Yoshuwa 5:1-15
5 Jino vamyangana javaAmole+ vosena vaze vapwilenga musali yaYotau chakutala kumulauko,* navamyangana javaKanane+ vosena vaze vapwilenga kukalungalwiji, vahombele,*+ kaha kavomikileko* omu vevwile ngwavo Yehova nomisa meya aYotau kumeso avaIsalele kaha vanazauka.+
2 Halwola luze, Yehova ambile kuli Yoshuwa ngwenyi: “Fula jipoko jamatale, uputuke cheka kujihana+ vaIsalele.”
3 Ngocho Yoshuwa afulile jipoko jamatale, kaha ajihanyine vaIsalele kuNgivete-halalote.*+
4 Avajihanyine mwomwo malunga vosena vaze valovokele muEjipitu, vaze vapwile vaka-jita* vafwililile mupambo omu valingile hivanalovoka lyehi muEjipitu.+
5 Malunga vosena vaze valovokele muEjipitu vavajihanyine, oloze vaze vasemukilile mupambo omu vafumine muEjipitu kavavajihanyineko.
6 VaIsalele vatambwojokele myaka 40+ mupambo palanga nomu vafwile malunga vaka-jita vosena vaze valovokele muEjipitu, malunga vaze vazenekele kwononoka mulizu lyaYehova.+ Yehova alishingile kuli vakiko ngwenyi, kaveshi kukamona lifuchi+ lyakumbwambumuka mavele nauchi,+ lize alishingile Yehova kuhana kuli vakakuluka javoko.+
7 Ngocho Yoshuwa engishile vana mulifuchi kana muchishishisa chavisemi javo.+ Kaha avajihanyine mwomwo vapwile vilima, hakuwana nge kavavajihanyine haungeji wavoko.
8 Omu vakumishile kujihana malunga vosena, vatwamine muchilombo palanga nomu valikangwile.
9 Jino Yehova ambile kuli Yoshuwa ngwenyi: “Lelo ngunamifumisa sonyi vanamivwisanga vaEjipitu.” Shikaho vavulukila chihela chize ngwavo Ngilingale*+ nakulelo lino.
10 VaIsalele vatwaminenga lika kuNgilingale, kaha halikumbi lyakusokesa 14 mukakweji,+ valingile paseka nachingoloshi mulikundu lyaYeliko.
11 Kaha lichako, valile jimbuto jamulifuchi, valile jimbolo jakuzeneka chimbalwila,+ namanona akwocha halikumbi vene eli.
12 Jino likumbi lyakavangijileho mana kayaholokeleko omu valingile hivanali lyehi jimbuto jamulifuchi. VaIsalele+ kavalile cheka manako, oloze vaputukile kulya jimbuto jamulifuchi lyaKanane mumwaka uze.+
13 Omu Yoshuwa apwile kwakamwihi naYeliko, andwile meso enyi, kaha amwene lunga+ nemana kulutwe lwenyi napoko yamukwale mulivoko lyenyi.+ Yoshuwa apandamine kuli ikiye, kaha amwihwile ngwenyi: “Uli kusali yetu tahi, nyi uli kusali yavaka-kole jetu?”
14 Uze lunga amukumbulwile ngwenyi: “Nduma, ami nguneza mwatwamina* waliyongomena lyaYehova.”+ Ngocho Yoshuwa afukamine chameso hamavu, alifukwile kuli ikiye nakwamba ngwenyi: “Ove mwata wami, vyuma muka mungulweza ami ngamba yove?”
15 Uze twamina waliyongomena lyaYehova ambile kuli Yoshuwa ngwenyi: “Zula mendelo kumahinji ove, mwomwo hachihela unemana hanapu hajila.” Hahaze vene, Yoshuwa azulile mendelo enyi.+
Kwinyikila Chamwishi
^ Hepe., “vapwilenga musali, chakutala kukalungalwiji.”
^ Hepe., “michima yavo yayengunukile.”
^ Hepe., “kaha shipilitu kayapwile muli vakikoko.”
^ Ulumbunwiso, “Pili yaMivumbo.”
^ Chipwe “vaze vateselemo myaka yakuya kujita.”
^ Ulumbunwiso, “Kufumisa.”
^ Chipwe “mwamwata.”