijiko lyakulumbila vatungile vakakuluka jetu lize lyalifwana nalize lyaYehova. Likiko kalyeshi lyamawana akulumba chipwe lyakuvatwila vimunako, oloze linapu kaha unjiho hakachi ketu nayenu.”’
29 Katweshi kuhasa kulikanga kuli Yehova nakuseza Yehova+ hakutunga lijiko lyakulumbila mawana akulumba, namawana amanona, navimuna vakuvatula, lyakuwezela kulijiko lyaYehova Kalunga ketu lize lili kutavanakuko.”+
30 Omu kapilishitu Fwinehase, navamyata jalizavu lyavaIsalele, navatwamina vakujizuvo javakakuluka jamakombakaji* avaIsalele vevwile mazu vahanjikile vaLuvene, navaNgate, nachimbwa chamuyachi waManase vasuulukile.+
31 Ngocho Fwinehase mwanakapilishitu Eleyaza ambile kuli vaLuvene, navaNgate, nachimbwa chamuyachi waManase ngwenyi: “Lelo tunatachikiza jino ngwetu Yehova ali mukachi ketu tuvosena, mwomwo kamwalingile shili kumeso aYehovako. Munayovola vaIsalele mulivoko lyaYehova.”
32 Kaha Fwinehase mwanakapilishitu Eleyaza, navaze vamyata vasezele vaLuvene, navaNgate kungalila yaNgileyate nakukinduluka kulifuchi lyaKanane kuli vaIsalele vaze vasalile, kaha vavalwezele mujimbu wosena.
33 VaIsalele vasuulukile namujimbu vavalwezele. Valishile Kalunga, kaha kavashinganyekele cheka kuya nakulwa jita navaLuvene, navaNgate nakunongesa lifuchi lize vatwaminengako.
34 Kaha vaLuvene, navaNgate valukile lize lijiko lyakulumbila* lijina, mwomwo ngwavo, “linapu unjiho mukachi ketu ngwetu, Yehova ikiye Kalunga wamuchano.”
Kwinyikila Chamwishi
^ Kulumbununa, kumutamba wakumututuko.
^ Tala Mukana waMazu.
^ Chipwe “javisaka.”
^ Chipwe “javisaka.”
^ Hepe., “vakahone kwivwa woma.”
^ Hepe., “kavisemunwino.”
^ Hepe., “chipwe kuvisemunwino.”
^ Chipwe “javisaka.”
^ Kweseka nomu vanalumbununa, eli lijiko lyakulumbila valilukile ngwavo Unjiho.
