Yoshuwa 3:1-17
-
VaIsalele navazauka Yotau (1-17)
3 Jino Yoshuwa navaIsalele* vosena vahindukile chimenemene, vakatukile kuShichime+ nakukaheta kuYotau. Kaha vasavalile kuze shimbu vapwile kanda vachizauke.
2 Omu mwahichile makumbi atatu, vakulwane javatu+ vahichile muchilombo chosena.
3 Valwezele vatu ngwavo: “Omu namumona chikasha chalushiko lwaYehova Kalunga kenu vanachimbate kuli vapilishitu+ vavaLevi, kaha katukenu muchikavangize.
4 Oloze hakachi kenu nachikiko hapwenga tando yakweseka kafwe mujikuvite 2,000.* Kanda namupandamakoko, muchikavangize mangana mutachikize jila mwatela kuya, mwomwo jila kana kanda muyihitengaho lyehi.”
5 Yoshuwa ambile kuli vatu ngwenyi: “Lijilikenu,+ mwomwo hamene Yehova mwalinga vyuma vyakukomwesa muli enu.”+
6 Kaha ambile kuli vapilishitu ngwenyi: “Mbatenu chikasha+ chalushiko, mutwaminyine vatu.” Ngocho vambachile chize chikasha chalushiko, kaha vatwaminyinyine vatu.
7 Jino Yehova ambile kuli Yoshuwa ngwenyi: “Likumbi lyalelo nangukutohwesa kumeso avaIsalele vosena,+ mangana vatachikize ngwavo nangupwanga nayove+ ngana muze ngwapwilenga naMose.+
8 Lweza vapilishitu vaka-kumbata chikasha chalushiko ngwove: ‘Omu namuheta kukulo yaYotau nakulyata mumeya, mukemana vene muYotau.’”+
9 Yoshuwa ambile kuli vaIsalele ngwenyi: “Pandamenu kuno mwivwilile mazu aYehova Kalunga kenu.”
10 Kaha ambile ngwenyi: “Namutachikiza jino ngwenu Kalunga ou ayoya ali mukachi kenu,+ kaha mwahanga vaKanane, navaHete, navaHivi, navaPeliji, navaNgilingashe, navaAmole, naYevuse+ kumeso enu.
11 Talenu! Chikasha chalushiko lwaMwata wahamavu hosena nachilivanga kulutwe lwenu namuYotau.
12 Shikaho sakulenu malunga 12 vakumiyachi yavaIsalele, lunga umwe umwe kumuyachi.+
13 Kahomu vapilishitu vaka-kumbata Chikasha chaYehova navakalyata mahinji avo mumeya aYotau, meya nawakalivatula. Meya aze akufuma kuto nawakakingama* kusali yimwe.”+
14 Vatu vakatukile muchilombo chavo mangana vazauke Yotau, kaha vapilishitu vaka-kumbata chikasha+ chalushiko valivangile kulutwe.
15 Omu vapilishitu vaka-kumbata Chikasha vahetele kuYotau nakulyata mahinji avo mumeya (Yotau eji kufumikanga nalivaji musanga+ yenyi yosena halwola lwakwaha lwosena),
16 meya aze akufuma kuto akingamine. Akingamanyine* kwakusuku, kunganda yaAlama, yize yapwilile kwakamwihi naZeletane. Kaha aze akuya kusango, kuKalungalwiji waAlava, Kalungalwiji waMungwa* omine mwomwo vawavatwile. Ngocho vatu vazaukilile kuze kwakulitalasana naYeliko.
17 Jino vapilishitu vaka-kumbata chikasha chalushiko lwaYehova vemanyine hamavu akuma,+ hakachi kakalwiji Yotau, kaha vaIsalele vosena vahichile hamavu akuma,+ palanga nomu vatu vosena vakumine kuhita hakalwiji Yotau.
Kwinyikila Chamwishi
^ Hepe., “navana vaIsalele.”
^ Kafwe jimita 890. Tala Chihande B14.
^ Chipwe “nawakapwa nge mbango.”
^ Chipwe “Apwile nge mbango.”
^ Ikiye Kalungalwiji waKufwa.
