Yoshuwa 9:1-27
9 Omu mujimbu kanou vawivwile kuli vamyangana vavaHete, navaAmole, navaKanane, navaPeliji, navaHivi, navaYevuse,+ vaze vapwile musali yaYotau+ kungalila yajipili, nakuShefwela, nakuchikulo chaKalungalwiji Wamunene*+ kulutwe lwaLevanone,
2 valivwasanyine mangana valwenga jita naYoshuwa navaIsalele.+
3 Vatu vakuNgiveyone+ navakiko vevwile vyuma alingile Yoshuwa kunganda yaYeliko+ naAi.+
4 Ngocho valingile mwakuzangama, vahakile vyakulya mujinjeke jakupulika nakujihaka havimbulu javo, najituku javinyo jamwaka jamalambu jize vahakile vikamba.
5 Vavwalile namendelo akufwa akuhaka vikamba, nauvwalo wakupulika. Kaha mbolo yosena vambachile yapwile yaumu, yakupazwojoka.
6 Vayile kuli Yoshuwa kuchilombo vatungile kuNgilingale,+ kaha vambile kuli ikiye nakuli malunga vavaIsalele ngwavo: “Tunafumu kulifuchi lyakwakusuku. Shikaho tulikasenu chivwasano nayenu.”
7 Oloze malunga vavaIsalele vambile kuli vaHivi+ ngwavo. “Pamo mwatwama mwakamwihi. Natulikasa ngachilihi chivwasano nayenu?”+
8 Vakiko vakumbulwile Yoshuwa ngwavo: “Etu tunapu tuvangamba* jove.”
Yoshuwa ambile kuli vakiko ngwenyi: “Yenu veya, kaha munafumu kulihi?”
9 Vakiko vambile ngwavo: “Etu vangamba jove tunafumu kulifuchi lyakwakusuku.+ Tuneza mwomwo yalijina lyaYehova Kalunga kenu, mwomwo tunevu puho yenyi navyosena alingile kulifuchi lyaEjipitu,+
10 navize alingile kuli vamyangana vavali vavaAmole vaze vapwile musali* yaYotau, Shihone+ mwangana waHeshevone, naOnge+ mwangana waMbashane uze atwaminenga kuAshatalote.
11 Vakulwane jetu, navatu vakulifuchi lyetu vatulwezanga ngwavo, ‘Mbatenu vyakulya vyakulila mujila muyenga mukaliwane navo. Mukavambulila ngwenu: “Natupwanga tuvangamba jenu.+ Shikaho tulikasenu chivwasano nayenu.”’+
12 Eyi mbolo yapwile nakakahya omu twakatukile kujizuvo jetu. Oloze tala, yinomu, yinapazwojoka.+
13 Eji jituku jamalambu japwile jajihya omu twajilongele vinyo, oloze jino jinapulijeka.+ Kaha uvwalo wetu namendelo etu nawa vinapulika mwomwo yakusuhwa chaungeji tunatambuka.”
14 Vaze malunga vavaIsalele vatambwile* vize vyakulya, oloze kavehwile Yehova avalweze mwakulingilako.+
15 Kaha Yoshuwa avetavilile+ nakulikasa navo chivwasano chakuvetavila vayoyenga. Omu mukiko valishingile vamyata jalizavu kuli vakiko.+
16 Omu mwahichile makumbi atatu, kufuma haze valikashile chivwasano, vevwile ngwavo vaze malunga vatwama mwakamwihi, mungalila yoyimwe.
17 Jino vaIsalele vakatukile, kaha vahetele kujinganda javava malunga halikumbi lyamuchitatu. Jinganda javo japwile Ngiveyone,+ naKefwile, naMbelote, naKilyate-yeyalime.+
18 VaIsalele kavanongesele vaze vatuko, mwomwo vamyata jalizavu valishingile Yehova+ Kalunga kaIsalele kuli vakiko. Kaha lizavu lyavaIsalele lyosena lyaputukile kutatwokesa vaze vamyata.
19 Jino vamyata javaIsalele valwezele lizavu lyosena ngwavo: “Tunalishingi lyehi Yehova Kalunga kaIsalele kuli vakiko, ngocho katweshi kuhasa kuvanongesako.
20 Natuvalinga ngana: Natuvecha vayoye kuchina utenu waKalunga nawiza hali etu mwomwo yalushingo luze tunalishingi kuli vakiko.”+
21 Vamyata vambile cheka ngwavo: “Vechenu vayoye, navapwanga vaka-kuchavila lizavu lyavaIsalele jikunyi, nakuvaswichilanga meya.” Omu mukiko vavalwezele kuli vamyata javo.
22 Jino Yoshuwa asanyikile vaze malunga, avehwile ngwenyi: “Mwatwongelanga ika ngwenu, ‘Tunafumu kulifuchi lyakwakusuku,’ okunyi mwatwama mwakamwihi nayetu?+
23 Shikaho jino munapu muvakwangula,+ namupwanga muvandungo, muvaka-kuchavila vakuzuvo yaKalunga kami jikunyi, nakuvaswichilanga meya.”
24 Kaha vamukumbulwile Yoshuwa ngwavo: “Etu vangamba jove vatulwezele ngwavo Yehova Kalunga kove alwezele ngamba yenyi Mose kumihana lifuchi lyosena lino, nakunongesa vatu vatwamamo vosena.+ Kaha twevwanga woma wayenu,+ shikaho tunalingila chuma kana.+
25 Etu tuli mulivoko lyove. Mweshomwo unamono ngwove mwamwaza, mwakusungama, lingamo tuhu.”
26 Ngocho Yoshuwa alingile mwamwaza, avapululwile mumavoko avaIsalele, kaha kavavajihileko.
27 Kaha halikumbi lize, Yoshuwa avalingishile kupwa vaka-kuchavila lizavu+ lyavaIsalele jikunyi, nakuvaswichilanga meya. Vachavilenga nawa jikunyi nakuswitanga meya akulijiko lyaYehova lyakulumbila kuchihela chize asakwile Kalunga.+ Kaha vanalinginga ngocho palanga nakulelo.+
Kwinyikila Chamwishi
^ Ikiye Kalungalwiji waMendetelenya.
^ Chipwe “tuvandungo.”
^ Kulumbununa, kumutamba wakumututuko.
^ Chipwe “vakekesele.”
