Yoshuwa 8:1-35
8 Jino Yehova ambile kuli Yoshuwa ngwenyi: “Kanda nawivwa woma chipwe kulizuzukilako.+ Katuka namalunga vaka-jita vosena muyenga nakulukuka nganda yaAi. Tala! Ngunakuhane mwangana waAi, navatu jenyi, nanganda yenyi, nalifuchi lyenyi.+
2 Ukanongesa nganda yaAi namwangana wayo, ngana muze walingile nganda yaYeliko namwangana wayo.+ Oloze vyuma vyamunganda kana navimuna mukavitambula vikapwe vyenu. Ulweza vaka-kwasa jita vamwe vaswame kunyima yanganda.”
3 Ngocho Yoshuwa navaka-kwasa jita vosena vakatukile mangana vayenga nakulukuka Ai. Kaha Yoshuwa asakwile vaka-jita vangolo 30,000 nakuvatuma naufuku.
4 Avalwezele ngwenyi: “Kaswamenu kunyima yanganda. Kanda namukaswama kwakusuku nangandako, kaha muvosena lizangenu.
5 Oloze ami navaka-jita ava nguli navo natukapandama kunganda. Kahomu navakeza nakutunyemukila nge muze valingile hakavanga,+ etu natukavachina.
6 Omu navakatuhangasana, natukavachina mangana tukavasosolole kwakusuku nanganda, mwomwo navakamba ngwavo, ‘Vali nakutuchina nge muze vachinyine hakavanga.’+ Ngocho natukavachina.
7 Kahenu mwaswamanga namukeza munganda nakuyilukuka. Yehova Kalunga kenu mwakayihana kuli enu.
8 Omu namukalinga himunayitambula lyehi, mukayocha nakakahya.+ Mukalinga ngana muze nahanjika Yehova. Ami ngunamilweze lyehi.”
9 Jino Yoshuwa avasuwile, kaha vayile nakuswama. Vakaswamine kumututuko waAi mukachi kaMbetele naAi. Oloze Yoshuwa asalile ufuku uze namalunga vaka-jita vaze apwile navo.
10 Yoshuwa ahindukile chimenemene, akungulwile vaka-jita, kaha ayile hamwe navakulwane javaIsalele kuAi.
11 Malunga+ vaka-kwasa jita vosena vaze apwile navo vayile nenyi hamwe, kaha vapandamine kulutwe lwanganda. Vatungile chilombo chavo kunote yaAi, mukachi kavo naAi mwapwile chinema.
12 Jino ambachile vaka-jita kafwe 5,000, kaha avalwezele vakaswame+ kumulauko wanganda yaAi, mukachi kaMbetele+ naAi.
13 Ngocho vaka-kwasa jita vavavulu vatungile chilombo chavo kunote yanganda,+ kaha vaze vaswamine kunyima vapwilile kumulauko.+ Yoshuwa ayile ufuku uze mukachi kachinema* nalizavu lyenyi.
14 Kahomu mwangana waAi avamwene, alovokele chimenemene namalunga vamunganda yize mangana vakazunge navaIsalele kuchihela chize chalitalasanyine nachinema. Oloze katachikijile ngwenyi kwapwile malunga veka vaka-jita vavaswaminyinyine kunyima yangandako.
15 Omu malunga vakuAi vejile nakuvanyemukila, Yoshuwa nalizavu lyenyi lyavaka-kwasa jita vachinyinyine mujila yize yatalikisa mupambo.+
16 Ngocho malunga vosena vamunganda yize vakungulukile, kaha vahangasanyine Yoshuwa nalizavu lyenyi palanga nomu vasezele nganda hahasuku.
17 Munganda yaAi naMbetele kamwalitulile lunga numba umwe azenekele kuya nakuhangasana vaIsaleleko. Vahangasanyine vaIsalele nakuseza vikolo vyanganda hululu.
18 Jino Yehova ambile kuli Yoshuwa ngwenyi: “Zundula likunga lili mulivoko lyove ulitalikise kunganda yaAi,+ mwomwo nanguyihana mumavoko ove.”+ Ngocho Yoshuwa azundwile likunga lize lyapwile mulivoko lyenyi nakulitalikisa kunganda.
19 Kahomu azundwile livoko lyenyi, vaka-jita vaze vaswamine vasolomokele washiwashi, valahile nakwingila munganda, kaha vayitambwile nakuyocha nakakahya.+
20 Omu malunga vakuAi valumukile nakutala kunyima, vamwene nganda yili nakufwindasana wishi, kaha kavapwile cheka nangolo jakuchinako. Jino vaIsalele vaze vapwile nakuchinyina mupambo, valumukilile malunga vaze vapwile nakuvahangasana.
21 Kahomu Yoshuwa nalizavu lyenyi vamwene ngwavo vaka-jita vaze vaswamine vanatambula nganda, kaha wishi wanganda yize nawa uli nakufwinda, valumukilile malunga vakuAi nakuputuka kuvajiha.
22 Vaka-kwasa jita vaze valukukile nganda, valovokele nakulisesa navakwavo, ngocho vahakile vaze malunga vakuAi hakachi, kaha vavajihile vosena, kakwapwile mutu asalileho chipwe kuchinako.+
23 Oloze mwangana waAi+ vamukwachile wamutonyi, kaha vamutwalile kuli Yoshuwa.
24 Omu vaka-kwasa jita vakumishile kujiha malunga vakuAi vosena vaze vavahangasanyine mupambo, vakindulukile munganda yaAi nakujiha vosena vaze valitulilemo najipoko jamikwale.
25 Vatu vakuAi vosena vaze vajihile halikumbi lize, namalunga namapwevo, vapwile 12,000.
26 Yoshuwa kazewile livoko lize akwachile likungako+ palanga nomu vanongesele vaka-Ai vosena.+
27 Oloze vimuna navyuma vapupile munganda yize vavimbachile, nge muze Yehova alwezele Yoshuwa.+
28 Yoshuwa ochele nganda yaAi nakuyiseza malala,+ kaha yichili lika ngundu nakulelo.
29 Kaha asukikile mwangana waAi hachitondo* palanga nakuchingoloshi. Kuheta hakulauka chalikumbi, Yoshuwa alwezele vatu jenyi vafumise mujimba wayauze mwangana hachitondo+ nakuuhaka kuchikolo changanda. Kaha vamulumbikile mulumba wamalolwa uze uliko nakulelo.
30 Jino Yoshuwa atungilile Yehova Kalunga kaIsalele lijiko lyakulumbila kuPili yaEvale.+
31 Alitungile nge muze ngamba yaYehova Mose alwezele vaIsalele, nge muze nawa vasoneka mumukanda waJishimbi+ jaMose ngwavo: “Lijiko kana mukalitunga namalolwa amuundu, akuzeneka kusonga nachinoma numba chimwe.”+ Kaha valumbilileho mawana akulumba kuli Yehova, namawana akusolola kuunda.+
32 Kaha haze hamalolwa asonekeleho mazu aJishimbi+ jize Mose asonekelele kumeso avaIsalele.+
33 VaIsalele vosena, navakulwane javo, navilolo javo, navaka-kuvayula, vemanyine kuluhachi naluhachi lwaChikasha kumeso avapilishitu vavaLevi vaze vambachilenga chikasha chalushiko lwaYehova. Kaha navamwiza kuvapwile.+ Chimbwa chavo chimwe vemanyine kulutwe lwaPili yaNgelize, kaha chimbwa chikwavo kulutwe lwaPili yaEvale+ (nge muze avalwezele lyehi Mose, ngamba yaYehova)+ mangana vavakisule.
34 Kufumaho Yoshuwa atangilile helu mazu aJishimbi+ osena, namazu akukisula,+ nawawa akwangula,+ kweseka nomu vasoneka mumukanda waJishimbi.
35 Hamazu osena aze Mose alwezele Yoshuwa, kahapwile lizu numba limwe lize Yoshuwa azenekele kutangila kulizavu lyosena lyavaIsalele,+ namapwevo, navanyike, navamwiza+ vaze vapwile* mukachi kavoko.+
