Yoshuwa 4:1-24
-
Malolwa akwanukilaho (1-24)
4 Omu valingile vaIsalele vosena hivanazauka lyehi Yotau, Yehova ambile kuli Yoshuwa ngwenyi:
2 “Sakula malunga 12 vakumiyachi yavaIsalele, lunga umwe umwe kumuyachi.+
3 Valweze ngwove, ‘Mbatenu malolwa 12 hakachi kaYotau haze vemananga+ vapilishitu. Ambatenu muyenga nawo mangana mukawatumbike hachihela namukasavalila lelo.’”+
4 Ngocho Yoshuwa asanyikile malunga 12 vaze atongwele muli vaIsalele, lunga umwe umwe kumuyachi.
5 Kaha avalwezele ngwenyi: “Hitenu kulutwe lwaChikasha chaYehova Kalunga kenu hakachi kaYotau, kaha mutu himutu ambate lilolwa limwe hachifwiji chenyi. Mumbate malolwa 12 kweseka nakuvula chamiyachi yavaIsalele,
6 mangana chikapwenga unjiho mukachi kenu. Kachi nge vana venu kulutwe navakamihula ngwavo, ‘Nyi awa malolwa aka?’+
7 Enu mukavambulila ngwenu: ‘Mwomwo meya aYotau alivatwile kulutwe lwachikasha+ chalushiko lwaYehova. Meya aYotau alivatwile omu chikasha chazaukile Yotau. Kaha malolwa awa nawapwanga akwanukilangaho kuli vaIsalele haya myaka yosena.’”+
8 Ngocho vaIsalele valingile ngana muze avalwezele Yoshuwa. Vambachile malolwa 12 hakachi kaYotau kweseka nakuvula chamiyachi yavaIsalele nge muze Yehova alwezele Yoshuwa. Kaha vayile nawo nakukawatumbika kuchihela kuze vakasavalilile.
9 Yoshuwa emikile malolwa eka 12 hakachi kaYotau, haze vemanyine vapilishitu vaka-kumbata chikasha chalushiko,+ kaha kuwali nakulikumbi lyalelo.
10 Vapilishitu vaka-kumbata chikasha vemanyine hakachi kaYotau palanga nomu vatu vakumishile kulinga vyuma vyosena vize Yehova alwezele Yoshuwa, nge muze nawa vamulwezele kuli Mose. Kufumaho vatu vosena vanguhwishile kuzauka Yotau.
11 Omu valingile vatu vosena hivanazauka lyehi, vaze vapilishitu vazaukile naChikasha chaYehova kumeso avatu.+
12 VaLuvene, navaNgate, nachimbwa chamuyachi waManase, vazaukile mumazavu akulongesa kanawa+ kulutwe lwavaIsalele, nge muze avalwezele Mose.+
13 Kafwe maswalale 40,000 vakulipakata vitwa, vazaukile Yotau kumeso aYehova nakuya kulikundu lyaYeliko.
14 Halikumbi lize, Yehova atohwesele Yoshuwa kumeso avaIsalele vosena.+ Kaha vamuvumbikilenga* chikuma hamakumbi akuyoya chenyi osena, nge muze nawa vavumbikilenga Mose.+
15 Jino Yehova ambile kuli Yoshuwa ngwenyi:
16 “Lweza vapilishitu vaka-kumbata chikasha+ chaUnjiho vakanduke muYotau.”
17 Ngocho Yoshuwa alwezele vapilishitu ngwenyi: “Kandukenu muYotau.”
18 Omu valingile vapilishitu vaka-kumbata chikasha+ chalushiko lwaYehova hivanakanduka lyehi muYotau nakulyata mahinji avo hatunda, meya amuYotau alifwikile nakufumika musanga+ yayo yosena nge muze apwile hakavanga.
19 Vatu vosena vakandukile muYotau hakakweji watete, halikumbi lyakusokesa 10 lyakakweji kana, kaha vatungile chilombo chavo kuNgilingale+ kumututuko wangiza yaYeliko.
20 Kaha aze malolwa 12 vambachile muYotau, Yoshuwa awemikile kuNgilingale.+
21 Kaha ambile kuli vaIsalele ngwenyi: “Kachi nge vana venu navakamihula kulutwe ngwavo, ‘Awa malolwa aka?’+
22 Kaha mukavambulila ngwenu: ‘VaIsalele vazaukile uno Yotau hamavu akuma+
23 omu Yehova Kalunga kenu omishile meya aYotau kumeso avo palanga nomu vazaukile vosena, ngana muze Yehova Kalunga kenu omishile Kalungalwiji Uchila hameso etu palanga nomu twazaukile.+
24 Alingile ngocho mangana vatu vahamavu vosena vatachikize ngwavo livoko lyaYehova lyapwa lyangolo,+ mangana nawa mumwivwenga Yehova Kalunga kenu woma.’”
Kwinyikila Chamwishi
^ Hepe., “vamwivwilenga woma.”
