Yoshuwa 6:1-27
6 Vikolo vyaYeliko vavisokele mwomwo yavana vaIsalele, kaha kakwapwile mutu alovokele haweluka chipwe kwingila mukachiko.+
2 Jino Yehova ambile kuli Yoshuwa ngwenyi: “Tala! Ngunakuhane nganda yaYeliko namwangana wayo, navaka-jita vangolo vosena.+
3 Enu malunga vaka-jita muvosena, mukajinguluka nganda kamwe halikumbi. Mukalinga ngocho hamakumbi 6.
4 Kaha vapilishitu 7 vakambate jimbinga 7 javizamba jamikoko nakuhita kulutwe lwaChikasha. Jino halikumbi lyakusokesa 7 mukajinguluka nganda mapapa 7, kaha vaze vapilishitu vakembe jize jimbinga.+
5 Omu namukevwa vapilishitu navemba jize jimbinga javizamba jamikoko, vaka-kwasa jita vosena vakatambike luvila lwajita. Yize kembwe nayikapuzuka,+ kaha vaka-kwasa jita vakalahe nakwingila munganda.”
6 Ngocho Yoshuwa mwanaNune asanyikile vapilishitu, ambile kuli vakiko ngwenyi: “Mbatenu chikasha chalushiko, kaha vapilishitu 7 nawa vambate jimbinga javizamba jamikoko 7 nakuhita kulutwe lwaChikasha chaYehova.”+
7 Kaha alwezele vatu ngwenyi: “Yenunga mujinguluke nganda, kaha vaka-kulipakata vitwa+ valivange kulutwe lwaChikasha chaYehova.”
8 Kaha valingile nge muze avalwezele Yoshuwa. Vapilishitu 7 vaze vambachile jimbinga 7 kumeso aYehova vayile kulutwe nakwimba jize jimbinga. Kaha chikasha chalushiko lwaYehova chapwile nakuvakava munyima.
9 Malunga vaka-kulipakata vitwa vapwile kulutwe lwavaze vapilishitu vembilenga jimbinga. Kaha vaka-kwasa jita vaze vakavilenga munyima, vapwile munyima yaChikasha oku jimbinga jili nakuvuma.
10 Yoshuwa alwezele vaka-kwasa jita ngwenyi: “Kanda namukatambakanako, mazu enu kanda akevwakanako. Mutunwa twenu kanda namukalovoka mazuko palanga nakulikumbi nangukamilweza ngwami, ‘Tambakanenu!’ Kaha namukatambakana jino.”
11 Ngocho Chikasha chaYehova vachijingulwishile kunganda kamwe halikumbi lyatete, kufumaho vakindulukile nakusavala muchilombo chavo.
12 Jino lichako, Yoshuwa ahindukile chimenemene, kaha vapilishitu vambachile chize Chikasha+ chaYehova.
13 Vaze vapilishitu 7 vambachile jimbinga 7 javizamba jamikoko, vayile kulutwe lwaChikasha chaYehova oku vali nakwimba jize jimbinga. Kaha malunga vaka-kulipakata vitwa vapwile kulutwe lwavaze vapilishitu. Vaka-kwasa jita vaze vakavilenga munyima, vapwile munyima yaChikasha chaYehova oku jimbinga jili nakuvuma.
14 Vajingulukile nganda kamwe halikumbi lyamuchivali, kufumaho vakindulukile kuchilombo chavo. Omu mukiko valingile hamakumbi 6.+
15 Halikumbi lyakusokesa 7, vahindukile chimenemene hakututuka chalikumbi ngana muze valingilenga, kaha vayile nakujinguluka nganda mapapa 7. Halikumbi kaneli, hakiko kaha vajingulukile nganda mapapa 7.+
16 Omu vajingulukile nganda hatando yakusokesa 7, vapilishitu vembile jize jimbinga, kaha Yoshuwa alwezele vaka-kwasa jita ngwenyi: “Tambakanenu,+ mwomwo Yehova namihane lyehi nganda kana.
17 Nganda kaneyi navyuma vyosena vilimo navinonga.+ Yikiko yinapu yaYehova. Mukayovola kaha Lahave+ pwevo muka-ujila, navosena vaze ali navo muzuvo yenyi mwomwo aswekele vandoji vaze twatumine.+
18 Oloze kalihendenu kuvyuma vyakutela kunonga,+ kuchina namukavivwila lwiso nakumbatako vimwe,+ kaha namukaneha ukalu* muchilombo chavaIsalele nakulingisa jino vachinongese.+
19 Palata, naulu, navyuma vyaunengu nafwelu vinapu vyajila kuli Yehova.+ Mukavihaka muze mwakulamina vikumba muzuvo yaYehova.”+
20 Vaka-kwasa jita vatambakanyine omu javumine jimbinga.+ Omu vaka-kwasa jita vevwile vize vivumo vyajimbinga, vatambikile luvila lwajita, kaha kembwe yanganda yapuzukile.+ Kufumaho vaka-kwasa jita valahile nakwingila munganda, kaha vayitambwile.
21 Vanongesele vosena vaze vapwile munganda najipoko jamikwale, malunga namapwevo, navanyike navakulwane, navangombe, namikoko, navimbulu.+
22 Yoshuwa ambile kuli malunga vavali vaze vayile nakusondwesa lifuchi ngwenyi: “Ingilenu muzuvo yayauze pwevo muka-ujila, kaha kamulovolenumo navosena vaze vakuzuvo yenyi, nge muze mwalishingile kuli ikiye.”+
23 Ngocho vaze vandoji valowele Lahave, naise, nanaye, navandumbwenyi vosena, navosena vaze vakuzuvo yenyi. Valowele tanga yenyi yosena,+ kaha vavatwalile vavatonyi kusali yachilombo chavaIsalele.
24 Ize nganda navyuma vize vyapwilemo vavinongesele nakakahya. Kaha palata, naulu, navyuma vyaunengu nafwelu vavitwalile muze mwakulamina vikumba muzuvo yaYehova.+
25 Oloze Lahave uze pwevo muka-ujila, navaze vakuzuvo yaise, navaze vakuzuvo yenyi vosena, vavayowele kuli Yoshuwa.+ Lahave natwamenga muli vaIsalele nakulikumbi lyalelo,+ mwomwo aswekele valuwa vaze atumine Yoshuwa vayenga nakusondwesa Yeliko.+
26 Yoshuwa alishingile halikumbi lize ngwenyi:* “Weshowo mwatungulula cheka nganda yaYeliko akapwe wakwangula kumeso aYehova. Omu mwakala chihela changanda, mwanenyi watwatwa akafwe, kahomu mwakemika mapito anganda kana, mwanenyi wakasulasongo nawa akafwe.”+
27 Ngocho Yehova apwile naYoshuwa,+ kaha puho yenyi yevwakanyine hamavu hosena.+
Kwinyikila Chamwishi
^ Chipwe “malwa; vihuli.”
^ Chipwe pamo, “alingishile vatu valishinge halikumbi lize ngwavo.”
