Yoshuwa 24:1-33
-
Yoshuwa mwahituluka mumujimbu wavaIsalele (1-13)
-
Mwavalembelela vazachile Yehova (14-24)
-
“Ami navava vakuzuvo yami natuzachilanga Yehova” (15)
-
-
Yoshuwa mwalishika lushiko navaIsalele (25-28)
-
Yoshuwa mwafwa, navamufunda (29-31)
-
Vifuhwa vyaYosefwe navavifunda kuShekeme (32)
-
Eleyaza mwafwa, navamufunda (33)
24 Jino Yoshuwa akungulwilile miyachi yosena yavaIsalele kuShekeme, kaha asanyikile vakulwane javaIsalele, navatwamina javo, navaka-kuvayula, navilolo javo,+ ngocho vejile nakwimana kumeso aKalunga wamuchano.
2 Yoshuwa ambile kuli vatu vosena ngwenyi: “Yehova Kalunga kaIsalele nambe ngwenyi, ‘Kushikulu,+ vakakuluka jenu+ vatwaminenga musali yaKalwiji,* hohamwe vene naTela ise yaApalahama naNahole, kaha valemeselenga tulunga veka.+
3 “‘Kutwala muze ngwambachile kakuluka yenu Apalahama+ musali yaKalwiji* nakumuhichisa mulifuchi lyaKanane lyosena, kaha ngwavulishile vaka-tanga* yenyi.+ Ngwamuhanyine Isaka,+
4 kaha Isaka ngwamuhanyine Yakova naEsau.+ Kaha Esau ngwamuhanyine ngalila yaPili yaSeile kupwa uswana wenyi.+ Jino Yakova navana venyi vayile kuEjipitu.+
5 Kufumaho ngwatumine Mose naAlone,+ kaha ngwavetele Ejipitu navipupu.+ Kutwala muze ngwamilowelemo.
6 Omu ngwapwile nakulovola vakakuluka jenu muEjipitu,+ vaEjipitu vamihangasanyine namatemba ajita, navaka-kutambukila hatuvalu swi nakuKalungalwiji Uchila.+
7 Ngocho vaputukile kuteta kuli ami Yehova.+ Kaha ngwahakile livwi lilava mukachi kenu navaEjipitu, nakwecha meya akalungalwiji avafwike.+ Meso enu amwene vyuma ngwalingile muEjipitu,+ kufumaho mwatwamine myaka* yayivulu mupambo.+
8 “‘Ngwamitwalile mulifuchi lyavaAmole vaze vatwaminenga musali* yize yaYotau, kaha vamizungishile.+ Oloze vaAmole ngwavahanyine mumavoko enu muvanongese, mangana mutambule lifuchi lyavo.+
9 Jino Mbalaka mwanaJipole, mwangana waMowave, akatukile mangana akalwe jita navaIsalele. Ngocho akambile Mbalame mwanaMbeyole mangana amyangule.+
10 Oloze ami kangwamwitavishileko.+ Ikiye amikiswile lika,+ ngocho ngwamipululwile mumavoko enyi.+
11 “‘Kufumaho mwazaukile Yotau+ nakuya kuYeliko,+ kaha vatwamina* vakuYeliko, navaAmole, navaPeliji, navaKanane, navaHete, navaNgilingashe, navaHivi, navaYevuse, valwile jita nayenu. Oloze ngwavahanyine mumavoko enu.+
12 Ngocho ngwavalingishile vamivwe woma, kaha vamichinyine nge muze vamichinyine vamyangana javaAmole vavali.+ Kavachinyine mwomwo yajipoko jenu jamikwale namata enu amananako, nduma.+
13 Ngwamihanyine lifuchi lyavo lize mwazenekele kukilikichila, najinganda javo jize kamwatungileko,+ kaha munatwamengamo. Muli nakulya mihako yamivinyo nayeyi yamilive mumande aze kamwalimineko.’+
14 “Ngocho mwivwenunga Yehova woma, muzachilenunga mukulonga* namukashishi.*+ Mbilenu tulunga vaze vakakuluka jenu vazachililenga musali yaKalwiji* namuEjipitu+ mangana mumuzachilenga Yehova.
15 Kachi nge munamono ngwenu chinapihi kumuzachila Yehova, kaha sakulenu likumbi lyalelo owo namuzachilanga,+ numba tulunga vaze vakakuluka jenu vazachililenga musali yize yaKalwiji*+ chipwe tulunga vavaAmole vamulifuchi lino muli nakutwama.+ Oloze ami navava vakuzuvo yami natuzachilanga Yehova.”
16 Ngocho vatu vamukumbulwile ngwavo: “Etu katweshi kuhasa kuseza Yehova nakuzachila tulunga vekako.
17 Yehova Kalunga ketu ikiye atulowele navakakuluka jetu mulifuchi lyaEjipitu,+ muzuvo yaundungo,+ uze nawa alingile vinjikizo vyakukomwesa kumeso etu+ nakutulama muungeji wetu wosena, namujingalila javatu muze twahichile.+
18 Kaha Yehova ahangile vatu veka naveka kumeso etu, navaAmole vaze vatwaminenga mulifuchi lino. Ngocho nayetu nawa natumuzachilanga Yehova mwomwo ikiye Kalunga ketu.”
19 Jino Yoshuwa ambile kuli vatu ngwenyi: “Kamweshi kuhasa kuzachila lika Yehovako mwomwo apwa Kalunga wajila.+ Asaka vatu valihanenga kuli ikiye namichima yavo yosena.+ Keshi kukamikonekela milonga yenu yakuzombwojoka jishimbi,* najishili jenuko.+
20 Kachi nge namumuseza Yehova nakuzachila tulunga veka, kaha naikiye mwakamiseza nakuminongesa numba tuhu namilingila lyehi vyuma vyamwaza.”+
21 Kaha vatu vambile kuli Yoshuwa ngwavo: “Nduma, natumuzachilanga Yehova.”+
22 Yoshuwa ambile kuli vatu ngwenyi: “Enu vavene munapu muvinjiho mwomwo munalisakwila enu vavene kumuzachila Yehova.”+ Ngocho vatu vakumbulwile ngwavo: “Eyo, tuvinjiho vene.”
23 Yoshuwa ambile ngwenyi: “Shikaho mbilenu tulunga veka vaze vali muli enu, lihanenu kuli Yehova Kalunga kaIsalele namichima yenu yosena.”
24 Kaha vatu vambile kuli Yoshuwa ngwavo: “Natumuzachilanga Yehova Kalunga ketu nakwivwililanga mulizu lyenyi.”
25 Ngocho Yoshuwa alikashile chivwasano navatu halikumbi lize, kaha avahanyine jishimbi namazu akuyula kuShekeme.
26 Kaha Yoshuwa asonekele mazu awa mumukanda waJishimbi jaKalunga.+ Ambachile lilolwa lyalinene, alimikile mwishi yamutondo waunene+ uze wapwile kwakamwihi nachihela chaYehova chajila.
27 Yoshuwa ambile kuli vatu vosena ngwenyi: “Talenu! Eli lilolwa nalipwanga unjiho wakutupayisa etu+ mwomwo linevu mazu osena nahanjika Yehova kuli etu. Shikaho nalipwanga unjiho wakumipayisa enu kuchina namukakana Kalunga kenu.”
28 Kufumaho Yoshuwa asuwile vatu, kaha vayile mutu himutu kungalila yenyi.+
29 Omu vyakumine vyumevi, ngamba yaYehova, Yoshuwa mwanaNune afwile omu apwile namyaka yakusemuka 110.+
30 Ngocho vamufunjile kungalila yenyi kuChiminate-sela,+ yize yatwama kungalila yaEfwalime yajipili kunote yaPili yaNgashe.
31 VaIsalele vazachililenga Yehova hamakumbi aYoshuwa osena, nahamakumbi avakulwane vaze vatwalilileho kuyoya omu alingile Yoshuwa hanafu lyehi, vaze nawa vatachikijile vyuma vyosena vize Yehova alingilile vaIsalele.+
32 Jino vifuwa vyaYosefwe+ vize vambachile vaIsalele hakulovoka muEjipitu, vavifunjile kuShekeme hamusuka wamavu uze alanjile Yakova najimbongo japalata 100+ kuli vana vaHamole+ ise yaShekeme. Ou musuka vauhanyine kuli vana vaYosefwe kupwa uswana wavo.+
33 Eleyaza mwanaAlone naikiye afwile,+ kaha vamufunjile kupili yamwanenyi Fwinehase+ yize vamuhanyine kungalila yajipili yaEfwalime.
Kwinyikila Chamwishi
^ Ikiye Yufwalate.
^ Ikiye Yufwalate.
^ Hepe., “mbuto.”
^ Hepe., “makumbi.”
^ Kulumbununa, kumutamba wakumututuko.
^ Chipwe pamo, “kaha venyangalila.”
^ Chipwe “chakuzeneka chuma chakumihanyina mulonga.”
^ Chipwe “namumuchano.”
^ Ikiye Yufwalate.
^ Ikiye Yufwalate.
^ Chipwe “Keshi kukamikonekela kulikanga chenu.”
