Yoshuwa 7:1-26
7 Oloze kupandama kuvyuma vize vyakutela kunonga vaIsalele kavashishikileko mwomwo Akane+ mwanaKalami, Kalami mwanaZavachi, Zavachi mwanaZela wakumuyachi waYuta ambachile vyuma vimwe vyakutela kunonga.+ Ngocho Yehova akwachilile vaIsalele matoto.+
2 Jino Yoshuwa atumine malunga kufuma kuYeliko vayenga kuAi,+ kwakamwihi naMbete-avene kumututuko waMbetele.+ Avalwezele ngwenyi: “Yenunga mukasondwese lifuchi.” Ngocho vaze malunga vayile nakusondwesa nganda yaAi.
3 Omu vakindulukile kuli Yoshuwa, vamwambile ngwavo: “Vaka-kwasa jita vosena kanda navayako. Kafwe vatu 2,000 chipwe 3,000 vanatemo kufungulula nganda yaAi. Kanda uzeyesa vaka-kwasa jita vosenako, mwomwo vatu vamunganda kana vavandende.”
4 Ngocho kwayile vaka-kwasa jita kafwe 3,000, oloze vakachinyine vaze malunga vakuAi.+
5 Vaze malunga vakuAi vahangasanyine vaIsalele kufuma kuweluka wachikolo changanda swi nakuShevalime,* nakukaheta kuze kwakushikumuka kupili, kaha vajihileho kafwe vatu 36. Ngocho michima yavatu vosena yayengunukile, kaha yapwile nge meya.
6 Jino Yoshuwa navakulwane javaIsalele vapihililile nakupula uvwalo wavo, kaha vafukamine chameso hamavu kuChikasha chaYehova palanga nakuchingoloshi, kaha valishikilile mavu kumitwe yavo.
7 Yoshuwa ambile ngwenyi: “Ove Mwata Wakulitulaho Yehova, ikaze unatuzawishila kufuma musali yaYotau nakutuhana kumavoko avaAmole vatunongese? Kachi twalitwaminanga kwetu musali* yize yaYotau.
8 Ove Yehova nanguhanjika mukaze hakuwana nge vaIsalele vanachinyi lyehi* vaka-kole javo?
9 Omu vaKanane navatu vosena mulifuchi navevwako, navatujingilika nakujimbangana lijina lyetu hano hamavu. Vyuma muka naulinga mangana ukinge lijina lyove lyalinene?”+
10 Yehova akumbulwile Yoshuwa ngwenyi: “Katuka! Ikaze unafukamina chameso hamavu?
11 VaIsalele vanalingi shili. Vanahokola lushiko+ lwami luze ngwavalwezele ngwami valame. Vanambate vyuma vimwe vyakutela kunonga.+ Vanavivi+ nakuvisweka havyuma vyavo.+
12 Shikaho vaIsalele kaveshi kuhasa kufungulula vaka-kole javoko. Navachinanga vaka-kole javo mwomwo vanapu lyehi vatu vakutela kunonga. Kangweshi kupwa nayenuko kuvanga munafumisa vyuma vyakutela kunonga mukachi kenu.+
13 Shikaho katuka ujilike vatu.+ Hanjika kuli vakiko ngwove, ‘Kalijilikenu hamene mwomwo Yehova Kalunga kaIsalele nambe ngwenyi: “Enu vaIsalele, muli enu muli vyuma vyakutela kunonga. Kamweshi kuhasa kufungulula vaka-kole jenuko, kuvanga munafumisa vyuma vyakutela kunonga mukachi kenu.
14 Kakungulukenu hamene chimene, muyachi himuyachi nahawo, kaha weshowo muyachi mwakasakula+ Yehova, ukemane kulutwe. Visaka nawa vikakunguluke hamwe, kaha chisaka chize mwakasakula Yehova chikemane kulutwe. Jitanga jikakunguluke hamwe, kaha tanga yize mwakasakula Yehova yikemane kulutwe. Lunga hilunga akemane hauka wenyi.
15 Kaha lunga uze navakawana navyuma vyakutela kunonga vakamujihe nakumulumba,+ hohamwe navyuma vyenyi vyosena, mwomwo nahokola lushiko+ lwaYehova nakulinga chuma chakwivwisa sonyi muIsalele.”’”
16 Jino lichako Yoshuwa ahindukile chimenemene, akungulwile vaIsalele muyachi himuyachi nahawo, kaha asakwileho muyachi waYuta.
17 Akungulwile visaka vyaYuta, kaha asakwileho chisaka chavaZela.+ Kufumaho akungulwile chisaka chavaZela, lunga hilunga nahenyi, kaha asakwileho Zavachi.
18 Jino anehele tanga yaZavachi kulutwe, lunga hilunga nahenyi, kaha asakwileho+ Akane mwanaKalami, Kalami mwanaZavachi, Zavachi mwanaZela wakumuyachi waYuta.
19 Yoshuwa ambile kuli Akane ngwenyi: “Ove mwanami, mutohwese Yehova Kalunga kaIsalele, litavile shili yove kuli ikiye. Ngulweze vyuma unalingi. Kanda naunguswekelako.”
20 Ngocho Akane ambile kuli Yoshuwa ngwenyi: “Chamuchano vene ngunalingi shili kuli Yehova Kalunga kaIsalele. Ngwalinganga ngana:
21 Omu ngwamonanga chikuto chamwaza chakuShinale+ havyuma vyakupukula, najishekele* japalata 200, naulu wakulema jishekele 50, ngwavivwilanga lwiso nakuvimbata. Ngunavivumbika mumavu mumbalaka yami, kaha jimbongo jili kwishi.”
22 Hahaze vene Yoshuwa atumine valuwa, valahililile kumbalaka yenyi, kaha vawanyine chize chikuto nachivumbika mumbalaka yenyi.
23 Ngocho vambachile vyuma vize vyapwile mumbalaka nakuvitwala kuli Yoshuwa navaIsalele vosena, kaha vavitumbikile kumeso aYehova.
24 Yoshuwa navaIsalele vosena hamwe, vambachile Akane+ mwanaZela, napalata, nachize chikuto chamwaza, naulu,+ navana venyi vamalunga, navava vamapwevo, navangombe jenyi, navimbulu jenyi, namikoko jenyi, nambalaka yenyi, navyeshovyo apwile navyo vavitwalile kuChinema* chaAkole.+
25 Yoshuwa amwambile ngwenyi: “Ikaze unatunehela ukalu* waunene ngana?+ Yehova mwakuzangamisa likumbi lyalelo.” Ngocho vaIsalele vosena vamwashile malolwa+ natanga yenyi kumwe, kufumaho vavalumbile mukakahya.+
26 Haze vamulumbililile valumbikileho mulumba wamalolwa, uze uliko nakulikumbi lyalelo. Ngocho Yehova atulishile matoto enyi.+ Shikaho valukila chihela chize ngwavo Chinema chaAkole* nakulelo.
Kwinyikila Chamwishi
^ Ulumbunwiso, “Chilolwa.”
^ Kulumbununa, kumutamba wakumututuko.
^ Chipwe “vanatalisa lyehi nyima.”
^ Shekele yimwe yapwile jingalamu 11.4. Tala Chihande B14.
^ Chipwe “kuChana.”
^ Chipwe “malwa; vihuli.”
^ Ulumbunwiso, “Ukalu; Vihuli.”
