Yoshuwa 23:1-16
23 Omu mwahichile makumbi amavulu kufuma haze Yehova anokesele vaIsalele+ hakuvalwila kuli vaka-kole javo, kaha nawa Yoshuwa hanakulu lyehi, hanapu lyehi kashinakaji,+
2 Yoshuwa asanyikile vaIsalele vosena,+ navakulwane javo, navatwamina javo, navaka-kuvayula, navilolo javo,+ avalwezele ngwenyi: “Ami hingunakulu lyehi, hingukashinakaji.
3 Enu munalimwena vyuma vyosena vize nalingi Yehova Kalunga kuli vaka-mafuchi osena mwomwo yayenu. Yehova Kalunga kenu ikiye namyashilanga jita.+
4 Ngwamipangilile jingalila javaka-mafuchi jize jasalileho kuzachisa tutachikijilo+ kupwa uswana wamiyachi yenu,+ najingalila javatu vaze ngwanongesele,+ kufuma kuYotau mbwe nakuKalungalwiji Wamunene* kumulauko.
5 Yehova Kalunga kenu ikiye avamwangile nakuvahanga kumeso enu,+ kaha mwatambwile lifuchi lyavo ngana muze amishikile Yehova Kalunga kenu.+
6 “Shikaho jikizenunga mulame vyuma vyosena vize vasoneka mumukanda waJishimbi+ jaMose, mangana muzeneke kuya kuchilyo chipwe kuchimoswe,+
7 mangana mukanenga kulikata navatu vaze vanasale mulifuchi lyenu.+ Kanda namukavuluka majina atulunga twavo,+ chipwe kulishingavo, chipwe kuvazachila, chipwe kulifukula kuli vakikoko.+
8 Oloze kakachilenunga kuli Yehova Kalunga kenu+ ngana muze munalinginga palanga nakulikumbi lyalelo.
9 Yehova mwakamihangila vaka-mafuchi amanene, angolo kumeso enu,+ mwomwo kakweshi mutu umwe nemananga kumeso enu nakulikumbi lyaleloko.+
10 Mutu umwe muli enu mwakahanga vatu 1,000,+ mwomwo Yehova Kalunga kenu ikiye mwakamyashila jita+ ngana muze amishikile.+
11 Ngocho lilamenunga shimbu yosena,*+ mangana muzangenga Yehova Kalunga kenu.+
12 “Oloze kachi nge namukakinduluka nakulikata navatu vaze vanasale mulifuchi,+ nakulimbachila navo,+
13 kaha ijivenu ngwenu Yehova Kalunga kenu keshi kukamihangila vaka-mafuchi kana kumeso enuko.+ Navakapwa nge muheto, nalikambwila kuli enu, nachikote vanavete kujihachi jenu,+ namingonga hameso enu, palanga nomu namukanonga mulifuchi lyamwaza namihane Yehova Kalunga kenu.
14 “Ami jino hinangufwa.* Kahenu munatachikiza namichima yenu yosena namyono* yenu yosena ngwenu, hamazu osena aze ashikile Yehova Kalunga kenu, kahalihonene lizu numba limweko. Mazu osena anatesamo. Kakwalihonene lizu numba limweko.+
15 Nge muze jinatesamo jishiko jize amishikile Yehova Kalunga kenu, mukiko nawa munavikatesamo+ vihuli vize amivulukilile* Yehova, kaha mwakaminongesa mulifuchi lyamwaza namihane Yehova Kalunga kenu.+
16 Kachi nge namuhokola lushiko amishikile Yehova Kalunga kenu, nakuzachila tulunga veka nakulifukula kuvakiko, kaha utenu waYehova naukeza hali enu+ nakuminongesa washi mulifuchi lyamwaza lize namihane.”+
Kwinyikila Chamwishi
^ Ikiye Kalungalwiji waMendetelenya.
^ Chipwe “lamenunga chikuma myono yenu.”
^ Hepe., “Likumbi lyalelo nguli nakuya omu veji kuyanga vaka-mavu vosena.”
^ Tala Mukana waMazu.
^ Chipwe “munawakatesamo mazu amapi osena amivulukilile.”
